VOV4.Bahnar - Tơ drong pơ dui jur tŏk khei ‘năr bơ̆ jang pơ jing tơ ring tơ rang ‘noh jĭ tơ drong mă kơ dră chĕp kơ̆l apŭng Lạc Dương, dêh char Lâm Đồng oei tơ tăm. Mă lei đơ̆ng 2 trong jang ‘noh jang trŏ năr hơ găt mă dôm tơ drong kăl oei bơ̆ jang tam mă kơ jăp păng kơ dŭn khei ‘năr vă pơ jing đei dôm tơ drong hơ găt ‘lơ̆ng, tơ ring âu hlôi rơ̆ih iŏk trong jang mă 2. Hơ yak năm hiơ̆ ƀiơ̆ ‘noh vă pơm kơ jăp ‘lơ̆ng ăn tơ drong pơ jing “apŭng tơ ring tơ rang ‘nao.”

Truh hơ tuch sơ năm 2020, lơ̆m apŭng Lạc Dương đei 4 xăh đei Anih vei lăng kon pơ lei dêh char Lâm Đồng tơ chơ̆t drơ̆ng ăn jang đang ‘lơ̆ng tơ ring tơ rang ‘nao. Hơ drô̆ xăh Đưng K’Nớ đei 14/19 tơ drong hơ găt. Tơ drong ming man anih jang kăl mŭk drăm – tơ pôl ‘noh đei dôm tơ drong jang kăl pơ yua ăn tơ drong arih sa, jang sa đơ̆ng kon pơ lei tơ̆ dôm xăh tơ ring tơ rang ‘nao hơ nơ̆ng đei tơ gŭm hơ drol tơ mơ̆t jên jang, hơ tŏk tơ iung. Rim tơ drong hơ tŏk tơ iung jang sa tơ klep hăm hơ met ming tơ drong jang choh jang sa, tơ plih trong jang mŭk drăm tơ ring tơ rang, pơm tơ drong jang sa păng hơ tŏk ‘lơ̆ng iŏk yua ăn kơ kon pơ lei đei tôch kơ bơ ngơ̆t truh. Rim tơ drong jang tơ jur dơ nuh hin, vei sơ đơ̆ng tơ drong arih sa tơ pôl bơ̆ jang kiơ̆ đei iŏk yua. Gơ nang đơ̆ng noh, truh khei  11/2020 tơ ring âu oei 122 ŭnh hnam dơ nuh hin, đei 1,8%. Lơ̆m noh, ŭnh hnam dơ nuh hin bơ ngai kon kông ‘noh 119 ŭnh hnam, đei kơ sô̆ 2,5%. Iŏk yua păh lăp kơ̆l bơ ngai lơ̆m apŭng sơ năm 2020 jô̆ pơ hlom đei 45,9 triệu hlak jên.

            Hrei ‘nâu lơ̆m pơ jing tơ ring tơ rang ‘nao apŭng Lạc Dương, dêh char Lâm Đồng oei tơ hlăk tơ̆ 3 tơ drong tơm ‘noh: Cham char, trong nơ năm păng xăh hơ tăih hơ tŏ Đưng K’Nớ. Găh tơ drong cham char, ƀok Hoàng Văn Hãnh – Phŏ anih vei lăng tơ mam drăm păng cham char apŭng Lạc Dương tơ băt: 3/5 tơ drong tơm đơ̆ng tơ drong hơ găt cham char hlôi iŏk đei tơ̆ đĭ đăng rim xăh. Lơ̆m noh tơ drong pơ dŭ akŏm, chơ, hơ met ‘lơ̆ng râm rĕk oei sa păng ming man hơ nih mong đak, pơ dŭ akŏm kơ đoh pơ gang pơ lôch hơ drông đei bơ ngơ̆t truh hloh. Mă lei, 1,2 ŭnh hnam, kơ dih tam mă tơ pă lăng ƀôh hơ dăh tơ drong gĭt kăl đơ̆ng tơ drong ‘nâu kơ na tam mă hơ drin, kơ chăng lơ̆m bơ̆ jang kiơ̆, pơm ư̆h kơ ‘lơ̆ng truh iŏk yua atŭm păng tơ drong jang đang tơ drong hơ găt găh jang đang apŭng tơ ring tơ rang ‘nao.

