VOV4.Bahnar - Lơ̆m pơ jing tơ ring tơ rang ‘nao, hơ năp jang đơ̆ng khŭl jang Đoan hơ druh tơ dăm tôch kơ gĭt kăl, mă loi ‘noh jĭ lơ̆m tơ drong jang tơ roi tơ băt păng hơ vơn bơ ngai jang. Tơ drong jang đơ̆ng sơ năm mơ lôh ling lang tơ năp, hơ bĕch hơ bal, mơ̆ng lơ̆m tơ drong yan âu tơ̆ tơ ring. Lơ̆m khei ‘năr dang ei, tơ drong tơ gŭm dôm ŭnh hnam đei tơ drong arih sa mơ mat tat yua đơ̆ng ư̆h kơ ‘lơ̆ng đơ̆ng jĭ hơ buh Covid-19 ‘noh tôch kơ kăl. Tơ̆ xăh hơ tăih hơ tŏ Ia Blứ, apŭng Chư Pưh, dêh char Gia Lai, khŭl jang Đoan hơ druh tơ dăm hlôi tơ ƀôh đei tơ drong ‘nâu, lơ̆m noh um rup đơ̆ng drŏ kăn Bí thư Đoàn xăh  Trương Thị Ngọc Lan ‘noh ƀôh hơ dăh.

Jơ bơ̆ jang hlôi đĭ đơ̆ng đunh bơ̆ih mă lei Trương Thị Ngọc Lan, Bí Thư Đoàn xăh Ia Blứ (apŭng Chư Pưh, dêh char Gia Lai) păng 1,2 ‘nu đoàn viên hơ druh tơ dăm oei dơ̆ng Anih vei lăng kon pơ lei xăh, sơng iŏk tơ mam đơ̆ng choh jang sa, tơ mam đơ̆ng kon pơ lei tơ gŭm ăn rim tơ ring đei jĭ Covid-19. Dôm tơ mam tơ gŭm găh lơ ‘noh jĭ tơ mam yua kăl, ‘nhot sa, plei ‘long hơ drih, găng ti, che gom, hơ băn ao vei lăng tơ gŭm... Đĭ đăng dôm tơ mam kiơ kon pơ lei gơ̆ih truh tơ tĕnh đei đe buăl mơ lôh sơng iŏk, rơ̆ih hơ met. Đei khŭl jang gô đei chơ truh rim hơ nih ăn oei hơ drô̆ dăh mă khŭl linh bơ̆ jang tơ drong jang tơ̆ hơ nih tang găn jĭ tơ ring; đei khŭl jang đei chơ truh Bình Dương, pơ lei tơm Hồ Chí Minh tơ gŭm ăn tơ ring đei jĭ. Nguyễn Thị Hà, oei tơ̆ thôn Thiên An, xăh Ia Blứ hơ nhăk tơ mam tơ gŭm truh, tơ băt: 

 “Kiơ̆ krao hơ vơn đơ̆ng mŏ Trương Thị Ngọc Lan, Bí thư Đoàn xăh ‘noh tơ mam tŏ sĕt jơ hngơ̆m đon lơ, ĭnh kŭm tơ gop tŏ sĕt mi tôm vang tơ gŭm hăm rim bơ ngai vă gơ̆ih truh kon pơ lei hơ nih ăn oei hơ drô̆ păng kon pơ lei tơ̆ tơ ring đei jĭ. Ĭnh kŭm vang tơ gop kŭm hăm rim bơ ngai, tơ mam tŏ sĕt jơ hngơ̆m đon lơ, ‘mĕh jĭ hơ buh jăh yak hloh vă rim kon pơ lei sơ đơ̆ng jang sa”.

Mŏ Lan (păh ‘ma) păng tơ dăm xăh Ia Blứ tơ gŭm kon pơ lei dơ nuh hin

Hơ nơ̆ng rim năr hao gre hon đa, tơ dăh bơ̆ jang ư̆h kơ hrăt, Lan ‘noh năm ngôi păng pơ lung dôm ŭnh hnam dơ nuh hin lơ̆m xăh. Ƀok Nguyễn Văn Doan oei tơ̆ thôn Thiên An, xăh Ia Blứ đĭ vă jê̆ 60 sơ năm, tŏk bŏk rong mŏ sư hloh 70 sơ năm đĭ kră pă jăng. Bre mŏ oh ƀok Doan tă ư̆h kơ đei kon hơ ‘lơ̆p ngăl, ư̆h kơ đei tơ drong jang, arih gơ nang băl lơ̆m hnam  Đại Đoàn Kết so sĕch. ‘Nao iŏk đei tơ drong tơ gŭm đơ̆ng tơ ring păng pơ đĭ kơ dih Bí thư đoàn xăh, ƀok Doan hrĭ jơ hngơ̆m: 

“ Ƀar ‘nu mŏ oh nhi kŭm mơ mat tat, mŏ ĭnh ‘noh đa jĭ jăn ư̆h kơ gơh jang kiơ, ĭnh ‘noh kŭm ư̆h kơ đei tơ drong jang. ‘Măng sŏng sa lơ̆m hnam ‘noh đei kiơ sa ‘nei, nhen ‘nhot, mi tôm. Đei jên ‘noh năm tơ̆ kơ chơ oei ư̆h ‘noh sŏng săi hăm đak măm, ‘nhot đĕch. Khŭl hơ druh tơ dăm kŭm đa tơ gŭm mi tôm, phe păng đak măm ‘noh ĭnh kŭm dă ƀiơ̆, khŭl hơ druh tơ dăm đei jơ hngơ̆m mơ mat hăm mŏ oh nhi ‘noh tôch kơ gĭt”.

