VOV4.Sêdang - Kơxê lơ 30/7, a pơlê kong kơdrâm Ƀuôn Ma Thuột, teăng mâ khu râ kăn pơkuâ Kơ koan Rơ’jíu Việt Nam kơpong Tây Nguyên (VOV Tây Nguyên) tơkŭm po diâp ăm 2.200 hmân ếo mơdât pơreăng, 500 mâ nhĕng ki mơdât têa kơhêa kơtĕng ƀă hên tơmeăm ki kal xúa rêm hâi ăm Tíu xiâm mơdât pơreăng kong pơlê Dak lak (CDC Dak Lak), vâ tŏng kum khu ƀok thái pơkeăng Dak Lak ai tơ’nôm tơmeăm hbrâ mơdât pơreăng COVID 19. Pôa Ngô Quang Khương – Kăn phŏ pơkuâ VOV Tây Nguyên tối ăm ‘nâi ƀă pói vâ rơtế khu ƀok thái pơkeăng kong pơlê Dak Lak tơdjuôm ivá hbrâ mơdât COVID 19, kơ koan hiăng mơhnhôk mâu khu pú hên, ngế krê veăng tơlo rôe tơmeăm khăm pơlât môi tiah: Hmân ếo mơdât pơreăng, nhĕng ki mơdât têa kơhêa tơpĕng ƀă mâu tơmeăm ki kal xúa rêm hâi.

VOV Tây Nguyên diâp tơmeăm khăm pơlât kơnâ vâ chê 170 rơtuh ăm CDC Dak Lak 

Klêi 3 hâi kơbông krếo, hiăng ai 10 khu tơrŭm, ngế krê veăng tơlo 2.200 hmân ếo mơdât pơreăng, 500 nhĕng ki tât têa kơhêa hơtĕng ƀă hên tơmeăm ki kal xúa rêm hâi ki ê, tâi tâng kơnâ 170 rơtuh liăn.

A Sa Ly tơplôu ƀă tơbleăng