‘Nhŏng Rcom Vu, pơlei Ia Rniu, tơring Ia Broăi, apŭng Ia Pa tŏk bŏk hơngŭr vei lăng mir pơgar hơƀo să 1 héc-ta  ‘Nhŏng Rcom Vu tơbăt, ‘nou pơyan pơtăm hơƀo mă 3 lơ̆m sơnăm, tơgŭm ăn ŭnh hnam ‘nhŏng jang sa iŏk đei 80 triu hlak jên lăp đơ̆ng rŏng tơklăh pơ đĭ kon jên tơmơ̆t jang.“Hăm kih thuơ̆t choh jang sa hle, kon pơlei pơtăm hơƀo đei lơ rơvơn, đơ̆ng trong choh teh, truh chă pơlăp đing tơruih kơtoh đak vă tơruih ăn dơnơm, tơdrong jang dang ei rơhơi ƀiơ̆ pơtêng hăm sơ̆. Tơdrong iŏk đei ou jei gơnơm đei mŏ Kpă H’Yư, kang ƀô̆ khul drŏ kăn tơring chă pơtho phăl hơlăng ăn ŭnh hnam bơ̆n păng kon pơlei lơ̆m pơlei đơ̆ng dôm năr blŭng jang sa ‘noh”.

Ƀok Rcom Tiêu - Thôn trơng pơlei Ia Rniu chơt hơ iă tơroi: Gơnơm jang kiơ̆ ƀlep kih thuơ̆t, mĭnh hektar chă gơ̆ iŏk đei đơ̆ng 35 truh 40 tân plei hơƀo. Đơ̆ng mă tơplih trong jang sa hle, pơlei Ia RNiu hlôi tơjur kơtang ŭnh hnam dơnuh, dang ei lê̆ pă 73 ŭnh hnam.“Sơ̆ pơtăm hơƀo 1 sơnăm 1 pơyan đĕch, mă lei đơ̆ng mă jang kiơ̆ trong jang hle ‘noh 1 sơnăm kon pơlei pơtăm đơ̆ng 3-4 ‘măng, păh khul drŏ kăn jei hop akŏm rim bơngai lơ̆m khul pơrô̆ hơvơn iung jang kiơ̆ trong jang pơtăm hơƀo hle, hăm trong jang đơ̆ng kih thuơ̆t tơruih đak, tơdrong chă tuh mơ̆r prôi phŏng, pruih pơgang jei đei rim bơngai vang jang kiơ̆, đơ̆ng mă jang kiơ̆ trong jang ou ‘noh hơƀo đei plei lơ hloh dơ̆ng”.

Tơdrong tơgŭm kon pơlei Jrai tơplih ‘long pơtăm, jang kiơ̆ khoa hŏk lơ̆m choh jang sa đei tơdrong tơgop tih tên đơ̆ng mŏ Kpă H'Yư, Kơdră chĕp pơgơ̆r Khul drŏ kăn tơring Ia Broăi. Mŏ hlôi hơdrin jang pơchoh trong ăn khul kơdră chĕp pơgơ̆r đảng, kơdră chĕp pơgơ̆r tơring tơlĕch lơ trong jang atŏk tơ iung mŭk drăm jơnei lơ̆m tơring kon kông. Mŏ Kpă H'Yư, pơma:“Kơdih ba jei hơnơ̆ng chă pơma dơnuh hăm pơmai oh, bơ̆n kăl tơplih jơhngơ̆m đon tơchĕng trong jang sa; kăl jang kiơ̆ khoa hŏk kih thuơ̆t, nhen sơ̆ mưh chă pơtăm ‘noh ăp gô ‘mi jur ‘mơ̆i, mă lei dang ei bơ̆n ƀôm đak tơruih đak kơtoh, iŏk yua phŏng mơ̆r, pơgang vei lăng ‘long pơtăm vă hơnhăk đei iŏk yua kơjăp lơ̆m choh jang sa, dang ei lơ pơmai oh hlôi tơplih jơhngơ̆m đon tơchĕng, trong jang sa păng băt jang kiơ̆ khoa hŏk kih thuơ̆t lơm choh jang sa”.

Kiơ̆ đơ̆ng ƀok Vương Chí Thông, Kơ iĕng Bí thư Đảng tơring Ia Broăi, hăm tơdrong hơdrin đơ̆ng dôm kang ƀô̆ tơnăp nhen mŏ H’Yư, bơ̆ jang tơjur dơnuh tơ̆ tơring tŏk bŏk iŏk đei jơnei hơ iă.“Trong jang kơ bơngai chĕp kơ̆l Khul drŏ kăn tơring ‘noh tôch tơnăp, hơbĕch hơbal phăl hơlăng lơ̆m pơrô̆ pơrôp, pơtho khan ăn kon pơlei lơ̆m bơ̆ jang tơjur dơnuh, kon pơlei lui yom, mơ̆ng kiơ̆, tơgop tơgŭm ăn bơ̆ jang tơjur dơnuh kơ tơring rơvơn hloh. Yă hlôi đei Trung ương Khul drŏ kăn Việt Nam pôk ăn hla bơar hôn bơnê lơ̆m tơdrong jang pơrô̆ pơrôp, pơtho khan kon pơlei, lơ̆m pơlei pơla. Sư ‘noh jĭ bơngai tôch tơnăp, hơbĕch hơbal lơ̆m bơ̆ jang pơrô̆ pơrôp kon pơlei”.

Hăm dôm tơdrong bơ̆ jang pran kơtang gơ̆h hơgei lơ̆m bơ̆ jang Khul păng tơdrong jang đe drŏ kăn, sơnăm 2023, mŏ Kpă H'Yư hlôi đei Trung ương Khul drŏ kăn Việt Nam pôk ăn hla bơar hôn bơnê. Mă lei, hăm mŏ, tơmam pôk hơpăh tih tên hloh, gĭt kăl hloh ‘noh tơdrong lui yom, jơhngơ̆m đon ‘mêm kơ eng đơ̆ng kon pơlei păng dôm tơdrong tơplih hơ iă lơ̆m tơdrong hơrih sa kơ kon pơlei lơ̆m tơring.