VOV4.Sêdang - Pêi pro tơƀrê tiô tơdroăng krếo thế dêi pôa Nguyễn Phú Trọng, kăn xiâm pơkuâ hnê ngăn cheăng Đảng ƀă tơdroăng ki hnê mơhno dêi kăn pơkuâ Đảng, Tơnêi têa, Vi ƀan xiâm Măt trâ̆n Tơnêi têa Việt Nam nếo rĕng tŏng kum 1,7 rơtuh hnoăng kế kâ tơ’mô ƀă kơxô̆ liăn cho 51 rơtal liăn sap ing kơxô̆ liăn tơdah xo tŏng kum hbrâ mơdât pơreăng COVID-19 vâ veăng kum rơtế ƀă mâu kong pơlê, pơlê kong kân peăng Hdroh dế pêi pro klâ krê pơlê pơla tiô pơkâ 16 dêi Ngế pro xiâm hnê ngăn Chin phuh.

Kơxô̆ liăn kố kô kum rêm hnoăng kế kâ tơ’mô dâng 30 rơpâu liăn ăm 17 to kong pơlê, pơlê kong kân ki ai inâi a kơ’nâi kố: Đồng Nai, Cần Thơ, Bình Phước, Tây Ninh, Bà Rịa - Vũng Tàu, Tiền Giang, Long An, Vĩnh Long, Đồng Tháp, Bến Tre, Hậu Giang, An Giang, Bạc Liêu, Sóc Trăng, Trà Vinh, Cà Mau, Kiên Giang. Mâu hnoăng kế kâ kố kô châ mâu kong pơlê, pơlê kong kân tŏng kum ăm mâu ngế ki pá puât, trâm xơpá xua klâ ối krê, pơlê pơla ki ôh tá ối tung mâu ngế ki ai troăng hơlâ châ tŏng kum.