Troăng prôk hngế, kơ’vĕng kơ’vŏng la ôh tá kâi mơdât ivá khŏm mơ-eăm dêi tơmối troh a Vi Rơ Ngheo tung mâu hâi apoăng hơnăm nếo. Ngế ki pro chiâng ivá rơdêi mê cho A Hiền. Kuăn pơlê khê̆n ro A Hiền cho ngế ki pro nếo thôn pơlê ki ton ƀă tá pôa Phạm Văn Thắng, phŏ kăn hnê ngăn Vi ƀan tơring Kon Plông xuân ô eăng ngế ki hiăng ai hnoăng kân pro chiâng môi tíu bâ eăng tung lơgât mơjiâng thôn pơlê nếo ƀă mơjiâng ôm hyô pơlê pơla dêi tơring:

“A Hiền châ khu kăn pơkuâ cheăm mơnhên tối khât ‘na ivá cheăng. Ngoh krếo tâi kuăn pơlê ƀă tối kuăn pơlê tơmâng. Mâu troăng pơkâ pêi dêi tơring, dêi cheăm ngoh ‘nâi nhên khât. A Hiền cho ngế ki kal, prôk ahdrối vâ tơbleăng mâu tơdroăng cheăng sap ing mơjiâng ‘mâi rơnêu tung pơlê tá troh mơjiâng khu tơrŭm mâu tơdroăng cheăng ngê̆ thuât, mơjiâng pro mâu homestay A Hiền đi đo cho ngế ki prôk ahdrối”.

Vâ mơjiâng chiâng thôn pơlê nếo sap ing mâu tơdroăng ki ton, kơtăn kố 5 hơnăm A Hiền pơlông djâ mâu kuăn pơlê tung pơlê Vi Rơ Ngheo ƀă tơdroăng “ ‘mêng pro” hngêi ki vâi dế ối. Pơkâ xêh mâu tơdroăng ki vâ pro klêi apoăng cho Krúa – Lĕm, A Hiền xo hmốu tung têa plông, xo mâu loăng ki hiăng hên hơnăm luâ kong mêi khía ối to lĭng, pro hdrê reăng rĭng ƀă hên ki ê pro chiâng tíu ối lĕm tro ‘na khôi túa dêi mơngế Rơteăng. Rế pêi rế pơlông djâ, mơhnhôk troh tui lui A Hiền xuân pêi klêi tơdroăng tơná vâ pêi tâi pơlê môi hiâm mơno, tơdjuôm ivá tŏng gum dêi rơpó pro nếo a pơlê ki ton:

“Apoăng vâi krâ nhŏng ‘mêng rơnêu hngêi ối dêi vâi klêi mê kơpuih văng xut xêa ăm krúa. Tơdjâk troh liăn ngân vâi krâ nhŏng o akố tơdroăng cheăng kâ xơpá la ki hên cho xúa ing tơdroăng ki vâi mơhá ăm rak ngăn kong. Môi tiah rơpŏng á châ kâ liăn ing kơpong muih 4810 cho 30 ha tung môi hơnăm châ xo 30-35 rơtuh liăn mê xo liăn ki mê vâ hrê pro mâu hngêi trăng dêi tơná”.

Ƀă tuăn tơmiât hngêi ối krúa lĕm la tâng ôh tá ai liăn pêi lo mê tơdroăng rêh ối dêi pơlê pơla tung pơlê kô trâm kơklêa kơtiê, ing túa pơkâ, troăng tơmiât dêi khu kăn pơkuâ cheăm Đăk Tăng, tơring Kon Plông, A Hiền môi tuăn ƀă vâi krâ nhŏng o pro ôm hyô pơlê pơla.

Vâ tơmối ôm hyô hâk vâ troh a pơlê kân Măng Deang, tơring Kon Plông prôk châ 40km troăng ngo kơ’vĕng kơ’vŏng troh a Vi Rơ Ngheo, A Hiền prôk ahdrối tung tơdroăng ki mơnhông tơdroăng ki ai hlâu túa lĕm tro khôi hmâ dêi mơngế Rơteăng vâ pro ivá tơ’mot tơmối ƀă troăng prôk troh tơdroăng ki rơkê tung cheăng ôm hyô. Ing tơdroăng pơkâ pêi nhên, kuăn pơlê tung pơlê Vi Rơ Ngheo pro Kuât; pro hngêi trá; mơjiâng khu ki tŏn chêng koăng, kơhnhon xuăng; rak vế mâu tơdroăng mơdĭng khôi hmâ; mơdâ pêt lối rơpâu kơ’lo hdrê reăng rĭng kong ƀă kơ’lo pêt reăng rĭng hngêi vâ pro ăm gá lĕm tơnêi tơníu; pong ki pêt rak, vế 5 to ngo reăng rĭng kong, đỗ quyên, sim ƀă hên ki ê.

