VOV4.Sêdang - Kơmăng lơ 6/8, ing pơkuâ dêi Pôa Vương Đình Huệ, Kăn xiâm hnê ngăn Kuô̆k hô̆i, Vi ƀan pơkuâ tơdroăng cheăng Kuô̆k hô̆i hôp thâ vâ veăng tơpui ‘na tơdroăng pơkâ dêi Chin phuh ‘na pêi pro mâu tơdroăng ki thâ hbrâ, mơdât pơreăng COVID 19 tiô pơkâ kơxô̆ 30 dêi Kuô̆k hô̆i châ tơbleăng a Hneăng hôp má môi, Kuô̆k hô̆i hneăng má XV. Ki nhên, ăm phêp mâu Khu xiâm ngăn pơkeăng ƀă khăm pơlât, cheăng lêng, kŏng an, Vi ƀan mâu kong pơlê pơkâ mơjiâng mâu tíu tơdah, pơlât mơngế tro tâ COVID 19 tơdrêng amê cho mơ-éa phêp pêi cheăng ƀă pơkâ tơ’nôm hâi khế xêt khât dêi tơdroăng xiâm kố, troh tâi hơnăm 2022 ƀă bu pêi pro drêng thâ hbrâ mơdât pơreăng COVID 19 tiô tơdroăng hbrâ mơdât pơreăng ƀă tơdroăng nôkố a rêm kong pơlê.

Kuô̆k hô̆i hôp tơdrêng a kơmăng lơ 6/8

Xông tơpui a roh hôp, pôa Vương Đình Huệ, Kăn xiâm hnê ngăn Kuô̆k hô̆i tối, tơdroăng tơbleăng ăm pêi pro pơkâ kố cho kal khât, thâ tung pơla pơreăng xông tâ tú rế hiá rế ó, ôh tá ‘nâi tối hdrối, xông tâ tú hên kong pơlê, pơlê kong kơdrâm ối tung Tơnêi têa, ki má lối cho mâu kong pơlê peăng hdroh tơnêi têa.

A Sa Ly tơplôu ƀă tơbleăng