VOV4.Bahnar - Pơ tho trong arih sa ăn kơ hŏk tro kiơ̆ đơ̆ng pơ tho ăn đe oh pơ hrăn tôn chĭng, chă hơ len lăng, chih răk păng roi tơ ƀôh găh tơ drong joăt, joh ayŏ kơ dŏ soang lơ̆m dôm jơ chao kơ ƀơ̆t blŭng giĕng. ‘Nâu jĭ trong mă Hnam hŏk jăl 2 Y Ngông Niê Kđăm tơ̆ apŭng Cư Mgar, dêh char Dak Lak tŏk bŏk jang vă tưk tơ iung jơ hngơ̆m đon hưch ‘mêm jŏh ayŏ kơ dŏ soang ăn kơ đe oh hok tro.

      Lơ̆m jơ lĕch ngôi dăh mă dôm năr hơ tuch giĕng, cham hnam trưng hŏk jăl 2 Y Ngông Niê Kđăm tơ̆ thị trấn Ea Pôk, apŭng Cư Mgar, dêh char Dak Lak ‘nŏh re jơ va chĭng kram rơ đŭk. Vă jê̆ 2 sơ năm âu ki, chĭng kram re hlôi jing nơ̆r re joăt hăm rim hŏk tro. Oh H Doen Ni Adrơng, lăm 7a1, bơ ngai vang tôn lơ̆m khŭl tôn chĭng tơ roi, gơ nang đơ̆ng hŏk tôn chĭng mă jơ lĕch ngôi jing hơ iă hloh, oh đei lơ tơ drong ‘nao plơ̆ng vă chă hơ len lăng păng pơ ma dơ nuh hăm đe buăl. Đơ̆ng noh oh roi nă hal găh tơ drong joăt joe kơ hơ drech hơ drŭng bơ̆n păng vei rong tơ drong hơ pơi ‘meh jing kô pơ tho vă hơ nơ̆ng pơ tho pơ hrăm găh jŏh ayŏ Êđê.

Oh ‘mĕh vang tôn chĭng chêng yua kơ ‘noh jĭ 1 jŏh ayŏ kơ bơ ngai Êđê kơ na oh ‘mĕh vei răk păng tơ ƀăk mong. Lơ̆m kơ plah vang tôn hăm đe buăl lơ̆m hnam trưng, lơ̆m lăm ‘noh oh tôch kơ chơt, tôch kơ ‘meh. Đơ̆ng sơ năm lăm 6 truh dang ei hlôi tôn đei 2 ƀai, kŭm gơh tôn kleh klĕch bơ̆ih. Oh ‘meh vă ‘lŏ kơnh gơh jing 1 kô pơ tho vă pơ tho đe oh gơh tôn chĭng chêng.

Dôm bơ ngai vang tôn lơ̆m khŭl tôn chĭng hơ nơ̆ng akŏm vă pơ hrăm ming dơ̆ng dôm ƀai chĭng

Pơ jing đơ̆ng sơ năm hŏk hơ drol, khŭl tôn chĭng kram hnam trưng hŏk jăl 2 Y Ngông Niê Kđăm đei 12 ‘nu hŏk tro drŏ nglo hăm drŏ kăn hloi găh grŭp lơ̆m 6,7. ‘Nâu jĭ đe oh hưch hanh păng đei mơ nơh kơ tôn chĭng. Tơ gĕch ‘ngoăih kơ jơ hŏk, đe oh đei ngê̆ nhân pơ tho 1,2 ƀai chĭng nhen Krao ‘mi, Hơ vơn et tơ drô, Chơt hơ iă jur et sa... Đơ̆ng rŏng 3 khei pơ hrăm pơ nam hăm tơ drong mơ nơh, đe oh adoi hlôi gơh tôn dôm ƀai chĭng. Oh Võ Thanh Ngân, lăm 7a1, tơ roi, vang tôn lơ̆m khŭl chĭng ưh akhan lăp vă kơ hrăp tơ drong hưch hanh jŏh ayŏ đĕch mă oei tơ klep đe oh pơm tơ drong joăt ‘lơ̆ng lơ̆m hŏk pơ hrăm:

Oh ‘noh bơ ngai Yuăn mă lei ƀôh dôm tơ drong ‘lơ̆ng hơ iă joh ayŏ kơ bơ ngai Êđê ‘noh tôch kơ hơ iă kơ na oh hlôi vang pơ hrăm tôn. Ƀơ̆t kơ plăh pơ hrăm oh ƀôh tôch ‘nă păng chơt ƀơ̆t đei pơ hrăm hăm đe buăl bơ ngai Êđê. Lu oh đei pơ hrăm đơ̆ng ƀơ̆t sơ năm lăm 6 truh dang ei, mưh lơ̆m năr drâu rim giĕng ‘noh lu oh pơ tơm băl năm tơ̆ Hnam joăt joe vă pơ hrăm tôn chĭng, oei đe buăl ‘noh đei lơ buăl năm tơ̆ âu vă đŏk hla ar.

      Kŭm hăm pơ vei khŭl tôn chĭng, Hnam trưng hŏk jăl 2 Y Ngông Niê Kđăm oei hơ nơ̆ng pơ gơ̆r rim ‘măng pơ long ƀơm truh tơ drong vei răk joh ayŏ joăt joe. Nhen lơ̆m năr Tơ băt năr Thây kô pơ tho Việt Nam (20/11) âu ki, hnam trưng hlôi pơ gơ̆r ‘măng pơ long pơm dôm tơ mam joh ayŏ Êđê ‘măn ăn kơ pơ đĭ thây kô păng hŏk tro. Kiơ̆ đơ̆ng noh hlôi iok đei 54 tơ mam joăt joe kơ bơ ngai Êđê nhen: hơ băn ao tanh, reo, hră, klel, get đak....

