Hrŭk ao tơnŏ, yơ̆l môk, văn che klĕp hơkâu vă vei lăng jơhngơ̆m pran ƀơ̆t ‘năr tơngiĕt jur truh 10 độ, mŏ Nguyễn Thị Yến, bơngang jang lơ̆m Hơp tak xăh pơvih pơvăn choh jang sa plei Ngăm Mạc, xăh Lãng Ngâm, apŭng Gia Bình (Bắc Ninh) chĕp sô tỏi păng rơya đĭ tŭl hĕch kiơ̆ ƀlep nơ̆r pơtho đơ̆ng kang ƀô̆ pơtrŭt choh jang sa lĕch tơruih ăn chŭn pro kreng, hla ar bey krôp truh khei ‘năr kăt tĕch vă tang găn hơdrông sa. Mŏ Yến tơbăt, ƀơ̆t đei đe kang ƀô̆ Pơtrŭt choh jang sa păng pơđĭ hloi bơngai joăt jang bơngai Nhật Bản năm pơtho ki thuơ̆t, pơtăm kiơ̆ hơgăt rơgoh ‘lơ̆ng đơ̆ng Nhật Bản, mŏ ƀôh ‘nhot plei lơ, ‘lơ̆ng, tĕch kơjă măk ƀiơ̆:

Pơm tơlĕch kiơ̆ hơgăt ‘lơ̆ng Nhật Bản ưh kơ mơmat. Nhôn jang dôm ki thuơ̆t, chih iŏk lơ̆m kơsâp hla ar, ưh kơ pruih pơgang hoă hŏk mă athei tŭl rơya, tỏi vă tang găn hơdrông sa. Pơm đei iŏk yua ‘lơ̆ng.

 Hơp tak xăh pơvih pơvăn choh jang sa plei Ngăm Mạc, xăh Lãng Ngâm, apŭng Gia Bình (Bắc Ninh) jĭ 1 lơ̆m dôm hơp tak xăh đei Anih pơtrŭt choh jang sa Teh đak păng Anih jang Hơdai apŭng plĕnh teh Nhật Bản Jica tơgŭm vă pơtho, pơhrăm kon pơlei pơm tơlĕch tơmam đơ̆ng choh jang sa rơgoh kiơ̆ hơgăt ‘lơ̆ng Nhật Bản păng tơplih đon tơchĕng gơh tĕch tơ̆ anih tĕch mơdro kiơ̆ trong “pơtăm vă tĕch”, tơplih yua kơ “tĕch tơmam bơ̆n pơtăm”.

Ƀok Phan Duy Phượng, Kơdră vei lăng Hơp tak xăh plei Ngăm Mạc, xăh Lãng Ngâm, apŭng Gia Bình (Bắc Ninh) tơbăt, vă hơmet ăn tĕch modro Tết Nguyên đán Giáp Thìn 2024, Hơp tak xăh hlôi hơmet tôm tơmam tŏk truh 200 tấn cam Canh, vă jê̆ 300 tấn ‘nhot, ƀum, plei ‘long rim kơloăi, pơkăp vei sơđơ̆ng tơmam rơgoh ‘lơ̆ng kiơ̆ hơgăt VietGAP, đei kơtem pơklep hơnih pơm tơlĕch rơđăh rơđong:

Hơdrol ki kŭm pơtăm ‘nhot ƀăp su, pia, hla bey krôp rim kơloăi, iŏk đơ̆ng Jica vih tơ̆ âu ‘noh jang ‘lơ̆ng ƀiơ̆, đei yua ƀiơ̆ kơ ‘nhot nhôn bluh jing dang ăi păng ưh kơ đei pơrang jĭ, tĕch rơgoh, dôm hla ar răt ưh kơmăh tơmam, Têt âu nhôn tơlĕch ăn tôm kơ sô̆ đĕch mă ưh kơ rơkăh, truh âu tĕch ăn anih tĕch mơdro vei sơđơ̆ng hăm bơngai răt yua ‘nhot Hơp tak xăh nhôn ‘noh ‘nhot rơgoh ‘lơ̆ng.

