VOV4.Xơ Đăng - Vâ kum tung tơdroăng prôk lăm dêi kuăn pơlê tung roh Têt Lo hơnăm nếo 2022 la ngiâ, Kŏng ti troăng rơxế lơtreng Việt Nam hiăng ƀă dế po tê mâu vĕ rơxế lơtreng pơto tơmối Thống Nhất troăng Hà Nội – Sài Gòn, troăng Đà Nẵng – Sài Gòn. Ki rơhêng vâ tối, sap hâi lơ 4/1/2022 Kơvâ troăng rơxế lơtreng pơtối po tê vĕ mâu rơxế lơtreng pơto tơmối troăng ing Pơlê kong kân Hồ Chí Minh lăm troh a Phan Thiết, Nha Trang, Quy Nhơn, Quảng Ngãi ƀă tơrôu.

Mâu rơxế lơtreng kố xuân pêi pro troăng hơlâ  kơjo môi tiah: Kơdroh yă vĕ sap ing 10% troh 15%, châ ăm kâ tê kơtê tung rơxế lơtreng, a mâu hngêi rơkôm rơxế, tơmối châ tăng ăm kơbong tơkôm lơ kơpong tơkôm rơxế lơtreng krê ƀă mơhno troăng prôk krê drêng to, chu rơxế lơtreng ƀă hía hé.

Vâ tơniăn ăm kuăn pơlê to rơxế lơtreng, kơvâ Troăng rơxế lơtreng pơtối rak mâu troăng hbrâ mơdât pơreăng COVID-19; thăm mơgrúa kong prâi, xôh pơkeăng kơdê pơreăng; ‘măn têa xếo kŏng kơdê pơreăng, xôh pơkeăng kơdê pơreăng; pêi pro tơdroăng khăm ngăn ki tô tung châ ăm tơmối drêng mot tung hngêi tơkôm rơxế ƀă hía hé.

A Sa Ly tơplôu ƀă tơbleăng