Hâi lơ 21/1, kơ koan teăng mâ kơpong Tây Nguyên, Rơ’jíu Việt Nam tơrŭm ƀă Khu pơkuâ ngăn Lêng kong pơlê Dak Lak ƀă Kŏng ti Têa châu têa kơxăng Nam Tây Nguyên tơkŭm diâp hngêi ăm vâi pú lêng Xa Văn Thắng, pêi cheăng a kơ koan lêng tơring Krông Bông, kong pơlê Dak Lak.

Ngoh Xa Văn Thắng xơpá tung rêh ối, mung hngêi vâi ối, rak ngăn păn roăng nôu pâ hiăng krâ há ƀă péa ngế kuăn dế tro hơnăm lăm hriâm. Hngêi nếo mơjiâng pro mê rơdâ 100 met karê, tâi tâng kơxô̆ liăn pro 260 rơtuh liăn. Tung mê, VOV Tây Nguyên ƀă Kŏng ti têa kơxăng Nam Tây Nguyên kum 80 rơuh, ki u ối hiăng mung ing vâi pú tung lêng ƀă hngêi ra liăn kum mâu kơtiê pơlê pơla.

Hngêi nếo pro ăm mê kô ăm tung rôh Têt Lo hơnăm nếo cho tơmeăm ki kơnâ, ai pơxúa kân, tơdrăng phiu ro mơhnhôk ăm rơpŏng hngêi mơ-eăm tâ, gum ngoh Thắng hmiân tuăn pêi klêi hnoăng cheăng pơcháu. Tiô ăm ‘nâi kố cho hngêi ki má 5 ki VOV Tây Nguyên rơtế ƀă mâu tíu pêi cheăng ki ê veăng kum mơjiâng pro ăm kuăn pơlê Dak Lak tung hơnăm kố nah.

Tung tơdroăng kơdrâm phiu ro tơdah Têt lo hơnăm nếo Ất Tỵ 2025, rơpŏng nâ Ka Nhing (hdroâng kuăn ngo K’Ho) ối a tôh kơphô̆ Di Linh Thượng 2, pơlê kân Di Linh, kong pơlê Lâm Đồng, hiăng rơrêk drêng châ diâp ‘’Hngêi hơtô tuăn pâ’’. Toăng hngêi nếo châ mơjiâng ƀă tâi tâng kơxô̆ liăn 160 rơtuh liăn.

Tung mê, Khu pơkuâ vâi kơdrâi tơring Di Linh tŏng gum 50 rơtuh liăn ing Kơxô̆ liăn kơdĭng tŏng gum vâi kơdrâi, ki ê nếo xua rơpŏng mung. Jâ Ka Hương – Kăn phŏ hnê ngăn Khu tơrŭm Vâi kơdrâi tơring Di Linh tối ăm ‘nâi, rơtế ƀă diâp ‘’Hngêi hơtô tuăn pâ’’, roh kố ối ai hên tơdroăng tŏng gum têt ăm nâ o ai tơdroăng rêh ối pá puât.

 ‘’Khu pơkuâ vâi kơdrâi tơring Di Linh kơbông krếo tâi tâng mâu ngế ai hiêm mơno tŏng gum, ƀă mâu khu vâi kơdrâi rơtế tơdjuôm ivá tŏng gum...Pakĭng mê ngin xuân tơrŭm ƀă mâu khu tơrŭm cheăng a tung tơring môi tiah Kŏng ti On tơhrik vâ tơkŭm po lăm kơ-êng, diâp kơxuô tơmeăm ăm mâu nâ o kơtiê pá puât, ôh tá ai tíu hgiên vâ vâi ai iâ kơxuô tơmeăm tơ’nôm hơtô hiêm mơno phiu ro tơdah Têt. Tung hơnăm, drêng tơkŭm po tơdroăng ‘’Nôu roăng ngăn’’, ngin hiăng kơbông krếo châ mâu ngế ki tŏng gum, mâu khu tơrŭm cheăng, ngế krê vâ lăm kơ-êng ƀă diâp kơxuô tơmeăm ăm 45 vâi hdrêng kuăn tê, ôh tá ai tíu hgiên. Rêm khế, hmâ ai khu tơkŭm po lăm kơ-êng, pơlât ngăn ivá. Mơ’nui hơnăm mê troh lăm kơ-êng, diâp kơxuô tơmeăm vâ mâu vâi o ai tơ’nôm tơdroăng phiu ro tơdah Têt’’.