Mŭk drăm hơ tŏk tơ iung, tơ drong arih sa kon pơ lei đei hơ tŏk ‘lơ̆ng ‘noh jĭ dôm tơ drong jơ nei hơ nhăk ăn đơ̆ng pơ jing tơ ring tơ rang ‘nao tơ̆ Lạc Dương

Găh tơ drong trong nơ năm, tơ hlăk tơ hlĭn đơ̆ng apŭng Lạc Dương hrei ‘nâu oei tơ̆ trong kơ jung 7.000 mét đơ̆ng Thôn 2 năm tơ̆ thôn Đưng Trang găh xăh Đưng K’Nớ. Ƀok Nguyễn Văn Huynh – Kơ dră anih vei lăng mŭk drăm – anih jang kăl apŭng Lạc Dương tơ băt: Vă vei sơ đơ̆ng xăh Đưng K’Nớ jang đei tơ drong hơ găt găh trong nơ năm tơ gop jang đang tơ drong hơ găt pơ jing tơ ring tơ rang ‘nao sơ năm 2021, anih jang hlôi athei Anih vei lăng kon pơ lei apŭng Lạc Dương hơ met ming trong nơ năm hăm akŏp jên tơ mơ̆t jang tơ chĕng hơ drol dang 4 ti hlak jên. Tơ chĕng hơ drol tơ drong jang âu gô pơm đang sơ năm 2021.

            Tơ dăh nhen 2 tơ drong kơ pal kĕ hơ met pơ ‘lơ̆ng jên tơ mơ̆t jang đei vei sơ đơ̆ng ‘noh tơ drong kăl tih hloh uơ oei dơ̆ng oei tơ̆ xăh Đưng K’Nớ. Vă pơ jing tơ ring tơ rang ‘nao jơ nei sơ năm 2021, ‘meh vă tơ mơ̆t jên jang đơ̆ng Đưng K’Nớ ‘noh đei dôm tơ drong: trong nơ năm, anih jang tơ mam drăm joh ayŏ, đak rơ goh tơ ring tơ rang, dơ nâu mong đak păng mă loi ‘noh jĭ tơ drong tơ jur dơ nuh hin.

Sơ năm mơ lôh apŭng Lạc Dương vang pơm trong nơ năm tơ ring tơ rang

Hơ drin bơ̆ jang kơ tang đơ̆ng apŭng Lạc Dương hlôi tơ ƀôh hơ dăh lơ̆m tơ drong akŏm jên jang hơ dai, tơ gŭm xăh Đưng K’Nớ. Păng iŏk đơ̆ng blŭng sơ năm 2021, khŭl kơ dră chĕp kơ̆l apŭng hlôi kơ tă năm hơ len lăng păng pơ gơ̆r dôm tơ drong hơ dăh ƀơm truh tơ drong hơ tŏk ‘lơ̆ng tơ drong arih sa kon pơ lei tơ̆ Đưng K’Nớ. Yua kơ tơ drong tơ mơ̆t jên jang rim kon jên lăp jing tơ drong kăl, oei hơ tŏk ‘lơ̆ng tơ drong arih sa vă pơm tơ drong drơ̆ng lăp lơ̆m kon pơ lei ‘noh mă jing tơ drong ‘lơ̆ng tôm ăn tơ drong hơ tŏk tơ iung pơ ma atŭm păng jang đang trong tơ lĕch jang pơ jing tơ ring tơ rang ‘nao sơ năm 2021 pơ ma hơ drô̆ tơ̆ Đưng K’Nớ.

            Kiơ̆ trong tơ lĕch jang blŭng a, truh sơ năm 2020, apŭng Lạc Dương, dêh char Lâm Đồng jang đang pơ jing tơ ring tơ rang ‘nao. Mă lei, set hơ len ăn ƀôh dôm tơ drong tơm ư̆h kơ đei kơ jăp, kơ na apŭng hlôi tơ chơ̆t kơ dŭn khei ‘năr truh sơ năm 2022. Dôm tơ drong pơ dui khei ‘năr ư̆h kơ sĭ tơ drong gĭt kăl. Yua kơ kăl hloh ‘noh jĭ tơ drong kơ jăp lơ̆m dôm tơ drong hơ găt, jĭ tơ drong arih sa ‘lơ̆ng hơ iă đơ̆ng kon pơ lei. Kơ na tơ drong hơ yak hiơ̆ ƀiơ̆ mă lei kơ jăp ‘noh tơ drong kăl hloh yua kơ tơ drong jang roi kơ jung roi athei đei pơ jing kiơ̆ lơ̆m tơ drong kơ jăp tơ pă.

Thuem: Tơ blơ̆