VOV4.Sêdang - Bu tung pơla 1 măng tĭng, pơlê kong kơdrâm Ƀuôn Ma Thuột, kong pơlê Dak Lak pơtối ai lối chât ngế tâ pơreăng tung pơlê pơla ôh tá ‘nâi xiâm kối tâ tú, ai tơnêi tíu prôk ôh tá tơniăn. Ki rơhêng vâ tối cho tíu ki ai pơreăng ki nếo châ ‘nâi a cheăm Čư̆ Êbur ƀă lối 17 ngế. Hlo ôh tá tơniăn dêi pơreăng COVID-19, mâu khu ki ai tơdjâk troh dêi pơlê kong kơdrâm Ƀuôn Ma Thuột hiăng rĕng vê hdró kơpong, tí tăng ƀă mơdât prôk lăm a mâu kơpong ki ai tơdjâk.

Seá ngăn hbrâ tơplâ mơdât pơreăng a ƀuôn Ea Bông

Sap ing kơxê lơ 22/8 cheăm Čư̆ Êbur hiăng mơdât mot lo a tâi tâng ƀuôn Ea Bông ƀă 10 tíu gak séa ngăn. Tơdrêng amê hnối pêi pro tơdroăng ki test rĕng ăm kuăn pơlê.

Hâi lơ 23/8  klêi kơ’nâi séa ngăn tung lối 1.500 túa test rĕng ƀuôn Ea Bông, ai 17 ngế yương tĭnh ƀă SARS –CoV-2. Klêi kơ’nâi châ ‘nâi, tung hâi lơ 23/8, Vi ƀan hnê ngăn pơlê kong kơdrâm Ƀuôn Ma Thuột hiăng ăm phêp xúa tơdroăng pơkâ 16 tung tâi tâng cheăm Čư̆ Êbur. Tiah mê, bu tung pơla 8 hâi, sap ing lơ 16/8 troh lơ 23/8, pơlê kong kơdrâm Ƀuôn Ma Thuột hiăng ai 28 ngế tâ COVID-19 a tíu ki ai pơreăng tung pơlê pơla.

Katarina Nga tơplôu ƀă tơbleăng