VOV4.Sêdang - Kơxê lơ 27/8, pôa Đỗ Văn Chiến, Kăn xiâm pơkuâ hnê ngăn cheăng Đảng, Kăn hnê ngăn Vi ƀan xiâm Măt trâ̆n Tơnêi têa Việt Nam hiăng tơdah kơxô̆ liăn tŏng kum 1 rơtal ing Kŏng ti pêi cheăng tiô rơnó mơnhông mơdêk Nam Bình Xuyên Green Park tŏng kum ăm tơdroăng ‘’Rơtuh kơxuô tơmeăm Rŭm môi tuăn kum ăm kuăn pơlê peăng hdroh tơnêi têa tơkâ hluâ pơreăng kân COVID-19’’.

 Troh nôkố, Vi ƀan xiâm Măt trâ̆n Tơnêi têa Việt Nam hiăng xing xoăng kơxô̆ liăn 117 rơtal liăn tŏng kum Pơlê kong kân Hồ Chí Minh ƀă mâu kong pơlê peăng Hdroh tơnêi têa tiô Tơdroăng mơhnhôk ai pơxúa kố. Pôa Đỗ Văn Chiến tối rơdêi, kô teăm tơdrêng pơtroh kơxô̆ liăn tŏng kum kố troh a kŏng kuăn pơlê vâ mơhnhôk vâi krâ tơ’nôm ivá tơkâ hluâ mâu hâi khế pá puât hbrâ mơdât COVID-19.

Pôa Đỗ Văn Chiến pói vâ tung la ngiâ kô ai tơ’nôm hên tơdroăng pêi ki lĕm tơdjuôm ivá rơtế Măt trâ̆n tŏng kum kuăn pơlê tơkâ hluâ pá puât xua kong prâi pro, pơreăng xông tâ tú.

A Sa Ly tơplôu ƀă tơbleăng