VOV4.Sêdang - Hngêi trung Tơpui kâ ƀă kong têa ê tơrŭm ƀă Kơ koan teăng mâ kong têa Siam a Hà Nội ƀă Kơ koan teăng mâ Việt Nam a Bangkok rơtế tơkŭm po Tơpui tơno leh tơbâ 45 hơnăm mơjiâng tơrŭm tơpui kâ Việt Nam – Siam (6/8/1976 – 06/8/2021). Hôp tơpui tơno châ tơkŭm po mơ’no tung um tiô troăng măng internet ƀă mơ’no tung um a măng pơlê pơla Facebook vâ tơbleăng ‘na tơrŭm cheăng Việt Nam – Siam troh kơdrâm kuăn pơlê.

Xông tơpui pơxiâm po Hneăng hôp tơpui tơno, pôa Phan Chí Thành, Kăn teăng mâ Việt Nam a kong têa Siam mơnhên hdró leh tơbâ 45 hơnăm cho roh ki kal vâ péa tơnêi têa rơtế hvái ngăn mâu tơdroăng châ tơƀrê ƀă tơmiât troh la ngiâ. Ƀă tơdroăng tơpui tơno tơdrăng ƀă achê, Tơpui tơno ôh tá xê cho hneăng hôp tơpui tơno vâ tối mâu tơdroăng tuăn pâ tơrŭm lĕm tro pơla péa tơnêi têa tung 45 hơnăm hiăng hluâ, mê ối mơnhên tơdroăng khŏm mơ-eăm pêi trâu hơngế tâ tơrŭm cheăng ton xŏn Việt Nam – Siam.

Mâu tơdroăng pâ thế  troăng hơlâ châ tối a Roh hôp tơpui tơno hiăng tơpui tối hên troăng tơmiât pêi, mâu troăng pêi rơkê ăm mâu tơdroăng tơrŭm cheăng ki pơxúa pơla péa tơnêi têa tung la ngiâ.

A Sa Ly tơplôu ƀă tơbleăng