VOV4.Sêdang - Pơtối mâu tơdroăng cheăng pakĭng rôh lăm pôu păng ‘nâng tơnêi têa Kŏng hoa Yân chuh Nhân yân Lếo dêi pôa Nguyễn Xuân Phúc, kăn xiâm hnê ngăn tơnêi têa, kơxê lơ 9/8/2021, Đăi tươ̆ng Phan Văn Giang, ngế xiâm pơkuâ ngăn lêng ai rôh tơpui tơno ƀă Đăi tươ̆ng Chansamone Chanyalath, Ngế pro xiâm phŏ hnê ngăn, ngế xiâm pơkuâ ngăn lêng tơnêi têa Kŏng hoa Yân chuh Nhân yân Lếo.

A rôh tơpui, péa pâ tối nhên kố cho rôh vâ pơtối tơpui tơno, mơdêk tơrŭm cheăng lêng pơla péa pâ tung pơla ai pơreăng COVID-19 dế tâ tú ôh tá tơniăn; tung mê tối nhên maluâ tung mâu tơdroăng ki lâi, Khu lêng péa tơnêi têa kô đi rơtế ƀă dêi rơpó tơkâ luâ mâu tơdroăng pơloăng mơnúa, rak vế krá tơniăn mâu tơdroăng kăch măng hiăng châ mâu rơxông pâ, mâu ngoh pêi pro.

Tung la ngiâ ah, Khu xiâm pơkuâ ngăn lêng péa tơnêi têa kal tơkŭm séa ngăn, hriăn plĕng mâu tơdroăng tối tơbleăng tơrŭm cheăng tơtro, ƀă khŏm mơ-eăm pôi tá ăm tơdroăng tơrŭm cheăng ‘na lêng péa tơnêi têa tro tơdjâk xua pơreăng, tung mê mơdêk hnoăng cheăng rak vế tíu tơkăng kong hbrâ mơdât tơdroăng ki prôk lăm tơkâ luâ troăng tơkăng kong ôh tá tro luât.

Katarina Nga tơplôu ƀă tơbleăng