Hneăng apoăng mâu rơpŏng ai tŭm liăn ngân hiăng mơjiâng pro châ 5 homestay vâ tơmối ôm hyô ối pơtê a kong măng. Drêng ai liăn châ xo ing pro ôm hyô, A Hiền xúa tơdrêng kơxô̆ liăn ki mê ăm vâi krâ nhŏng o pơlê Vi Rơ Ngheo lăm a mâu kong pơlê peăng kơnhŏng vâ hriâm ƀối tơ’nôm ‘na túa ki pro ôm hyô pơlê pơla. Ngoh A Nhoa, kuăn pơlê tung pơlê ăm ‘nâi, ôm hyô hiăng gum tơdroăng rêh ối kâ dêi vâi krâ nhŏng o pơhlêh khât ƀă hên tơdroăng ki hơniâp ro:

“Pro ôm hyô mê gá hiăng pro ăm pơlê pơhlêh hên khât. Pơlê ngăn gá lĕm tâ, kuăn pơlê ro tâ hlối pêi lo liăn. Tơmối ôm hyô xuân ro há, vâi kâ, vâi ôu môi tiah pin, hâk vâ lăm a têa plông rup ká, vâ lăm tung kong mê vâi ối vâ lăm a klâng poê báu. Vâ pro ôm hyô tơƀrê mê á ƀă vâi krâ nhŏng o tung pơlê xuân mơ-eăm pơhlêh, pế pơchên kế kâ ăm kơhiâm, tŏn chêng koăng, kơhnhon xuăng athế lĕm, athế ro, athế ‘nâi rơnuâ ăm tơdroăng cheăng tơdjuôm dêi pơlê ki vâ tơmối”.

Tung mâu hâi apoăng hơnăm 2025, pơlê ôm hyô pơlê pơla Vi Rơ Ngheo, cheăm Đăk Tăng, tơring Kon Plông, kong pơlê Kon Tum hiăng tơdah hên tơmối ôm hyô. Ngoh A Hiền rế xúa măng pơlê pơla pơkuâ tơdroăng tơdah xo, axoăng tíu kâ, tíu ối ăm tơmối ôm hyô rế hâk nâ tối túa tơmiât dêi tơná ƀă vâi krâ nhŏng tung pơlê tung mơjiâng thôn pơlê nếo xuân môi tiah mơdêk rơdêi pro ôm hyô pơlê pơla:

“Rôh Têt tơmối troh akố hên. Hơnăm kố athế pro hên tâ hơnăm nah. Vâi krâ nhŏng o tơrŭm ƀă dêi rơpó pêi, cheăng tung la ngiâ ôh ti xê to pơlê mê ối athế rak vế kong, reăng, ngo ăm vâi lăm troh hêi. Ôm hyô mê xuân ối tro khôi túa lĕm tro dêi tơná, tro khôi hmâ dêi tơná, tro mơngế Rơteăng xiâm mê tơmối ôm hyô ối hngế la vâi xuân ối hâk vâ lăm troh ăm vâi krâ nhŏng châ liăn ngân”.

Ing tơdroăng ki apoăng A Hiền, pơlê Vi Rơ Ngheo, cheăm Đăk Tăng, môi kơpong pơlê kơtiê ai to ngo ngối la nôkố hiăng chiâng túa ki mơnhông tung mơjiâng thôn pơlê nếo dêi tơring Kon Plông, kong pơlê Kon Tum. Xuân ing tơdroăng ki môi hiâm mơno dêi kuăn pơlê tung pơlê ƀă ivá khŏm mơ-eăm dêi ngoh A Hiền tung rak vế, mơnhông mâu tơdroăng kơnía khôi hmâ, mơnhông mâu tơdroăng ai hlâu sap ing mâu tơmeăm ki hiăng ton nah mê nôkố Vi Rơ Ngheo ối cho tíu troh ki ro tung lơgât ôm hyô Kon Tum.

Tơdroăng dêi ngoh A Hiền ƀă pơlê Vi Rơ Ngheo xuân ăm hlo, khôi túa lĕm tro khôi hmâ ôh ti xê to kế tơmeăm kơnía kal rak vế, mê tâng ‘nâi mơnhông ối pro pơxúa ivá rơdêi tung mơnhông cheăng kâ ƀă pơlê pơla.