Tơ̆ Hơp tak xăh pơm tơlĕch păng tĕch mơdro tơmam đơ̆ng choh jang sa rơgoh Bạch Đằng, plei Đại Uyên, xăh Bạch Đằng, thị xã Kinh Môn (Hải Dương), dôm pơgar gu ga lăm ƀrê să nhen lĕ tơ̆ tơring Pơbăh. Gu ga ‘noh jĭ kơ loăi plei ‘long đei ‘meh vă pơdă mâm plei ‘long năr Têt. Ƀok  Nguyễn Văn Thuấn, Kơdră vei lăng Hơp tak xăh pơm tơlĕch păng tĕch mơdro tơmam đơ̆ng choh jang sa rơgoh Bạch Đằng tơbăt, gu ga tơ̆ tơring đei dôm tơdrong ‘lơ̆ng tôch kơ lơ, ‘lơ̆ng hloh kơ plei gu ga pơtăm tơ̆ tơring Pơbăh:

Pơtăm ưh kơ trŏ pơyan tôch kơ đei yua, tĕch đei kơjă măk ƀiơ̆. Gơh tơroi pơjei băl ‘noh lơ tơdrong hơiă hloh kơ plei gu ga tơring Pơbăh. Đơ̆ng tơring pơbăh tĕch tơ̆ âu athei hiong dôm năr, ƀơ̆t mă gu ga tơring găh Tu lê̆ đum tơ̆ tơm, ‘lơ̆ng hloh, tĕch hloi tơ̆ anih tĕch mơdro tơring găh Tu kơna pơjei băl ‘lơ̆ng.

Kiơ̆ đơ̆ng hơlen lăng dôm tơdrong jang tơ̆ Bắc Ninh, Hải Dương, Hưng Yên, ƀok Naoki Kayano, Bơngai joăt jang JICA lăng ‘lơ̆ng tơdrong vang jang tơnăp đơ̆ng kon pơlei jang chŭn mir, dôm hơp tak xăh păng mă loi ‘noh jĭ tơdrong yak hơdai đơ̆ng khŭl jang Pơtrŭt choh jang sa. Ƀok akhan, năr Têt âu gô jing ƀơ̆t ‘meh vă tĕch mơdro tŏk lơ păng jing tơdrong hiôk tĕch tơmam đơ̆ng choh jang sa đơ̆ng kon pơlei jang chŭn mir. Bơngai pơm tơlĕch kăl kơ băt hơdăh đei dôm tơdrong athei păng ‘meh vă lơ̆m anih tĕch mơdro ‘moi kiơ̆ dôm tơdrong jang tơroi tơbăt. JICA gô hơnơ̆ng bơ̆jang hăm Anih pơtrŭt choh jang sa teh đak păng dôm anih pơtrŭt choh jang sa dêh char vă pơgơ̆r rim tơdrong jang kăl ƀơm truh nhen tơgoăt hơdai, pơma dơnuh dăh mă hop akŏm vă pơtrŭt păng hơtŏk tơiung hloh dơ̆ng choh jang sa tơ̆ Việt Nam.

Kiơ̆ Kơdră vei lăng Anih pơtrŭt choh jang sa Teh đak Lê Quốc Thanh, đơ̆ng dôm jơnei jăl jang blŭng a, tơ̆ hơnăp kơnh, Anih pơtrŭt choh jang sa teh đak păng anih jang Jica hơnơ̆ng pơih să dơ̆ng trong jang âu ăn kơ dôm hơp tak xăh păng kon pơlei jang chŭn mir:

“Truh âu kơnh nhôn gô rơih dơ̆ng 50 Hơp tak xăh păng tơplih tơring pơm tơlĕch đơ̆ng bơ̆n hơnơ̆ng pơih să jing tơring pơm tơlĕch sơđơ̆ng. Păng tơmam đơ̆ng bơ̆n ưh khan lăp kiơ̆ ‘măng, năr mă bơ̆n gô đei, tơmam đơ̆ng choh jang sa sơđơ̆ng lơ̆m prăt pơđĭ sơnăm.”

Têt ‘noh jĭ năr ‘meh vă răt yua dôm kơloăi tơmam đơ̆ng choh jang sa, tơmam sa tŏk lơ; mă loi ‘noh jĭ dôm kơloăi ‘nhot ƀum plei ‘long rơgoh, sơđơ̆ng kiơ̆ tơdrong hơgăt ‘lơ̆ng tôch kơ hơlen đơ̆ng Nhật Bản gô đei lơ anih tĕch mơdro iŏk răt. Dôm hơp tak xăh choh jang sa tơbăt gô hơdrin pơvei pơm tơlĕch tơmam đơ̆ng choh jang sa rơgoh prăt sơnăm vă tĕch ăn bơngai răt yua mă ưh khan lăp lơ̆m năr Têt truh âu đĕch ôh.