Kăn xiâm hnê ngăn Kuô̆k hô̆i ăm ‘nâi, tung pơla hdrối nah, Kuô̆k hô̆i hiăng pơhlêh nếo túa ki mơjiâng luât, mơdêk rơdêi tơdroăng ki chêh ‘măn tung internet ƀă tuăn mơno rơkê xua kuăn mơngế pro tung tơdroăng cheăng mơjiâng pro luât. Laga, cheăng tối tơbleăng luât xuân ối hngăm môi pâ, tá hâi châ tơdroăng ki po ngăn ƀă kuăn pơlê. Sap ing tơdroăng ki ai khât mê, Kăn xiâm hnê ngăn Kuô̆k hô̆i pơkâ thế kơxop mơ-éa luât kal pro hvêa chêng prôk mơnhông ‘na pơhlêh ‘măn tung internet tung tối tơbleăng, hnê hriâm luât.

“Pin athế xúa rơdêi internet tung hnoăng cheăng tối tơbleăng, hnê hriâm luât, ví tơdroăng ki pơhlêh xúa troăng hơlâ hriâm mê athế tơmiât troh tơrŭm hên troăng. Ki khât nôkố, pơhlêh xúa internet tung hnê tối luât gá nếo pơtê a tơdroăng ki chêh mơ’no hlá mơ-éa ing túa PDF troh a mâu cổng thong tin điê̆n tưh, gá xơpá vâ tơ’mot kuăn pơlê. Kơxop mơéa Luât kal pơhlêh túa pơkâ nhên tơdroăng ki mơjiâng hê̆ sinh thăi xúa internet tơnêi têa tơbleăng, hnê hriâm luât. Athế pơhlêh hnoăng cheăng dêi mâu kơ koan pơkâ tung cheăng tơbleăng tíu chêh ‘măn tơdroăng kal (open data) vâ tơkŭm tung mâu công cụ AI, Chatbot ki chiâng pêi xêh, gum troăng hơlâ luât ăm kuăn pơl 24/7”.

‘Na troăng hơlâ tơrŭm, ôh tá xê to tơdroăng tơbleăng môi pâ sap ing kơ koan Tơnêi têa pơtroh; kơxop mơ-éa kal ‘mot tơ’nôm pơkâ ‘na troăng hơlâ châ xúa túa ki tơbleăng tối kơlo ki hlê plĕng ƀă vê ngăn ivá ki châ xúa luât dêi kuăn pơlê tung hyôh internet vâ teăm ‘mâi pơhlêh tơdroăng ki hnê tối.

Tối troh tơdroăng ki kal klâ xoăng nhên mâu ngế xiâm ƀă ngế krê tung tơdroăng kal tơbleăng, Kăn xiâm hnê ngăn Kuô̆k hô̆i ăm ‘nâi, Luât pơkâ hơnăm 2012 pơkâ mâu khu ki xiâm (môi tiah hdrông kuăn ngo, ngế ki chó chêng tơvê kŏng, ngế ki dế pêi pro tơdroăng tro pơxâu phâk) la túa ki châ xúa xuân ối bô bối. Xua mê, kal ‘mot tơ’nôm mâu tơdroăng pơkâ séa ngăn vâ mơnhên ngế ki xúa tiô kơpong, hơnăm, kơvâ cheăng kâ.

Kăn xiâm hnê ngăn Kuô̆k hô̆i tối nhên, tơdroăng ki kal tung tơdroăng ki pêi pro luât cho cheăng hnê tối tơbleăng, hnê hriâm luât ăm kuăn pơlê hdrông kuăn ngo. Xiâm kối xua tơnêi tơníu ối hngế, kế tơmeăm vâ hnê tối tá hâi tơƀrê ƀă ki xơpá tâ cho nâl tơpui.

Kơxop hlá mơ-éa luât kal pơhlêh rơdêi hnoăng cheăng mâu tơdroăng kal hlá mơ-éa a kong pơlê; krâ pơlê, ngế pơkuâ pơlê, ngế ki châ kuăn pơlê loi, hdrông hdrê, mâu ngế ki pơkuâ xêh tung pơlê pơla. Tơdrêng amê hlối pơhlêh sap ing tối tơbleăng tŭm têk chiâng tối tơbleăng “kal achê”, tơkéa vâ tối cho kuăn pơlê pêi cheăng klâi, rêh ối a tíu lâi mê châ kơjo gum xúa mâu luât ki tơdjâk troh tơdrêng hnoăng pơkuâ dêi vâi. Pakĭng mê, kal ‘mâi rơnêu tơdroăng ki ôh tá tơniăn ‘na tíu ối dêi Hô̆i đong tối tơbleăng, hnê hriâm luât rêm râ; lêi tah xơpá ‘na liăn ngân, malối cho a pơlê cheăm ƀă tơdroăng ‘na mâu ngế cheăng ki xiâm cho ngế pêi péa tơdroăng cheăng.

Pakĭng tơdroăng pơhlêh nếo túa hnê tối, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế thăm mơnhông pơhlêh cheăng tối tơbleăng, hnê hriâm luât; ai troăng hơlâ mơhnhôk khu mơdró kâ, khu tơruĭm ƀă mâu luât sư, luât gia veăng gum tơdroăng luât, tơbleăng luât ăm kuăn pơlê.

“Á tơmiât tiah kố cheăng ki ‘mâi pơhlêh luât Tối tơbleăng, hnê hriâm luât rôh kố ôh tá xê to pơtê a tơdroăng ki ‘mâi pơhlêh câu chư lơ ‘mot tơ’nôm hnoăng cheăng ăm mâu kơ koan, mê ối athế cho môi rôh kăch măng ‘na túa ki châ ngăn; pơhlêh tuăn tơmiât pơkuâ ngăn “tơbleăng” tơdroăng kal chiâng túa tơmiât gum kuăn pơlê mơdêk ivá mơ-eăm rak vế xêh tơná ƀă luât. Tơdroăng ‘mâi pơhlêh luât rôh kố gá kal khât vâ rak vế tơniăn cheăng hnê tối, tơbleăng hnê hriâm luât châ prôk trâu rơdâ, troh rêm khu rêm ngế kuăn pơlê. Kố cho hnoăng cheăng ôh tá xê krê to dêi kơvâ mơjiâng luât mê dêi tâi tâng khu pơkuâ cheăng kal kí, sap ing Đảng, kăn pơkuâ, Măt trâ̆n troh mâu đoân theh”.

Cheăng ‘mâi pơhlêh Luât Tối tơbleăng, hnê hriâm luât ôh tá xê to vâ chêh pro klêi troăng hơlâ luât, mê ối mơhno ivá khŏm mơ-eăm dêi Kuô̆k hô̆i mơjiâng môi tơdroăng hơlâ luât achê kuăn pơlê, tơ’lêi xúa ƀă gum kuăn pơlê tơniăn tro tâ. Mâu rơkong tơpui tối a rôh hôp tơpui tơno pơtối ăm hlo Kuô̆k hô̆i đi đo tơmâng tơdroăng ki ai khât, tơmâng tơdroăng ki kuăn pơlê púi tơngah, rơhêng vâ, vâ chêh pro klêi troăng hơlâ, ăm luât châ xúa tung tơdroăng rêh ối.