Tơpui a rôh trâm mâ, pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât xua tơdroăng ki tơmâng ngăn, hnê mơhno tơdrêng dêi jâ Trương Mỹ Hoa, kăn xiâm phŏ hnê ngăn tơnêi têa hneăng hdrối, Khu râng liăn hriâm rơkê Vừ A Dính hiăng ai túa pêi tro ‘ló, rơkê, tơƀrê. Hên tơdroăng tơkêa cho tơdroăng cheăng tung la ngiâ xua Khu râng liăn hiăng ƀă dế pêi pro môi tiah: Tơdroăng tơkêa “Tŏng gum mâu ngế cheăng tung la ngiâ” păn rak lối 600 ngế hok tro ing mâu kơpong tơkăng kong, chuăn rơlố vêh hriâm ối a tíu kâ koi ối pơtê; Tơdroăng tơkêa “Po troăng troh tơdroăng cheăng tung la ngiâ” ăm 100 ngế o kơdrâi hok tro hdroâng kuăn ngo, peăng kong ngo ƀă a chuăn rơlố ki ai tơdroăng rêh ối cheăng kâ pá puât, ƀă hên ki ê hiăng châ hên tơdroăng ki hdró, tơdjâk hiâm mơno tŏng gum dêi rơpó, veăng gum kal khât tung tơdroăng mơjiâng mâu ngế cheăng ăm mâu kơpong hdroâng kuăn ngo, peăng kong ngo ƀă a chuăn rơlố.

Kăn xiâm hnê ngăn Kuô̆k hô̆i tối tơdroăng hâk phiu ƀă tơdroăng ki pêi pro ing hơnăm 2009 Khu râng liăn hiăng pơkâ Pri Vừ A Dính vâ pơ- eăng mâu ngế krê, khu pú hên ki kơhnâ rơkê tung: Hriâm tâp; Hriăn ngăn khoa hok; Túa lĕm tro ‘na ngê̆ thuât; Tơ’noăng ivá; Tơdroăng cheăng lêng, gâk kring; Tơdroăng cheăng pơlê pơla ƀă hên ki ê pro pơxúa ăm kuăn pơlê hdroâng kuăn ngo peăng kong ngo ƀă a chuăn rơlố. Tung 15 hơnăm hdrối, Pri ôh tá la lâi pơtê mơnhông, po rơdâ: ing 15 ngế krê rơkê má môi, kơhnâ ƀă 05 khu pú hên hâk tơngăm châ xo Pri rôh apoăng troh nôkố hiăng ai 118 khu pú hên ƀă 210 ngế krê lo ing 44 hdroâng kuăn ngo, tung mê, ai mâu hdroâng kuăn ngo ki iâ mơngế châ xo Pri.

Kăn xiâm hnê ngăn Kuô̆k hô̆i mơnhên tối khât mâu ngế cho hok tro, sinh viên, droh rơtăm, mâu kăn ƀô̆ Đoân, mâu thái cô hơnăm ối nếo hiăng mơ-eăm hriâm tâp, hriâm pât, pêi cheăng, rơkê, châ hên tơdroăng ki tơƀrê, châ diâp hên pri, mê dái râ tơnêi têa, kong têa ê; ai hên tơdroăng ki rơkê plĕng, túa tơmiât rơkê, pleăng ăm khoa hok, pro chiâng ai hên tơmeăm ki kơnía ai pơxúa, xúa tung tơdroăng ki ai khât tung rêh ối ƀă mơnhông cheăng kâ, rêh ối pơlê pơla, rak vế gâk kring tơniăn, tơniăn ăm pơlê pơla.

Kăn xiâm hnê ngăn Kuô̆k hô̆i xuân tơmâng xo, khĕn kơdeăn ‘na mâu tơdroăng ki pêi pro tơƀrê ki Khu râng liăn hriâm rơkê Vừ A Dính hiăng pêi châ tung 25 hơnăm hdrối; khĕn kơdeăn mâu khu ki tŏng gum, khu ki ai hiâm mơno hơ-ui, pakĭng tơdroăng tê mơdró hiăng ai mâu tơdroăng pêi pro ki lĕm tro, veăng gum ivá ăm kuăn pơlê, gum tơmeăm ăm tơdroăng cheăng mơnhông kơpong hdroâng kuăn ngo, peăng kong ngo ƀă chuăn rơlố ing Khu râng liăn tung plâ mâu hơnăm hdrối.

Kăn xiâm hnê ngăn Kuô̆k hô̆i rơhêng vâ, mâu vâi o hok tro, sinh viên, mâu thai cô hơnăm ối nếo pêi pro tro rơkong hnê pơchân dêi Pôa Hồ Chí Minh tung Kơthô pơtroh ăm hok tro drêng hâi lăm tơkŭm troh hngêi trung tiah kố, “Tơnêi têa Việt Nam hôm chiâng lĕm há lơ ôh, hdroâng mơngế Việt Nam hôm kâi prôk troh ki kro mơdrŏng há lơ ôh vâ tơrŭm ƀă mâu kong têa tung pơtăm kơpong há lơ ôh cho kơnôm môi iâ a tơdroăng hriâm tâp dêi mâu vâi o”. Pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế:

“Mâu khu pú hên, mâu ngế krê ki châ xo Pri mơdêk mâu tơdroăng ki pêi tơƀrê hiăng châ, pơtối kơhnâ veăng gum ăm hnoăng cheăng ivá, tuăn ngoâ mơjiâng pơlê cheăm, tơnêi têa rế hía rế tơniăn lĕm. Drêng kố, á pơkâ thế Tíu xiâm Đoân pơtối tơmâng ngăn hnê mơhno, pro tơ’lêi hlâu vâ Khu râng liăn hriâm rơkê Vừ A Dính tơdjâk rơdêi hiâm mơno tơrŭm, tŏng gum; teăm tŏng gum tơdrêng, mơhnhôk, veăng gum mơnhông, mơdêk ki ai hlâu, ki rơdêi dêi hdroâng kuăn ngo, peăng kong ngo ƀă chuăn rơlố, veăng gum mơjiâng hnê mâu ngế cheăng hơnăm ối nếo rơkê châ tiô tơdroăng púi vâ pêi cheăng nôkố, rơkê plĕng dêi tơnêi têa”.

Kăn xiâm hnê ngăn Kuô̆k hô̆i xuân ăm ‘nâi, Đảng, Tơnêi têa tơkŭm liăn ngân vâ gum hên tâ nếo ăm kơpong hdroâng kuăn ngo. Kuô̆k hô̆i hiăng pơkâ mâu tơdroăng pơkâ ‘na 3 tơdroăng pơkâ tơnêi têa mê cho Mơjiâng thôn pơlê nếo; mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo; xut tah hrâ mơnguâ kơiê xơpá krá ton. Nôkố, Chin phuh dế mơ-eăm pêi pro mâu tơdroăng kố.