VOV4.Bahnar - Tơ drong jang đei păng vei kơ jăp tơ drong hơ găt găh vei sơ đơ̆ng lơ̆m pơ jing tơ ring tơ rang ‘nao đei tơ drong gĭt kăl, tơ gop ƀơm ‘lơ̆ng hăm rim grŭp hơ găt nai. Tơ̆ Dak Nông hlôi pơ jing păng pơ̆ih să lơ tơ drong jang vei sơ đơ̆ng tơ̆ rim pơ lei pơ la nhen dôm kâu lak ƀô̆ sơ năm mơ lôh tang găn pơm glăi, tơ nang ‘măng, teng neng păng camera vei sơ đơ̆ng. Kiơ̆ đơ̆ng noh tơ gop gĭt kăl lơ̆m tơ drong jang đang tơ drong hơ găt găh vei sơ đơ̆ng lơ̆m pơ jing tơ ring tơ rang ‘nao.

Kiơ̆ hơ len lăng đơ̆ng Anih pơ gơ̆r jang rim tơ drong jang tơm teh đak dêh char Dak nông, tơ drong hơ găt vei sơ đơ̆ng ‘noh jĭ 1 lơ̆m dôm tơ dỏng hơ găt hơ nat bơ̆ jang, yua kơ sư pơ mơ̆ng lơ̆m lơ tơ drong, lơ khŭl jang vang 1 jơ hngơ̆m păng ƀônh kơ đei tơ plih. Mă lei, băt hơ dăh ‘nâu jĭ tơ drong hơ găt gĭt kăl hloh, đei tơ drong vei sơ đơ̆ng ăn tơ drong iŏk đei păng vei kơ jăp lơ tơ drong hơ găt nai kơ na dôm sơ năm âu ki, rim kơ dră đảng, kơ dră tơ ring ling lang bơ ngơ̆t truh chĕp kơ̆l pơ gơ̆r bơ̆ jang.

Rim sơ năm, kơ dră đảng, kơ dră rim tơ ring adoi đei tơ chơ̆t, tơ lĕch jang găh tơ drong jang vei sơ đơ̆ng. Rim tơ ring athei pơ gơ̆r bơ̆ jang kiơ̆ đei iŏk yua tơ drong jang đĭ đăng kon pơ lei vei lăng sơ đơ̆ng teh đak. Khŭl jang kŏng an rim tơ ring kơ chăng pơ jing tơ drong jang găh vei sơ đơ̆ng chĭnh trĭ păng sơ đơ̆ng lơ̆m tơ pôl, tơ klep hăm tơ drong yan âu tơ̆ tơ ring, hơ met ‘lơ̆ng dôm tơ drong krê hơ mơt, ư̆h kơ ‘lơ̆ng tơ̆ tơ ring.

Mă hơ dăh, apŭng Đắk R’lấp, dêh char Đắk Nông hlôi pơ jing păng pơ̆ih să rim tơ drong jang vei sơ đơ̆ng tơ̆ rim pơ lei pơ la nhen rim kâu lak ƀô̆ sơ năm mơ lôh tang găn pơm glăi, tơ nang ‘măng, teng neng păng camera vei sơ đơ̆ng... Kiơ̆ đơ̆ng noh, apŭng ư̆h khan lăp hơ tŏk ‘lơ̆ng hơ năp jang đơ̆ng khŭl jang tơm ‘noh kŏng an, khŭl linh, kon pơ lei vei lăng kơ dih mă oei hơ vơn hloi tơ pôl kon pơ lei vang vei sơ đơ̆ng. Yua thoi noh, 9/9 xăh lơ̆m apŭng adoi iŏk đei tơ drong hơ găt vei sơ đơ̆ng.

Tơ̆ apŭng Đắk Mil, rim kơ dră, rim anih jang, khŭl grŭp hơ tŏk loi dơ̆ng tơ drong jang hơ dai, pơ gơ̆r lơ tơ drong jang nhen tơ lĕch jang tơ drong jang Đĭ đăng kon pơ lei vei lăng sơ đơ̆ng teh đak; tơ roi tơ băt ăn kang ƀô̆, kon pơ lei hơ tŏk ‘lơ̆ng đon hlôh vao găh tơ drong ‘lơ̆ng, tơ drong gĭt kăl đơ̆ng tơ drong jang vei lăng sơ đơ̆ng. Đơ̆ng noh, tơ drong vei sơ đơ̆ng tơ pôl tơ̆ rim xăh đei vei sơ đơ̆ng ‘lơ̆ng, rim kơ loăi pơm glăi, pơm yoch tơ pôl păng dôm tơ drong pơm glăi khôi luơ̆t đei tang găn. Rim tơ drong jang găh kâu lak ƀô̆ tang găn teh dong băl lơ̆m ŭnh hnam, rông ƀôt chă vei lăng sơ đơ̆ng kơ dih, hnam trưng hŏk sơ đơ̆ng đei pơ vei, hơ tŏk iŏk yua.

