VOV4.Sêdang - Drêng ai pơreăng COVID 19 xông tâ tú ó, hâi lơ 29/7, ing kơxô̆ liăn tơdah châ, Vi ƀan xiâm Măt trâ̆n Tơnêi têa Việt Nam hiăng xing xoăng 46 rơtal liăn tŏng kum tơdroăng hbrâ mơdât pơreăng ƀă Liăn rôe vaccine hbrâ mơdât COVID 19. Ki nhên, Vi ƀan xiâm Măt trâ̆n Tơnêi têa Việt Nam xing xoăng 23 rơtal liăn ing kơxô̆ liăn tŏng kum dêi Grup pơkuâ Panko troh Vi ƀan Măt trâ̆n Tơnêi têa Việt Nam Pơlê kong kân Hồ Chí Minh vâ tŏng kum tơdroăng hbrâ mơdât pơreăng COVID 19 tung Pơlê kong kân Hồ Chí Minh; xing xoăng troh Hngêi pơkeăng pơlât vâi hdrêng Tơnêi têa kơxô̆ liăn 1,5 rơtal liăn ƀă Tíu xiâm khăm pơlât pơlê kong kơdrâm Thuận An, kong pơlê Bình Dương kơxô̆ liăn 1,5 rơtal liăn vâ mâu tíu khăm pơlât rôe tơmeăm hbrâ mơdât pơreăng ăm mâu thái pơkeăng, ƀok thái pơkeăng veăng pơlât mâu ngế tro tâ COVID 19.

Tơdrêng amê xing xoăng kơxô̆ liăn 20 rơtal liăn troh Khu râng liăn rôe vaccine hbrâ mơdât COVID 19 xua Khu xiâm pơkuâ liăn ngân pơkuâ. Troh nôkố, kơxô̆ liăn Vi ƀan xiâm Măt trâ̆n Tơnêi têa Việt Nam pơtroh Khu râng liăn rôe vaccine hbrâ mơdât COVID 19 tâk troh 1 rơpâu 43 rơtal liăn.

A Sa Ly tơplôu ƀă tơbleăng