Rơpŏng nâ Ma Sỹ thôn Ka Rái 1, cheăm Ka Đơn, tơring Đơn Dương, kong pơlê Lâm Đồng, cho môi tung mâu rơpŏng ki châ xo tơdroăng tơmâng ngăn tŏng gum tơviah tung rôh Têt kố. Mê cho toăng hngêi nếo pro klêi lĕm krá, môi toăng hngêi krá kâk. Nâ ƀriê tối:

“Tâng ôh tá ai tơdroăng tŏng gum dêi khu kăn pơkuâ, ôh ti ‘nâi drêng lâi ah rơpŏng á nếo châ pro môi toăng hngêi ki lĕm vâ ối môi tiah kố. Mơnê Đảng, Tơnêi têa, mơnê vâi krâ nhŏng o ki rêh ối a chê, kơnôm bâi mê ngin ai hngêi nếo, ôh tá tơmiât xếo ‘na tíu tíu ối. Ngin ai ivá vâ mơ-eăm tung rêh ối, vâ mâu kuăn ‘nĕng ai môi tơdroăng cheăng tung la ngiâ bâ eăng hơniâp ro tâ”.

Xo tơmeăm ki kân kơnâ vâ tơdah Têt, nâ H’Jueut Niê a cheăm Čư̆ Pui, tơring Krông Bông, kong pơlê Dak Lak, xuân phiu ro. Nâ H’Juet tối, hiăng hên hơnăm kuăn tro pơreăng ôh tá chiâng pơlât prêi, rơpŏng ai 4 ngế ối tung hngêi ki hiăng tơ’nhiê, xi kơchoh, nôkố toăng hngêi nếo hiăng pro ivá kân vâ nâ mơeăm tơkâ luâ xơpá.

“Rơnó Hơngui kố, rơpŏng á ai hngêi ối ki nếo, ngin hơniâp ro khât. Kố cho ivá vâ on veăng má mơ-eăm pêi cheăng tung rêh ối, tơkâ luâ xơpá, hluăn kơtiê ƀă tơniăn tung tơdroăng rêh ối la ngiâ”.

Têt Lo hơnăm nếo hiăng vâ troh a chê. Rơtế ƀă tơdroăng ki rĕng pro klêi hngêi nếo diâp ăm mâu rơpŏng xơpá ‘na hngêi ối, lâp mâu kong pơlê kơpong Tây Nguyên, hiăng tơkŭm po mâu tơdroăng cheăng tŏng gum tơmeăm Têt. Lối rơtuh kơxuô tơmeăm Têt hiăng châ diâp troh a kŏng vâi krâ nhŏng o a mâu pơlê, cheăm. Maluâ ki kơnâ ‘na liăn ngân ôh tá hên la rêm kơxuô tơmeăm têt pơrá cho tơdroăng ki diâp pơtroh hiâm mơno mơngế, tơmâng ngăn, mơhnhôk. Nâ H’Loan Kƀuôr, ối a ƀuôn Ea B, cheăm Ea Tu, pơlê kong kơdrâm Ƀuôn Ma Thuột, xuân tối tơdroăng ki ro dêi tơná drêng tơdah xo mâu kơxuô tơmeăm Têt ki ai pơxúa kố:

“Hơnăm kố, rơpŏng á ai Têt, mơnê mâu khu tơrŭm, mơnê Đảng ƀă Tơnêi têa hiăng tơmâng tŏng gum ngin. Ngin mơnê khât ƀă hơniâp ro khât drêng tơdah xo mâu tơdroăng ki tŏng gum kố”.

Tây Nguyên dế nôkố dế rế hlo hên hĭn tâ mâu tơdroăng “Têt tơkŭm”. Mâu khu tơrŭm môi tiah Khu lo tŏng veăng, Măt trâ̆n Tơnêi têa, Khu tơrŭm pêi cheăng, rơtế ƀă mâu ngế krê, khu mơdró kâ pơrá tơdjuôm ivá vâ rêm ngế kuăn pơlê, maluâ cho hdroâng kuăn ngo, ngế kơtiê lơ rơpŏng xơpá, pơrá ai tŭm tơdroăng tơdah Têt.  Pôa Trương Công Thái, kăn phŏ hnê ngăn Vi ƀan kong pơlê Dak Lak, tối:

“Hmâ rêm rôh Têt troh rơnó Hơngui vêh Khu pơkuâ hnê ngăn Đảng, Hô̆i đong hnê ngăn kuăn pơlê, Vi ƀan hnê ngăn, Vi ƀan Măt trâ̆n Tơnêi têa Việt Nam kong pơlê hiăng hnê mơhno troh mâu khu tơrŭm Đảng xuân môi tiah rêm râ kăn pơkuâ tơring, cheăm rơtế ƀă mâu khu ki ai hiâm mơno hơ-ui, mâu khu mơdró kâ ki ai tíu pêi cheăng a kong pơlê pêi pro tơdroăng mơhnhôk vâ tơkŭm po Têt tơkŭm, gum vâi krâ nhŏng o kuăn pơlê tơdah Têt phâi hơtôu. Rơtế ƀă tơdroăng ki ‘nhiê tah hngêi xi kơchoh mê tơdroăng ki hbru tơmeăm ăm vâi krâ nhŏng o ai tơdroăng rêh ối pá puât cho tơdroăng ai pơxúa khât”.

Tung mâu hâi mơ’nui hơnăm kố, drêng Têt hiăng vâ troh a chê, mâu tơdroăng ‘na mâu rơpŏng kơtiê ai hngêi ối, ai tơmeăm Têt ôh ti xê pro hơniâp ro ăm vâi mê ối pro bâ eăng tơdroăng loi tung hiâm mơno kuăn mơngế, tung tơdroăng tơrŭm ƀă hiâm mơno ‘nâi hơ-ui. Mê cho tơmeăm hiâm mơno ki kơnía git, vâ rơnó Hơngui kố cho rơnó Hơngui dêi pâ nhuô̆m, gum tơdroăng loi tơngah.