Tung tơdroăng hơtôu lĕm dêi mâu hâi mơ’nui hơnăm Giáp Thìn, pôa Trần Thanh Mẫn, Kăn xiâm hnê ngăn Kuô̆k hô̆i hiăng tơbleăng ăm Kăn xiâm hnê ngăn Kuô̆k hô̆i, ngế cheăng tung Vi ƀan pơkuâ Kuô̆k hô̆i mâu hneăng hdrối nah ‘na mâu tơdroăng ki tơƀrê dêi tơnêi têa pin tối tơdjuôm ƀă Kuô̆k hô̆i hiăng pêi châ tơƀrê tung hơnăm hdrối. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Kuô̆k hô̆i hneăng 15 châ pơtó, mơnhông ki tơƀrê, ƀai hriâm ki rơkê dêi mâu hneăng hdrối vâ pơtối pêi pro klêi tơdroăng cheăng kơ koan khu kăn xiâm má môi dêi Kuăn pơlê, kơ koan pôu râng tơnêi têa má môi.

“Tung mâu rôh mơnhông dêi Kuô̆k hô̆i, ôh ti xê to tơdroăng ki mơ-eăm nôkố, mê ối cho tơdroăng ki pơtối mâu túa ki kơnía lĕm ki mâu rơxông mâu kăn pơkuâ hneăng hdrối, kăn ƀô̆ kong chưk, viên chưk, ngế pêi cheăng ing mâu hneăng hiăng mơjiâng ƀă tơbêng. Mâu kăn, maluâ hiăng pơtê, la ƀă tuăn ngoâ rơkê, ivá khŏm mơ-eăm ƀă ki rơkê plĕng dêi tơná, đi đo rơtế prôk, veăng gum ƀă veăng tơpui tối vâ Kuô̆k hô̆i rế hía rế rơdêi tâ; pơkuâ tơdjâ, pơtối tơdroăng ki rơkê plĕng, vâ ‘măn chôu tơdroăng ki lĕm bâ dêi rơxông hneăng hdrối ăm mâu rơxông nôkố tiô ƀối”.

Hơnăm 2025 ai pơxúa kal khât, ai hên hâi tơbâ ki kân dêi tơnêi têa, cho hơnăm tâi tâng Đảng, tâi tâng kuăn pơlê, tâi tâng khu lêng khŏm mơ-eăm hên má môi vâ mơdêk ivá, mơnhông tơƀrê, pêi pro ƀlêi chiâng tơdroăng Pơkâ Hneăng hôp 13 dêi Đảng. Malối, Kuô̆k hô̆i ối 3 hneăng hôp ƀă hên tơdroăng cheăng mơjiâng luât ki ê. Tiô tối hdrối kô tơbleăng 34 luât ƀă ‘mâi pơhlêh, ‘mot tơ’nôm hên luât ki ê vâ gum ăm tơdroăng xing xoăng khu tơrŭm, kơ koan cheăng tơnêi têa.

Tiah mê, klêi kơ’nâi pơtê Têt Lo hơnăm nếo, Kuô̆k hô̆i kô hôp ôh tá tối hdrối a tơdế khế 2 vâ pro tơdâng tơ’mô troăng hơlâ tŏng gum tơbleăng pêi tơƀrê troăng pơkâ xing xoăng khu tơrŭm kơ koan tơkŭm pêi cheăng xêt, tơƀrê, rơdêi sap ing tơnêi têa troh kong pơlê.

Xua mê, ƀă tơdroăng ki athế pơhlêh rơdêi ăm tơdroăng cheăng Kuô̆k hô̆i, malối cho hơnăm 2025, vâ hbrâ ăm Hneăng hôp Đảng rêm râ vâ pêi pro troh Hneăng hôp Đảng lâp tơnêi têa xuân môi tiah pôk kăn Kuô̆k hô̆i hneăng 16 ƀă Hô̆i đong hnê ngăn kuăn pơlê rêm râ pơla hơnăm 2026 – 2031, pôa Trần Thanh Mẫn, Kăn xiâm hnê ngăn Kuô̆k hô̆i rơhêng vâ mâu kăn xiâm hnê ngăn Kuô̆k hô̆i, Phŏ Kăn xiâm hnê ngăn Kuô̆k hô̆i, mâu ngế cheăng tung Vi ƀan pơkuâ Kuô̆k hô̆i, kăn ƀô̆, kong chưk a Hô̆i đong hdroâng kuăn ngo, mâu Vi ƀan dêi Kuô̆k hô̆i hneăng hdrối pơtối môi tuăn hên tâ nếo tung la ngiâ.

Kăn xiâm hnê ngăn Kuô̆k hô̆i tối nhên, Kuô̆k hô̆i hiăng hbrâ rơnáu tơmâng ƀă đi đo pơhlêh nếo vâ tơdroăng cheăng mơjiâng luât, tơdroăng ki séa ngăn arak luât, pơkâ mâu tơdroăng ki kal dêi tơnêi têa rế hía rế lĕm tro tâ.

Tơpui a rôh trâm mâ, pôa Uông Chu Lưu, Phŏ Kăn xiâm hnê ngăn Kuô̆k hô̆i hneăng hdrối tối phiu ro, hâk tơngăm khât drêng hlo tơdroăng mơnhông tŭm têk dêi tơnêi têa tung hơnăm 2024; tối nhên, tung tơdroăng tơƀrê tơdjuôm mê dêi tơnêi têa ai hnoăng veăng gum kal khât dêi Kuô̆k hô̆i. Maluâ hên tơdroăng cheăng pêi ki kân, ai hên tơdroăng ki kal pêi tơdrêng, tơdroăng ki nếo, pá la Kuô̆k hô̆i hiăng tơrŭm, pơhlêh nếo, tơkŭm mâu tuăn ngoâ rơkê ƀă hâi khế, pêi klêi mâu tơdroăng cheăng dêi tơná tung mâu kơvâ mơjiâng luât, séa ngăn arak luât ƀă pơkâ mâu tơdroăng ki kal dêi tơnêi têa.

Hơnăm 2025 tơnêi têa pin mot tung chal ki nếo, chal ki mơ-eăm dêi tơná dêi hdroâng mơngế ƀă hên mâu rôh ki tơ’lêi hlâu ƀă pơloăng mơnúa, ƀă hnoăng cho kơ koan mơjiâng luât, kơ koan khu kăn xiâm kân má môi dêi kuăn pơlê, kơ koan ai ai hnoăng pơkuâ Tơnêi têa kân má môi, pôa Uông Chu Lưu, Phŏ Kăn xiâm hnê ngăn Kuô̆k hô̆i hneăng hdrối loi Kuô̆k hô̆i kô pêi pro klêi tơdroăng ki khên tơnôu dêi tơná; tơdrêng amê hlối tối nhên, xuân ối đi đo tơmâng ngăn ƀă hbrâ rơnáu veăng gum môi iâ ivá dêi tơná tung hnoăng mơnhông tơdjuôm dêi tơnêi ƀă dêi Kuô̆k hô̆i.