Ƀok A Hà, Phŏ Kơdră Anih jang vei lăng kon pơlei xah Đăk Plô, apŭng Đăk Glei, dêh char Kon Tum ăn tơbăt, anih hơbuh pơrang hăm kơpô, rơmo tơ̆ cham vei xa 'nhĕt Đăk Đơ, thôn Bung Koong. Lơ̆m 10 năr kơ âu tơ̆ cham vei rong âu đei 4 tŏ kơpô, rơmo ƀơm jĭ păng lôch. 'Nguaih kơ noh đei 110 tŏ kơpô, rơmo tŏk bŏk ƀơm jĭ. Kiơ̆ anih jang gah choh pơtăm apŭng Đăk Glei hơbŏ kơsô̆ kơpô, rơmo lôch kơyuơ ƀơm jĭ kơtoăl pham.

Cham vei rong xa 'nhĕt Đăk Đơ dang ei đei 300 kơpô, rơmo kơ 88 unh hnam kon pơlei tơ̆ thôn Bung Koong, xah Đăk Plô, apŭng Đăk Glei. Hăm tơdrong mă kơpô, rơmo tơ̆ cham vei xa 'nhĕt lôch răm, Anih jang gah choh pơtăm apŭng Đăk Glei hlôi asong ăn 80 lit đak pơgang, 500kĭ vôi pŭk, 20 blah hơbăn ao hrŭk tang găn pơrang păng pơgang hơmet jĭ ăn kơpô, rơmo ƀơm pơrang.