VOV4.Bahnar – Pơm kiơ̆ Tơchơ̆t kơsô̆ 12 năr 13/02/2018 đơ̆ng Anih jang Tĭnh uy Gia Lai, rim tơring tơ̆ dêh char Gia Lai hlôi tơlĕch jang pơjing tơring tơrang ‘nao lơ̆m tơring kon pơlei kon kông. Lơ tơdrong tơlĕch jang trŏ ƀlep hlôi đei pơm jang. Kiơ̆ đơ̆ng noh, lơ tơring hlôi pơjing ming man đei anih jang ‘lơ̆ng kơjăp, kon pơlei pơm jang đei iŏk yua lơ, mă hăt noh hăm kon pơlei kon kông đei hơtŏk hơdah. Kơchĕng lơ̆m sơnăm 2024, apŭng Kbang dang ei đei 6 pơlei đei jơnei tơchơ̆t tơring tơrang ‘nao.  

Unh hnam pơmai Đinh Thị Phước, rơneh sơnăm 1996, oei tơ̆ pơlei Đăk Kjông, xah Lơ Ku, apŭng Kbang, dêh char Gia Lai sơ̆ noh unh hnam hin dơnuh kơlih ưh đei teh choh jang păng ‘nao tơklah oei kơdih. Bre klo hơkăn hăm 2 ‘nu kon iĕ, hơrih gơnơm lơ̆m 5 sao teh mĕ ƀă asong ăn păng chă jang xa hơpah đĕch. Tơdrong hơrih ưh đei sơđơ̆ng pơm ăn unh hnam ƀơm lơ tơnap tap.

Băt hơdah tơdrong hơrih kơ unh hnam pơmai, Chi ƀô̆ pơlei Đăk Kjông hlôi asong đảng viên kơtă truh pơtho, hơlêm pơmai Phước iŏk vei lăng păng jang 12 hectar bri; pơtho pơmai băt gah trong vei lăng bri trŏ ki thuơ̆t. Đơ̆ng âu, pơmai đei iŏk yua sơđơ̆ng 36 trĭu hlj 1 sơnăm đơ̆ng sơnăm 2014 truh dang ei. Tơ̆ hơla bri, ah ‘long oei ‘lơ̆p, pơmai pơtăm tơh âu to vă hơtŏk iŏk yua. Gơnơm pơ-‘nam pơm jang, truh dang ei klo hơkăn pơmai Phước hlôi răt đei 2 hectar teh, tơchĕng ah hơtuch sơnăm âu gô pă đei hin dơnuh bơih: "Unh hnam inh noh unh hnam hin dơnuh, bơnê kơ kang ƀô̆ hlôi chă tơgŭm. Inh gô hơdrin pơm jang, mong đei jên vă răt teh pơm hnam păng hơtŏk mŭk drăm unh hnam. Tơdrong hơrih unh hnam inh dang ei da ƀiơ̆ hloh kơ hơdrol ki bơih".

Pơlei Đăk Kjông, xah Lơ Ku, apŭng Kbang, dêh char Gia Lai đei 84 unh hnam kon pơlei hăm 426 măt bơngai. Tơ̆ âu, 95% kon pơlei noh bơngai Bahnar. Hơdrol ki, pơlei oei ah tơring klŭng kơ dơnâu đak hnam kơmăi unh hơyuh An Khê – Ka Nak. Sơnăm 2009, pơlei jăk oei tơ̆ hơnih kơjung hloh, hơtaih đơ̆ng anih so 14km. Hăm teh đei 8 sao păng 1,7 sao ƀa na 2 pơyan đei asong ăn rim unh hnam, mă blŭng tơdrong hơrih kon pơlei ƀơm lơ tơnap tap. Mă lei gơnơm đei tơdrong pơgơ̆r jang tơnăp đơ̆ng chi ƀô̆ thôn păng jơnŭm kon pơlei vei lăng thôn, kon pơlei hlôi man đei trong kơjăp ‘lơ̆ng păng hnam hơkŭm tơpôl ăn pơlei pơla. Kon pơlei kơdih chă pơm pơga pĕng găn, pơm ‘măng jang pơlei păng atŭm băl vei lăng trong pơlei pơla rơgoh ‘lơ̆ng.

