Khu kăn ki pêi dêi hnoăng cheăng hiăng troh pôu, rơkâu têt ƀă hbru tơmeăm ăn kăn ƀô̆, lêng Đông Mố đô̆i gâk tơkăng kong Tuy Đức (Khu pơkuâ ngăn Mố đô̆i gâk tơkăng kong kong pơlê); Đăi đô̆i Ƀô̆ ƀinh 3 (Khu pơkuâ ngăn lêng tơring Tuy Đức). Drêng kố, Khu kăn ki pêi dêi hnoăng cheăng dêi Tơnêi têa hiăng diâp 50 kơxuô tơmeăm ăm mâu rơpŏng ki ai tơdroăng rêk kâ ối xơpá ƀă 20 kơxuô tơmeăm ăm hok tro cho kuăn rak mâu đông mố đô̆i gâk tơkăng kong.

A cheăm kơpong 3 Dak Ngo, pôu, rơkâu têt mâu kăn ƀô̆, lêng ƀă kuăn pơlê a cheăm, Phŏ kăn xiâm hnê ngăn Kuô̆k hô̆i mơnhên tối khât tơdroăng ki khu kăn pơkuâ kong pơlê hiăng mơ-eăm pêi pro tro tơdroăng cheăng tŏng gum têt ăm kuăn pơlê. Kơ-êng, rơkâu têt mâu krâ pơlê, ngế ki châ kuăn pơlê loi nhuô̆m cho hdroâng kuăn ngo, phŏ kăn xiâm hnê ngăn Kuô̆k hô̆i xuân tối nhên hnoăng cheăng dêi krâ pơlê, ngế ki châ kuăn pơlê loi.

Kố cho khu ki kal, veăng gum ăm troăng hơlâ pơkâ dêi Đảng, luât dêi Tơnêi têa troh ƀă kuăn pơlê, tơdrêng amê hlối kơhnâ veăng tung mơjiâng khu tơrŭm tâi tâng kuăn pơlê. Drêng Rơnó Hơngui Ất Tỵ, Phŏ kăn xiâm hnê ngăn Kuô̆k hô̆i Trần Quang Phương hiăng diâp 90 kơxuô tơmeăm ăm rơpŏng kơtiê, hok tro kơtiê tơkâ luâ xơpá ƀă krâ pơlê, ngế ki châ kuăn pơlê loi a cheăm Dak Ngo.

Pơtối mê, pôa Trần Quang Phương, Phŏ kăn xiâm hnê ngăn Kuô̆k hô̆i hiăng pôu, hbru tơmeăm ăm kăn ƀô̆, Kŏng an kong pơlê Dak Lak. Phŏ kăn xiâm hnê ngăn Kuô̆k hô̆i hiăng hmâng kăn pơkuâ Kŏng an kong pơlê tối ‘na tơdroăng cheăng tung hơnăm 2024, mâu tơdroăng pêi tơƀrê tung tơbleăng mâu tơdroăng tŏng gum ăm pơlê pơla; Túa pơkâ hnoăng cheăng tung hơnăm 2025, tơkŭm thăm mơdêk gâk kring, rak vế tâi tâng ăm mâu tơdroăng tơkŭm po ki kân ƀă gum mơnhông cheăng kâ rêh ối pơlê pơla kong pơlê.

Pôa Trần Quang Phương, Phŏ kăn xiâm hnê ngăn Kuô̆k hô̆i, thươ̆ng tươ̆ng mơnhên tối khât mâu ivá mơ-eăm ƀă tơdroăng pêi tơƀrê dêi Kŏng an kong pơlê Dak Lak hiăng pêi châ tung pơla hdrối nah. Malối cho tung tơdroăng “Tâi tâng kuăn pơlê rak vế gâk kring Tơnêi têa”, Tơdroăng pơkâ mơjiâng pro ƀă diâp 1.200 toăng hngêi tuăn pâ ăm rơpŏng xơpá ‘na hngêi ối, rơpŏng châ tơnêi têa gum, rơpŏng hdroâng kuăn ngo a kong pơlê hiăng pro hdrối 3 khế tâng vâ pơchông ƀă túa pơkâ mơ’no châ Chin phuh mơnhên tối khât, tơdroăng pro pơhlêh mơ-éa dêi kơvâ ai mơnhông tơƀrê khât ƀă hên ki ê.

Tối nhên ki kal dêi hnoăng cheăng rak vế tơniăn gâk kring tung pơlê pơla kong pơlê, Phŏ kăn xiâm hnê ngăn Kuô̆k hô̆i pơchân: Kŏng an kong pơlê Dak Lak athế pơtối hbrâ rơnáu séa ngăn a kong pơlê, ‘nâi nhên tơdroăng ing hdrối, ing hngế.

“Pêi pro túa pơkâ: ‘nâi nhên tơdroăng, tối tơbleăng tơdroăng, môi tuăn vâ tí tăng ‘nâi plĕng tro, ‘ló, teăm tơdrêng pơkâ tơleăng rĕng pôi tá ăm tro kơdrâ”.

 Khu kăn ki pêi dêi hnoăng cheăng troh pôu, hbru tơmeăm ăm kăn ƀô̆, lêng Đông Mố đô̆i gâk tơkăng kong Ia Rvê, Khu ngăn tơdroăng cheăng kâ cheăng lêng 737, kăn ƀô̆, krâ pơlê ƀă rơpŏng ki châ tơnêi têa gum, hok tro ai tơdroăng rêh ối pá puât a tơring tơkăng kong Ea Súp. A mâu tíu pôu, hbru tơmeăm, Phŏ kăn xiâm hnê ngăn Kuô̆k hô̆i Trần Quang Phương pơtroh rơkong rơkâu tơniăn lĕm má môi troh kăn ƀô̆, lêng, khu kăn pơkuâ rêm râ ƀă kuăn pơlê tơkăng kong Ea Súp.

Pôa pơkâ thế khu Mố đô̆i gâk tơkăng kong kong pơlê Dak Lak tơrŭm krá pơla khu lêng ƀă kuăn pơlê, pơtối pêi pro tro mâu túa tơƀrê môi tiah đảng viên hôp ƀă chi ƀô̆ thôn tơkăng kong. “Rơnó Hơngui tơkăng kong hơtôu hiâm mơno kuăn pơlê”, “Kuăn rak mố đô̆i tơkăng kong”, “Mơnhông hvêa chêng o troh hngêi trung”.

Xuân a Dak Lak, teăng mâ kăn pơkuâ Đảng, Tơnêi têa, pôa Trần Quang Phương, Phŏ kăn xiâm hnê ngăn Kuô̆k hô̆i hiăng pôu, kơ-êng, mơhnhôk kăn ƀô̆ kong đoàn, đoàn viên, kŏng nhân pêi cheăng, malối cho mâu đoàn viên, ngế pêi cheăng ai tơdroăng rêh ối pá puât, tro xâu xía tung pêi cheăng, tamo, mâu ngế ki xơpá tung pơlê pơla. Phŏ kăn xiâm hnê ngăn Kuô̆k hô̆i rơtế ƀă khu kăn ki pêi dêi hnoăng cheăng hiăng diâp 300 kơxuô tơmeăm Têt ăm đoân viên, ngế pêi cheăng ai tơdroăng rêh ối pá puât.