VOV4.Sêdang - A rôh hôp má 20 dêi Khu hnê mơhno cheăng Tơnêi têa ‘na hbrâ mơdât kâ kơluâ po a hâi lơ 5/8, pôa Phan Đình Trạc, ngế cheăng tung Khu xiâm pơkuâ tơdroăng kal kí, kăn pơkuâ ngăn Tíu xiâm Đảng, kăn pơkuâ cheăng Tơnêi têa ăm ‘nâi, sap ing apoăng hơnăm troh nôkố, râ Đảng, Vi ƀan séa ngăn rêm râ hiăng pêi pro pơxâu hôu ƀă lối 70 ngế khu tơrŭm Đảng, lối 8 ngế đảng viên pro xôi, tung mê ai vâ chê 180 ngế tro pơxâu xua kâ kơluâ liăn ngân, mơhnŏng pro xôi ƀă lối 20 ngế đảng viên tro pơxâu xua pro xôi ‘na chêh tối kế tơmeăm, pêi lo liăn.

Pôa Phan Đình Trác, kăn pơkuâ xiâm Tơnêi têa pơchuât mơ-éa tơbleăng

Klêi kơ’nâi séa ngăn tung khu ƀă pơkâ tơleăng tơdroăng ki pơsăm tối, kơvâ Séa ngăn hiăng châ ‘nâi, pơxâu 20 rôh pro xôi, 35 ngế kâ kơluâ ƀă ai tơdjâk troh mâu rôh kâ kơluâ. Malối, hnoăng cheăng séa ngăn, pơkâ tơleăng mâu rôh kâ kơluâ, liăn ngân châ tơkŭm pơkuâ, hnê mơhno kơtăng, pơsăm tối nếo hên tơdroăng xôi, hên ngế ki tro, tung mê ai hên ngế cho kăn ƀô̆ râ xiâm, pêi pro tro tơdroăng pơkâ thế dêi pôa Nguyễn Phú Trọng, kăn xiâm pơkuâ ngăn Đảng, kăn hnê mơhno cho “ôh tá ai kơpong ki lâi mơdât, maluâ ngế ki lâi xuân tro pơxâu tâng xôi”.

Katarina Nga tơplôu ƀă tơbleăng