Ưh hơdrô̆ thoi noh, kon pơlei lơ̆m pơlei Đăk Kjông oei đei tơgŭm jên jang, đei asong ăn rơmo păng lơ trong pơm jang nai vă hơtŏk iŏk yua. Đơ̆ng rŏng lơ sơnăm kơ-‘nôh pơm jang, kơchĕng truh khei 11/2024, pơlei Đăk Kjông gô đei jơnei tơchơ̆t pơlei tơring tơrang ‘nao, pơm trong hơtŏk kăp gĭt kơ tơpôl. Ƀok Đinh Bới – Ƀĭ thư chi ƀô̆ pơlei Đăk Kjông, xah Lơ Ku, apŭng Kbang, dêh char Gia Lai ăn tơbăt: "Inh ‘noh Ƀĭ thư chi ƀô̆, noh asong đảng viên tơgŭm unh hnam hin dơnuh, unh hnam tơnap tap. Inh adoi ră tơbăt truh dôm unh hnam hin đơnuh athei hơdrin pơm jang, chă pơyua ăn unh hnam, vă tơdrong hơrih sơđơ̆ng, phĭ tơtŏ hloh, tenh kuăng klaih đơ̆ng hin dơnuh. Hơdrin hơtŏk mŭk drăm ăn unh hnam"

Dôm sơnăm kơ âu, tơdrong pơjing pơlei pơla ‘nao lơ̆m tơring kon pơlei kon kông kiơ̆ Tơchơ̆t kơsô̆ 12 năr 13/02/2018 đơ̆ng Anih jang kơpal Tĭnh uy Gia Lai, rim sơnăm Anih jang Đảng xah Lơ Ku, apŭng Kbang adoi chih akŏm tơchơ̆t, tơlĕch jang hơdah kiơ̆ dôm tơchơ̆t apŭng pơjao. Anih jang Đảng asong kang ƀô̆, bơngai jang păng dôm jơnŭm jang tơpôl pơgơ̆r jang truh rim thôn, pơlei, mă kăl noh pơtho ăn rim unh hnam hin dơnuh chih măt klaih đơ̆ng hin dơnuh. Kon pơlei đei tơgŭm gah kih thuơ̆t choh pơtăm, rong kon tơrong păng dôm tơdrong hlôh vao kăp gĭt lơ̆m tơdrong pơm jang.

Xah Lơ Ku, apŭng Kbang, dêh char Gia Lai adoi jang hadoi lơ tơdrong tơchơ̆t jang kơ teh đak nhen hơtŏk mŭk drăm – tơpôl tơring kon pơlei kon kông păng tơdrong jang tơjur hin dơnuh kơjăp sơđơ̆ng, asong hơdrĕch ‘long pơtăm, kon yŏng păng kơmăi kơmŏk ăn kon pơlei tơlĕch pơm jang. Đảng viên đei asong năm jang tơ̆ rim pơlei vă atŭm hăm chi ƀô̆, tơroi tơbăt, tơgŭm rim unh hnam hin dơnuh. Mă oei lơ tơnap tap, tơdrong jang tơjur hin dơnuh tơ̆ tơring hlôi đei iŏk jơnei hơdah, dar deh tơgŭm kon pơlei Bahnar hơtŏk tơdrong hơrih păng hơtŏk tơ-iung kơjăp. Lơ̆m dôm sơnăm tơjê̆ âu, kơsô̆ unh hnam hin dơnuh kơ pơlei Đăk Kjông tơjurr kơtang đơ̆ng 38,46% ah sơnăm 2021 jur oei 5,8% ah sơnăm 2023. Ƀok Trần Xuân Nam, Phŏ Ƀĭ thư Anih jang Đảng, Kơdră Anih jang vei lăng kon pơlei xah Lơ Ku, apŭng Kbang, dêh char Gia Lai ăn tơbăt: “Kang ƀô̆, đảng viên rim khei đei asong năm jang noh athei tơroi ăn Anih jang Đảng gah tơdrong jang tơgŭm rim unh hnam hin dơnuh, atŭm hăm bơngai jang ƀĭ thư chi ƀô̆ tơ̆ pơlei noh chă hơvơn tơroi tơgŭm kon pơlei hơdrin hơtŏk tơ-iung kơjăp; pơm kiơ̆ dôm tơdrong hơlêm tơplih đon tơchĕng, trong pơm jang lơ̆m tơring kon pơlei kon kông. Mă tơdrong jang tơjur hin dơnuh tơ̆ xah tam mă đei jơnei nhen ‘meh vă, mă lei kiơ̆ đơ̆ng sơkơ̆t noh hlôi đei hơtŏk tơnăp đei jơnei nhen tơchơ̆t tơjur hin dơnuh lơ̆m tơring”.

Atŭm hăm tơdrong pơgơ̆r kơjăp păng yak hadoi đơ̆ng Anih jang Đảng păng jơnŭm pơgơ̆r tơring, kon pơlei Bahnar tơ̆ pơlei Đăk Kjông, xah Lơ Ku, apŭng Kbang, dêh char Gia Lai hlôi sơđơ̆ng tơdrong hơrih, tơjur hin dơnuh tenh vă pơjing tơring tơrang ‘nao sơđơ̆ng gơh hơgei. Tơdrong jang âu ăn ƀôh, tơdrong tơguăt tơguăl đơ̆ng kon pơlei Bahnar păng sơnong kăp gĭt kơ Đảng lơ̆m tơdrong yak hadoi păng hơtŏk tơdrong hơrih ăn kon pơlei tơ̆ tơring kon kông.