VOV4.bahnar - Lơ̆m dôm sơ năm âu ki, hơ dai hăm tơ mơ̆t jên jang anih jang kăl, hơ tŏk tơ iung jang sa, hơ tŏk ‘lơ̆ng tơ drong arih sa kon pơ lei, tơ drong jang tơ ring tơ rang ‘nao tơ̆ dêh chả Dak Nông oei lăng kăl tơ drong pơ gơ̆r jang sa ‘moi kiơ̆ hơ tŏk tơ iung tơ drong jang hơp tak xăh. ‘Nâu kŭm jing tơ drong hơ găt khŏm jang đei hăm rim xăh hơ drol kơ đei drơ̆ng xăh jang đang ‘lơ̆ng tơ ring tơ rang ‘nao.

Lơ̆m dôm tơ drong hơ găt tơ ring tơ rang ‘nao, tơ drong hơ găt kơ sô̆ 13 găh pơ gơ̆r jang sa đei hơ năp jang gĭt kăl, pơ trŭt hơ tok tơ iung mŭk drăm tơ̆ tơ ring tơ rang. Vă jang kiơ̆ đei tơ drong hơ găt kơ sô̆ 13, rim hơp tak xăh hlôi kơ chăng hơ tŏk hơ năp jang, roi ‘năr roi sơ kơ̆t hơ dăh hơ năp jang lơ̆m tơ drong pơ jing tơ ring tơ rang ‘nao tơ̆ tơ ring.

Kiơ̆ tơ drong hơ găt, xăh đei drơ̆ng jang đang ‘lơ̆ng tơ ring tơ rang ‘nao athei đei tŏ sĕt hloh đơ̆ng 1 tơ drong jang pơ gơ̆r jang sa đei grŭp jang hơ dai hơp tak xăh. Hăm 7 xăh dang ei tŏk bŏk đei dêh char set hơ len drơ̆ng jang đang ‘lơ̆ng tơ ring tơ rang ‘nao ‘noh đei akŏp 11 hơp tak xăh tŏk bŏk bơ̆ jang đei iŏk yua, tơ gop pơ trŭt hơ tŏk tơ iung jang sa, tĕch mơ dro, hơ tŏk ‘lơ̆ng tơ drong arih sa kơ kon pơ lei.

Xăh Cư K’nia, apŭng Cư Jút, dêh char Dak Nông đei hơp tak xăh mơ dro sa tĕch tơ mam choh jang sa ăn kon pơ lei păng Hơp tak xăh Choh jang sa Tiến Thành. Kiơ̆ kơ ƀok Bùi Xuân Nghĩa, Kơ dră vei lăng hơp tak xăh Tiến Thành, anih jang tŏk bŏk pơm tơ lĕch tiu păng cheh phe kiơ̆ pơ kăp ‘lơ̆ng Organic păng tŏk bŏk pơ long pơm tơ lĕch cheh phe ƀôt. Hơp tak xăh oei jang hơ dai hăm 1 hơp tak xăh tơ ring nai pơm tơ lĕch, răt iŏk ƀa ST 24 ăn kon pơ lei. Lơ̆m kơ plăh pơm tơ lĕch, Hơp tak xăh pơ gơ̆r pơ hrăm, pơ tho khoa hŏk ki thuơ̆t ăn kơ kon pơ lei jang chŭn mir vă hơ tŏk ‘lơ̆ng iŏk yua tơ mam ‘lơ̆ng.

Hơp tak xăh choh jang sa – mơ dro sa- pơ vih pơ văn rơ goh Hoàng Nguyên

Xăh Thuận Hà, apŭng Đắk Song, dêh char Dak Nông đei hơp tak xăh choh jang sa – mơ dro sa- pơ vih pơ văn rơ goh Hoàng Nguyên păng Hơp tak xăh choh jang sa Thuận Phát. Yă Trần Thị Thu, Kơ dră vei lăng hơp tak xăh Hoàng Nguyên tơ băt, khei ‘năr âu ki, anih jang hlôi chă trong vă jang păng akŏm kon pơ lei pơm tơ lĕch tiu kiơ̆ trong rơ goh, hăm hơ găt teh să 100 hek tar. Gơ nang đơ̆ng noh, rim bơ ngai jang kơ Hơp tak xăh đei iŏk yua lơ, mă đơ̆ng kơ jă tiu tơ jur lơ. Sơ năm 2020, Hơp tak xăh tĕch tơ lĕch tơ̆ teh đak đe 400 tấn tiu rơ goh hăm kơ jă lơ hloh 2 ‘măng pơ têng hăm anih tĕch mơ dro, kơ na kon pơ lei jang chŭn mir tôch kơ chhôk hơ iă. Tơ drong pơm tơ lĕch tiu rơ goh lơ̆m tơ ring roi ‘năr roi đei jang tih, ‘lơ̆ng păng sơ đơ̆ng ƀiơ̆.