      Mŏ Nguyễn Thị Thúy Ngọc, kô vei lăng khŭl tơ roi, đơ̆ng iŏk yua ‘măng pơ long, hnam trưng đei tơ drong tơ plih trong chao kơ blŭng giĕng, tơ gep hơ dai vă kơ hŏk tro chă hơ len lăng păng tơ roi kơ dih găh tơ mam ‘lơ̆ng mă đe oh tơ chă răk đei. Hăm trong tơ plih âu, ưh khan lăp thây kô pơ tho mă hok tro kŭm jang kiơ̆ tôch kơ ‘lơ̆ng. Đe oh nŭih, pơ̆n tơ roi tơ ƀôh găh tơ mam mă sư tơ chă răk đei hăm pơ đĭ 2 nơ̆r Êđê – Yuăn. Kŭm hăm ‘noh, dôm tơ drong jang kơ hnam trưng đei đe oh vang jang hơ drin hloh, tôm hloh.

Mă mônh ‘noh găh joh ayo kơ dŏ soang dăh mă rim hŏk pơ hrăm tơ pôl, pơ gơ̆r năr hŏk pơ hrăm joăt joe ‘noh đe oh đĭ đăng tă kơ hrŭk hơ băn ao bơ ngai Êđê ngăl, lĕch tơ̆ cham hnam trưng hơ soang tơ pôl ‘noh đe oh tôch kơ chhôk hơ iă. Dang ei hnam trưng đei dơ̆ng hnam kơ jung, khŭl tôn chĭng đơ̆ng đe oh ‘noh ƀôh tơ drong ‘nă hal đơ̆ng đe oh roi ‘lŏ, đe oh roi lui ngeh păng lai yơ kŭm apĭnh kô ‘noh kô ăi đei tơ drong pơ long kiơ ưh song lu oh vang pơ long lăng.

      Sơ năm hŏk âu, Hnam trưng hŏk jăl 2 Y Ngông Niê Kđăm đei 11 lăm hăm 322 hŏk tro, lơ̆m noh 95% ‘noh hok tro bơ ngai Êđê. Lơ̆m cham hnam trưng ming man 1 Hnam joăt joe - Thư viện pơm kiơ̆ hnam kơ jung kơ bơ ngai Êđê, đei pơm đang lơ̆m khei 8 sơ năm sơ̆. Lơ̆m noh pơ dă um rup bơ̆ jang đơ̆ng hnam trưng kiơ̆ rim jơ hngơr, dôm tơ mam găh joh ayŏ joăt joe kơ bơ ngai Êđê păng ‘măn dôm hơ nih lê̆ hla ar lơ kơ loăi. ‘Nâu jĭ hơ nih hưch hanh vă đơ̆ng lơ hok tro, hơ nih đe oh gơh đok dôm hla ar kơ dih ‘meh dăh mă pơ hrăm tôn chĭng păng chă hơ len găh jŏh ayŏ bơ ngai Êđê.

Hnam joăt joe - Thư viện đei pơm kiơ̆ thoi hnam kơ jung Êđê, hơ met hơ jih đŏk hla ar ăn kơ hok tro đŏk hiôk ‘ngoăih jơ hŏk

Thây Hoàng Long Điện, Kơ dră vei lăng hnam trưng tơ băt, kŭm hăm pơ tho pơ hrăm chư, tơ drong hlôh vao, hnam trưng gô hơ nơ̆ng tơ lĕch lơ tơ drong jang mă lăp vă pơ tho trong oei sa, tưk tơ iung jơ hngơ̆m hưch ‘mêm păng tơ drong pơ yom, vei răk joh ayŏ hăm đe oh hŏk tro.

Vă jê̆ truh âu kơnh hnam trưng gô tơ lĕch trong jang hơ nơ̆ng pơ vei dôm tơ drong jang âu, mă loi ‘noh jĭ tơ drong jang pơ tho pơ hrăm trong arih sa tơ klep hăm joh ayŏ joăt joe kơ kon pơ lei kon kông kơ tă hơ nih, nhen pơ vei khŭl tôn chĭng păng hơ tŏk tơ iung dơ̆ng dôm tơ drong jang nai nhen vang pơ long, chă hơ len lăng, tơ roi tơ ƀôh găh dôm tơ mam joh ayŏ kơ bơ ngai Êđê păng lang să rim tơ drong jang. Kăl kơ pơ gơ̆r hơ nơ̆ng, đei dôm oh lĕch đơ̆ng hnam trưng ‘noh đei dôm oh ‘nao mơ̆t păng đe oh ‘nao mơ̆t gô hơ nơ̆ng đei pơ hrăm lơ̆m hơ nih ‘nâu.

      Pơ tho pơ hrăm trong arih sa tơ klep hăm chă hơ len lăng vei răk joh ayŏ joăt joe ‘noh jĭ trong jang hơ iă đơ̆ng hnam trưng hŏk jăl 2 Y Ngông Niê Kđăm. Dôm tơ drong jang âu ưh khan lăp pơm hơ nih vă hŏk tro ngôi pơ chơt, vă kơ băt đơ̆ng rŏng dôm jơ hŏk kơ hret mă oei tơ gop rong vei, tưk tơ iung tơ drong hưch ‘mêm jŏh ayŏ joăt joe hăm rim jơ hnơr hŏk tro.

            H’Xíu H’mốc : Chih

Thuem: tơ blơ̆