Tơ̆ apŭng Đắk Song, tơ drong jang “Teng neng vei sơ đơ̆ng” hlôi tơ gop ‘lơ̆ng lơ̆m tơ drong pơ jing tơ drong hơ găt vei sơ đơ̆ng lơ̆m pơ jing tơ ring tơ rang ‘nao. Hơ drô̆ tơ̆ thôn 7 păng thôn 8 xăh sơ lam Thuận Hà, hlôi chô̆ đei 5 tŏ teng neng păng hơ met tơ̆ dôm hơ nih tơm akŏm bơ ngai arih sa. Mưh teng neng đei teh, re hơ tăih truh 1,5 km. Đơ̆ng rŏng kơ tơ̆ng teng neng re, gô đei 1 grŭp vei sơ đơ̆ng năm hloi tơ̆ hơ nih ‘noh vă băt hơ dăh păng hơ met ‘lơ̆ng tơ drong. Ƀok Nguyễn Đình Lương, Kơ dră Kŏng ăn xăh Thuận Hà, apŭng Đắk Song tơ băt: pơ têng hăm hơ drol sơ̆, tơ drong sơ đơ̆ng lơ̆m dôm thôn 7, 8 đhlôi đei tơ plĭh ‘lơ̆ng lơ, mă loi ‘noh jĭ iŏk đơ̆ng đei tơ drong jang teh teng neng ‘noh tam mă đei ƀôh 1 ‘măng tơ tông klĕ hơ yơ. Đei yua hơ dăh ‘lơ̆ng hloh đơ̆ng tơ drong jang ‘noh jĭ tơ iung đei đon hlôh vao đơ̆ng kon pơ lei pơm kiơ̆ tơ păt khôi luơ̆t, hơ tŏk ‘lơ̆ng đon kơ chăng, hơ drin vang tơ kêng pơm yoch. Kiơ̆ đơ̆ng noh, anih jang kơ pal tơ tom iung jang, tang găn bơ̆ jang đơ̆ng rim kơ loăi pơm yoch păng sek tơ lang rim tơ drong đei ƀôh ƀơm truh vei sơ đơ̆ng tơ pôl.

Kiơ̆ hơ len lăng đơ̆ng Anih pơ gơ̆r jang rim tơ drong jang tơm teh đak dêh char Dak Nông, đơ̆ng rŏng hloh 10 sơ năm bơ̆ jang kiơ̆ Tơ drong jang tơm teh đak pơ jing tơ ring tơ rang ‘nao jăl jang 2010-2020, tơ drong jang vei sơ đơ̆ng lơ̆m tơ ring tơ rang đei lơ tơ plih ‘lơ̆ng. Lơ̆m noh, khŭl linh kŏng an hlôi kơ chăng jang tơ gŭm, tơ lĕch ăn kơ dră đảng, kơ dră tơ ring bơ̆ jang kiơ̆, hơ met pơ ‘lơ̆ng tơ tom dôm hơ nih đei ƀôh tơ hil băl, tơ gar băl, pơm tơ drong hiôk ăn tơ drong tơ lĕch jang rim tơ drong jang kŭm nhen hơ năp jang hơ tŏk tơ iung mŭk drăm – tơ pôl tơ̆ tơ ring.

Truh dang ei lơ̆m dêh char Dak Nông đei 45/60 xăh hlôi jang đei păng tŏk bŏk vei kơ jăp tơ drong hơ găt găh vei sơ đơ̆ng hăm kơ sô̆ 75%. Lơ̆m tơ drong hơ tŏk tơ iung hrei ‘nâu, vă vei kơ jăp, hơ tŏk ‘lơ̆ng iŏk yua âu, athei hơ drin ư̆h kơ pơ dơ̆h păng hrơ̆ch 1 ‘măng đơ̆ng kơ dră đảng, kơ dră tơ ring păng kon pơ lei lơ̆m pơ jing tơ ring tơ rang ‘nao. Dêh char Dak Nông tŏk bŏk pơ trŭt jang kiơ̆ pơ jing tơ ring tơ rang ‘nao hơ tŏk ‘lơ̆ng, athei lơ hloh dơ̆ng tơ drong vang jang đơ̆ng pơ đĭ khŭl jang chĭnh trĭ, rim răih kon pơ lei, jơ hngơ̆m đon hơ drin đơ̆ng khŭl jang tơm, ư̆h kơ ăn pơm pơ hơi, ư̆h kơ chăng.

Thuem: Tơ blơ̆