Gia Bắc ‘noh tơring atăih yăih kơ apŭng Di Linh, dêh char Lâm Đồng, hăm 95% măt bơngai kon pơlei ‘noh bơngai K’ho. Atŭm hăm tơdrong lăng ba đơ̆ng Đảng păng Teh đak găh rim tơdrong, tơdrong hơdrin đơ̆ng kơ dih kon pơlei lơ̆m rim pơlei pơla jei jing tơdrong kăl hloh ăn atŏk tơ iung mŭk drăm păng hơrih sa. Ƀôh hơdăh tơdrong ou, atŭm hăm rim đảng viên anai lơ̆m tơring, iŏk đơ̆ng năr đei mơ̆t jang lơ̆m khul Đảng, ‘nhŏng K’Bơn, kang ƀô̆ sơnăm mơlôh kơ tơring Gia Bắc, apŭng Di Linh, dêh char Lâm Đồng hlôi kơrŭn đĭ jơhngơ̆m lơ̆m pơrô̆ pơrôp kon pơlei jang kiơ̆ rim tơdrong jang mă tơring tơlĕch ăn. K’Bơn tơbăt vă kon pơlei băt păng pơm kiơ̆, rim kang ƀô̆ đang viên kăl pơm jŭk yŭk trong hơlou lơ̆m jang kiơ̆ rim tơdrong jang. “Mưh đei jing đảng viên, ba đei rơvơn băt hlôh ƀôh nhên rim trong bơ̆ jang đơ̆ng Đảng, Khôi luơ̆t Teh đak. Gơnơm đơ̆ng noh ba gơ̆h jang ‘lơ̆ng dôm tơdrong mă khul kơdră Đảng, kơdră chĕp pơgơ̆r tơring pơjao. Đơ̆ng noh tơgŭm kon pơlei lơ hloh dơ̆ng lơ̆m atŏk tơ iung mŭk drăm, tơ iung pơjing tơring tơrang ‘nao iŏk đei jơnei hơ iă”.

      Đơ̆ng mă lăng kơjăp bơ̆ jang tơ iung pơjing đảng, tơ iung pơjing khul jang chinh trĭ pran kơjăp, truh dang ei, Đảng ƀô̆ tơring Gia Bắc hlôi atŏk tơ iung đei 96 ‘nu đảng viên, găh lơ ‘noh bơngai kon kông. Kiơ̆ kơ ƀok K’Thanh, Ƀĭ thư chi ƀô̆ pơlei Ka Să, tơring Gia Bắc, apŭng Di Linh, đảng viên ‘noh kăl pơm jŭk yŭk trong hơlou lơ̆m jang kiơ̆ trong bơ̆ jang đơ̆ng Đảng, Khôi luơ̆t Teh đak. Kơ yuơ lơloh, ‘ngoăih hơnơ̆ng hŏk pơhrăm dôm tơdrong ‘lơ̆ng hơ iă trŏ lăp vă pơtho tơbăt dơ̆ng ăn pơlei pơla, rim đảng viên lơ̆m chi ƀô̆ hơdrin chă pơrô̆ hơvơn, pơtho khan ăn kon pơlei tơplih ‘long pơtăm, atŏk kơtang jang sa, tơgŭm dih băl atok tơ iung muk drăm, chă choh pong, ‘long pơtăm-rong kon tơrong, plang teh pơm trong nơnăm, tơ iung pơjing tơring tơrang ‘nao... Gơnơm đơ̆ng noh, tơdrong hơrih sa kơ kon pơlei oei lơ̆m pơlei Ka Să, tơring Gia Bắc pơma hơdrô̆ hlôi kĕ sut hŭt pơngot rơvĕt, atŏk tơ iung jing tơring iŏk đei tơring tơrang ‘nao. Ƀok K’Thanh, Ƀĭ thư chi ƀô̆ pơlei Ka Sá, pơma:“Jang kiơ̆ tơdrong vă jang 04 đơ̆ng Hơnih Đảng apŭng, kơ Trung ương găh “Tơ iung pơjing tơring tơrang ‘nao”, kon pơlei lơ̆m pơlei jang kiơ̆ tôch tơnăp, plang ăn teh vă pơm trong nơnăm să ‘lơ̆ng hlŏh dơ̆ng. Hăm hơnăp jang jĭ Ƀĭ thư chi ƀô̆ pơlei, kơdih kou ba jei hơdrin chă pơtho khan ăn ŭnh hnam, kon pơlei lơ̆m pơlei atŏk tơ iung choh jang sa, pơm hơtŏk hơrih sa sơđơ̆ng, pơm tơplih pơlei pơla”.

Ưh khan lăp hơdrô̆ kang ƀô̆ đang viên oei tơ̆ rim pơlei pơla, dôm bơngai đảng viên ‘noh Kơdră chĕp pơgơ̆r Hơnih vei lăng kon pơlei rim tơring, thĭ trân kơ apŭng Di Linh jei jang ‘lơ̆ng atŏk kơtang hơnăp jang pơm jŭk yŭk trong hơlou hăm dôm tơdrong jang hơdăh păng trŏ lăp. Hăm đảng viên K’Ly, Kơ iĕng Kơdră chĕp pơgơ̆r Hơnih vei lăng kon pơlei tơring Tân Thượng, apŭng Di Linh, ưh khan lăp jang ‘lơ̆ng bơ̆ jang tơdrong jang đei pơjao, ‘nhŏng oei hơdrin tơchă trong ăn atŏk tơ iung mŭk drăm ‘nao hăm trong pơtăm măng tây. K’Ly tơbăt, ‘meh vă tơplih trong jang sa kơ kon pơlei kăl tơƀôh hơdăh jang sa đei iŏk yua kơjăp ‘mơ̆i.“Vă mŭk drăm kơ kon pơlei atŏk tơ iung sơđơ̆ng, ‘ngoăih ‘long pơtăm chehphe, tơring chă pơrô̆ hơvơn kon pơlei pơtăm hloi ‘long pơtăm anai, tơplih ‘long pơtăm kră krŭt chă pơtăm dôm hơdrĕch ‘long pơtăm sa plei đei iŏk yua kơjăo nhen ƀơ, sâu riêng, theng thôih yuăn (mắc ca) ... Kơdih ba hlôi yŭk trong hơlou pơtăm măng tây vă kon pơlei hŏk pơhrăm păng jang kiơ̆. Hrei ou măng tây chă tĕch mơdro tôch sơđơ̆ng, kơjă chă tĕch đơ̆ng 70.000 truh 100.000 hlak jên lơ̆m 1 kĭ, lơ bơngai mơdro năm tơ̆ ou chă răt kơtă tơ̆ chŭn mir hloi”.

Hrei ou, apŭng Di Linh, apŭng Lâm Đồng đei hloh 4.400 ‘nu đảng viên, lơ̆m ou đei vă jê̆ 900 ‘nu đảng viên ‘noh bơngai kon kông. Dôm đảng viên ou ‘nŏh jĭ dôm bơngai pơm jŭk yŭk trong hơlou lơ̆m rim tơdrong, tơgop pơm tơplih jơhngơ̆m đon tơcheng, trong jang sa rim pơlei pơla kon kông, tơgop kơtang lơ̆m atŏk tơ iung Mŭk drăm-Tơpôl lơ̆m pơlei pơla tơring groi kông Di Linh.