Tơ̆ lơ tơ ring nai tơ̆ dêh char Dak Nông rim Hơp tak xăh hlôi păng tŏk bŏk hơ tŏk hơ năp jang pơ gơ̆r jang sa, hơ tŏk iŏk yua ăn kon pơ lei. Xăh Đắk Sôr, apŭng Krông Nô đei Hơp tak xăh choh jang sa – mơ dro sa – pơ vih pơ văn tiu rơ goh Đắk Sôr hăm 30 ‘nu jang hơ dai păng Hơp tak xăh choh jang sa rơ goh Thành Phát hăm 12 ‘nu jang hơ dai.

Hăm Hơp tak xăh mơ dro sa păng pơ vih pơ văn Bình Minh tơ̆ xăh Ea Pô, apŭng Cư Jút hlôi jang hơ dai hăm kon pơ lei pơ tăm cheh phe păng tiu kiơ̆ hơ găt ‘lơ̆ng 4C, VietGAP. Anih jang kŭm jang hơ dai hăm rim kŏng ti vă răt pơ đĭ tơ mam ăn kơ kon pơ lei jang chŭn mir...

Lei lăi thoi noh, hăm lơ trong jang tơ gŭm, Hơp tak xăh choh jang sa – mơ dro sa – pơ vih pơ văn – asong tŏk iŏk jên Đại Đồng Tiến păng hơp tak xăh Tân Thịnh, xăh Quảng Khê, apŭng Đắk Glong hlôi sơng đei 47 ‘nu bơ ngai vang jang hơ dai pơm tơ lĕch cheh phe kiơ̆ pơ kăp ‘lơ̆ng UTZ. Lơ̆m kơ plăh jang hơ dai, Hơp tak xăh hơ len lăng, dăr lăng tơ drong pơm tơ lĕch đơ̆ng kon pơ lei păng pơ truh phŏng, jên jang, ki thuơ̆t... vă iŏk đei plei lơ, tơ mam ‘lơ̆ng kiơ̆ pơ kăp UTZ.

Ƀok Bùi Hoa Thám, Phŏ Kơ dră vei lăng Jơ nŭm Hơp tak xăh dêh char Dak Nông, khei ‘năr âu ki, khŭl kơ dră rim tơ ring ling lang pơm tơ drong hiôk vă kơ hơp tak xăh hơ tŏk tơ iung jang sa, tĕch mơ dro. Rim tơ ring đei lơ Hơp tak xăh roi ‘năr roi bơ̆ jang đei iŏk yua, ‘lơ̆ng. Mă loi ‘noh jĭ rim Hơp tak xăh hlôi hơ tŏk ‘lơ̆ng hơ năp jang đơ̆ng kơ dih lơ̆m pơ jing tơ ring tơ rang ‘nao tơ̆ tơ ring, tơ gŭm kon pơ lei pơ gơ̆r jang sa ‘lơ̆ng hloh. Lơ̆m noh, rim hơp tak xăh đei hơ năp jang ‘lơ̆ng lơ̆m tơ drong tơ gŭm kon pơ lei tơ plih ‘long pơ tăm, kon tơ rong păng tơ mơ̆t yua khoa hŏk ki thuơ̆t lơ̆m jang sa vă hơ tŏk plei lơ, tơ mam ‘lơ̆ng.

Rim Hơp tak xăh roi ‘năr roi lăng kăl jang hơ dai pơm tơ lĕch, tĕch tơ mam păng pơm tơ lĕch kiơ̆ kơ jă kăp gĭt. Đơ̆ng noh, pơm tơ lĕch choh jang sa roi ‘năr roi đei kơ jă mŭk drăm lơ, tơ gop hơ tŏk iŏk yua ăn kon pơ lei jang chŭn mir.

Thuem: Tơ blơ̆