VOV4.Sêdang - Kơxo lơ 23/8, Kăn teăng mâ pôu râng tâi tâng hnoăng kong têa Ba Lan a Việt Nam cho pôa Vojciech Gerwel hiăng teăng mâ Chin phuh Ba Lan pơcháu ăm Khu xiâm ngăn pơkeăng ƀă khăm pơlât 501.600 kung kếo vaccine hbrâ mơdât COVID-19 cho pơkeăng AstraZeneca. Kơxô̆ vaccine AstraZeneca xua Chin phuh Ba Lan diâp ăm Việt Nam vâ thăm hbrâ mơdât pơreăng COVID-19 hiăng vêh troh a tơraih tơƀai lâp plâi tơnêi Nội Bài kơxê lơ 21.

Pôa Trương Quốc Cường, Ngế xiâm phŏ pơkuâ ngăn pơkeăng ƀă khăm pơlât tơnêi têa ƀă pôa Tô Anh Dũng, Ngế xiâm phŏ tơpui kâ hiăng tơdah kơxô̆ vaccine xua Chin phuh Ba Lan tŏng kum. Pơtối mê, pôa Trương Quốc Cường tối mơnê hên mâu tơdroăng tuăn pâ dêi Kăn teăng mâ tối krê ƀă Chin phuh Ba Lan tối tơdjuôm ăm Chin phuh, kuăn pơlê Việt Nam, xuân môi tiah mâu ngế Việt Nam rêh ối pêi cheăng a Ba Lan.

Tơdroăng tŏng kum kố kum ăm Việt Nam ai tơ’nôm pơkeăng hbrâ mơdât pơreăng ƀă thăm rế hâk git dêi pó drêng péa tơnêi têa hiăng mot 71 hơnăm tơrŭm cheăng tơpui kâ.

A Sa Ly tơplôu ƀă tơbleăng