VOV4.Sêdang - Klêi kơ’nâi veăng kum lối tâ̆n kơchâi, plâi, pôm ăm vâi krâ nhŏng o kơpong ki ai pơreăng a mâu kong pơlê peăng Hdroh, hên vâi krâ nhŏng o kong pơlê Dak Nông pơtối mơdâ mâu hdrê kơchâi, plâi, pôm vâ kum kuăn pơlê kơpong ki ai pơreăng.

Klêi hbru ăm 2 tâ̆n trŏng ‘nhŭng ƀă hên kơchâi, plâi, pôm, rơpŏng hngêi ngoh Trịnh Văn Khởi, ối a thôn Thuận Hải, cheăm Thuận Hạnh, tơring Dak Song, kong pơlê Dak Nông pơtối mơdâ pêt lối 7 sào mâu kơchâi hơpê, plâi pôm tŭm túa vâ kum ăm mâu ki dế trâm pá rơtế ƀă kuăn pơlê a kơpong tâ pơreăng. Ngoh Khởi ăm ‘nâi, mơhế tơdroăng cheăng tung rơpŏng hngêi trâm hên xơpá xua tơdjâk pơreăng, la drêng kố kuăn pơlê a hên tíu ối trâm hên xơpá mê a vâ rơtế veăng kum vâi tâ tơtô iâ tung hiâm mơno ƀă mơ-eăm rĕng kâi tơkâ luâ xahpá xua pơreăng.

“Rơpŏng hngêi dế pơchoh mâu tơnêi klê pê pêt mâu prá kơchâi plâi pôm, hơpê lŭm vâ veăng kum ăm kuăn pơlê a mâu tíu ki xơpá. Tâng pơreăng ối tâ tú ton á kô mơhnhôk vâi nhŏng o veăng mơdâ pêt nếo, ah tâng ai mâu tíu ki lâi tơdjâk pơreăng ó pin kô veăng kum ăm kuăn pơlê kơchâi kâ”.

Môi tiah jâ Nguyễn Thị Năm, ối a cheăm Quảng Tâm, tơring Tuy Đức klêi mơhnhôk lối 20 tâ̆n kơchâi - plâi - pôm pơtroh ăm mâu rơpŏng a mâu kong pơlê ki dế tâ pơreăng. Jâ mung tơnêi mơdâ pêt 1 ha kơchâi drêh vâ ai tơ’nôm kơchâi kum ăm kuăn pơlê ki rêh ối a kơpong dế tâ pơreăng.

“Nôkố hdrê mâu kơchâi pôm rế vâ tâi, xua mê a dế mung tơnêi a pa kĭng chiâk dêi rơpŏng hngêi, tơdjêp ƀă Khu vâi kơdrâi tơbleăng tơdrêng pêt kơchâi drêh, pêt prá cô-ve vâ ai kơchâi pơtroh ăm rôh pơtối. A tơmiât mâu tơdroăng pêi pro mê kô veăng kum iâ tơdroăng rêh ối dêi kuăn pơlê a kơpong ki tâ pơreăng xuân môi tiah mâu kŏng nhân ki kơtiê’’.

A cheăm kơpong Dak Som, tơring Dak Glong, cho tíu ai vâ chê 70% hdroâng kuăn ngo la drêng vâi krâ nhŏng o Pơlê kong kân Hồ Chí Minh trâm pá ối kơtăn pơlê pơla, rêm ngế hiăng veăng kum ăm mâu kơchâi, plâi, pôm pơtroh ăm mâu tíu dế ối klâ kơtăn. Pôa Bùi Ngọc Tân, Kăn hnê ngăn Vi ƀan cheăm Dak Som ăm ‘nâi, troh nôkố, kuăn pơlê tung cheăm hiăng ‘nâi pleăng dêi tơmeăm châ lối 5 tâ̆n kơchâi, plâi, pôm pơtroh ăm mâu kuăn pơlê a kơpong tâ pơreăng Pơlê kong kân Hồ Chí Minh. Hên mâu rơpŏng hngêi hiăng pêt tơ’nôm mâu hdrê kơchâi vâ pơtối veăng kum ăm kuăn pơlê ối a kơpong tâ pơreăng.

“Dak Som cho cheăm kơtiê xơpá má môi, ki hên to mâu hdroâng kuăn ngo, mâu ối kơtiê, vâ rơpŏng vâ chê kơtiê. Tung mâu hơnăm hdrối, kuăn pơlê tung cheăm đi đo châ xo tơmeăm ki mâu nhŏng o hbru ăm môi tiah hlá mơ-éa, loăng chêh, hmân ếo, phái, têa măm, po dêi mâu ngế ki ai tuăn hơ-ui, xuân môi tiah mâu khu tơrŭm cheăng, mâu ngế dêi Pơlê kong kân Hồ Chí Minh. Drêng Pơlê kong kân Hồ Chí Minh dế trâm pá tung pơla pơreăng  COVID-19 tâ tú mâu rơpŏng hngêi, mâu ngế mơhế ối xơpá la ƀă tuăn pâ, tơdroăng hơ-ui pâ, kum dêi rơpó, hbru ăm hnông priât, mâu kơchâi, plâi, pôm vâ ai mâu rơxế chơ chiân tơmeăm ăm Pơlê kong kân Hồ Chí Minh’’.  

Hrĭng tâ̆n tơmeăm pêi lo ing chiâk deăng, mâu tơmeăm ki nhŏng o kum  ăm kuăn pơlê ki dế tơdjâk pơreăng tâ tú hiăng chơ chiân, rơtế ƀă mâu kơchâi drêh pơtối châ pêt cho hiâm mơno pâ khât dêi vâi krâ nhŏng o mâu hdroâng mơngế, hdroâng kuăn ngo tung kong pơlê Dak Nông kum ăm mâu kong pơlê peăng Hdroh tơnêi têa ƀă púi vâ pơreăng rĕng kâi châ mơdât, vâ tơdroăng rêh ối rĕng châ tơniăn môi tiah hdrối.

Tuấn Anh chêh

Gương tơplôu ƀă tơbleăng