VOV4.Sêdang - Leh tơbâ 110 hơnăm hâi kot mâ Đăi tươ̆ng Võ Nguyên Giáp, a kong pơlê Cao Bằng hiăng tơkŭm po hên tơdroăng ki tơtro tiô tơdroăng pơkâ nôkố,  pơxúa. Kơxo lơ 24/8, a kơpong chôu ‘măn kế tơmeăm khoăng ton nah Tơnêi têa ki má môi Kong Trần Hưng Đạo, cheăm Tam Kim, tơring Nguyên Bình, kong pơlê Cao Bằng hiăng tơkŭm po chôu nhâng, pleăng rơvĭu reăng a Tíu koh tơbâ Đăi tươ̆ng Võ Nguyên Giáp.

Klêi kơ’nâi leh chôu nhâng, pleăng rơvĭu reăng, a kơpong chôu ‘măn tơmeăm khoăng ton nah tơnêi têa ki má môi Kong Trần Hưng Đạo, kong pơlê Cao Bằng hiăng tơkŭm po tơpui tơno dó inâi ‘’Đăi tươ̆ng Võ Nguyên Giáp ƀă pơlê xiâm Kăch măng Cao Bằng’’. 25 tơdroăng chêh tối dêi mâu kăn teăng mâ hiăng kum mơnhên hnoăng kân kĭn dêi Đăi tươ̆ng ƀă tơdroăng kăch măng Việt Nam, ki rơhêng vâ tối cho hneăng sap hơnăm 1941 – 1945, drêng Đăi tươ̆ng ối pêi cheăng a kong pơlê Cao Bằng.

Tơpui tơno dó inâi ‘’Đăi tươ̆ng Võ Nguyên Giáp ƀă pơlê xiâm Kăch măng Cao Bằng’’.

Hên tơdroăng chêh tối xuân mơnhên mâu tơdroăng veăng kum kân kĭn dêi kuăn pơlê mâu hdroâng mơngế kong pơlê Cao Bằng tung tơdroăng tŏng kum, rak ngăn Kăch măng xuân môi tiah ƀă Đăi tươ̆ng Võ Nguyên Giáp, tíu Đăi tươ̆ng đi đo ngăn cho pơlê xiâm má péa dêi tơná.

A Sa Ly tơplôu ƀă tơbleăng