VOV4.Sêdang - Tơ’nôm péa kơthung vaccine AstraZeneca ƀă lối 1,4 rơtuh kung kếo pơkeăng vaccine hiăng troh a Pơlê kong kân Hồ Chí Minh. Kố cho roh pơcháu vaccine má 10 ƀă 11 ối tung tơkêa kok rôe hdrối 30 rơtuh kung kếo pơkeăng pơla AstraZeneca ƀă Kŏng ti tơlo liăn Vaccine Việt Nam (VNVC). Tơkêa rôe kố hiăng djâ pơtroh ăm Việt Nam vâ chê 8,2 rơtuh kung kếo pơkeăng tung tâi tâng kơxô̆ 17 rơtuh kung kếo vaccine COVID-19 dêi AstraZeneca xing xoăng ăm ing VNVC, Troăng pêi COVAX ƀă tŏng kum pơla Chin phuh mâu kong têa. Vaccine dêi AstraZeneca nôkố châ dâng 64% kơxô̆ mơjiâng vaccine COVID-19 tung lâp tơnêi têa.

Pakĭng tơdroăng pơcháu ăm ôh tá vâ xo rơkâ tâi tâng 30 rơtuh kung kếo vaccine kố ăm Khu xiâm pơkuâ ngăn pơkeăng ƀă khăm pơlât, VNVC xuân tơkêa tŏng kum, chêl xêh tâi tâng kơxô̆ liăn ki ê nếo tung tơdroăng rôe, tơdah, pơcháu vaccine, tiô tối hdrối troh hrĭng rơtal liăn.

A Sa Ly tơplôu ƀă tơbleăng