‘Ngoăih kơ dôm tơ mam tơ gŭm dei dei ‘măn ăn bơ ngai dơ nuh hin păng đe oh hŏk tro tơ̆ tơ ring, Khŭl hơ druh tơ dăm xăh Ia Blứ oei hơ nơ̆ng krao hơ vơn vă tơ gŭm dôm ŭnh hnam găh trong jang sa vă kon pơ lei đei dơ̆ng tơ drong hiôk hơ drin, nhen tơ gŭm pơ be yŏng, ‘long hơ drĕch, man hnam ăn ŭnh hnam dơ nuh hin.

Khŭl hơ druh tơ dăm xăh Ia Blứ, apŭng Chư Pưh, dêh char Gia Lai tă kơ băt hơ dăh tơ drong arih kơ yŏng đe sư kŭm tôch kơ mơ mat. Trương Thị Ngọc Lan tŏk bŏk 1 drô̆ vei lăng 2 ‘nu kon drŏ kăn ‘lơ̆p. Klo sư jĭ plei lĕn ăl păng tŏk bŏk đom tơ̆ anih đei jĭ pơ lei tơm Hồ Chí Minh. Lan lăp ôn tơ drong sơ ‘ngon păng tơ chĕng athei hơ nơ̆ng jing bơ ngai tơ gŭm kơ jăp, jing tơ ‘ngla pơm jŭk yŭk trong hơ lâu kơ hơ druh tơ dăm tơ ring. Trương Thị Ngọc Lan tơ roi:

“Truh dang yơ ba jô̆ truh dang noh, tơ drong jang oei athei vei sơ đơ̆ng mă dang ei mơ mat tat ‘noh rim bơ ngai kŭm mơ mat tat atŭm, yua kơ dih ư̆h kơ pŭn đĕch. Ĭnh băt hơ dăh bơ̆ih, tơ drong jang ba oei jang, tơ drong thoi noh ĭnh kŭm ư̆h kơ gơ̆h pơm kiơ nai. Brŏk tơ̆ hnam ‘noh bơ ngơ̆t tơ drong jang lơ̆m hnam, năm jang ‘noh oei athei bơ ngơ̆t năm jang, mă dang ei bơ ngơ̆t tơ tăm kŭm ư̆h kơ đei lĕch kiơ mơ̆n”.

Dôm tơ mam krao hơ vơn đơ̆ng kon pơ lei vă tơ gŭm tơ ring đei jĭ

 Phạm Thị Thu Thảo, Bí thư Đoàn apŭng Chư Pưh, dêh char Gia Lai tơ băt: Sơ năm 2020, Ia Blứ đei Anih vei lăng kon pơ lei apŭng rơ̆ih pơm xăh pơ long găh hơ tŏk tơ iung mŭk drăm - tơ pôl. Kiơ̆ kơ ‘noh, Khŭl hơ druh tơ dăm kŭm băt hơ dăh hơ năp jang đơ̆ng kơ dih. Xăh hlôi jang tơ gep rim kon jên pha ra băl tơ mơ̆t jên jang dang 1,7 ti hlak jên tơ gŭm hơ drĕch ‘long pơ tăm, kon tơ rong. Truh dang ei, xăh hlôi hơ tŏk tơ iung đei 720 hek tar ‘long sa plei, pơ be tŏk vă jê̆ 11.000 tŏ, hloh 3 hek tar mơ mur hơ drông pơm brai păng hloh 400 hek tar chĕh phe. Lơ̆m noh đei lơ ŭnh hnam đoàn viên, hơ druh tơ dăm hlôi yak tŏk đei ƀôh. Hăm tơ drong jang ‘lơ̆ng đơ̆ng Khŭl chĕp kơ̆l pơ gơ̆r Đoàn xăh, mă loi ‘noh jĭ Bí thư Trương Thị Ngọc Lan, dôm tơ drong jang hlôi bơ̆ jang kiơ̆ adoi ƀlep hăm yan âu kơ na iŏk đei tơ drong tơ gŭm đơ̆ng đoàn viên hơ druh tơ dăm.

“ Hăm mŏ Trương Thị Ngọc Lan, Bí thư đoàn xăh Ia Blứ ‘noh jĭ 1 bí thư bơ̆ jang tôch kơ pơ nam, tơ năp hăm tơ drong jang đoàn tơ̆ tơ ring. Mă đơ̆ng ŭnh hnam tơ ƀơ̆p lơ mơ mat tat, klo sư  jĭ ăl tŏk bŏk gô tơ gep plei lĕn lơ̆m pơ lei tơm Hồ Chí Minh, mă lei yua kơ jĭ hơ buh kơ na athei gô tam gơ̆h tơ gep, oei 1 drô̆ mŏ Lan jang răh tơ drong jang teh đak, vei lăng răh tơ drong jang lơ̆m ŭnh hnam păng rong 2 ‘nu kon ‘lơ̆p. Mă lei yak hloh mơ mat tat mŏ Lan ling lang đĭ jơ hngơ̆m hăm rim tơ drong jang mă anih jang đoàn apŭng tơ lĕch jang păng đoàn xăh Ia Blứ ling lang jing anih jang đang hơ drol lơ̆m tơ drong jang đoàn tơ̆ apŭng. Âu ki lơ̆m tơ drong jang tang găn jĭ, mŏ Lan kŭm nhen đoàn xăh Ia Blứ adoi iŏk đei hla ar pôk pơ ư đơ̆ng Anih jang đoàn dêh char, anih jang đoàn apŭng.”

Hăm tơ drong jang tơ năp, jang ‘lơ̆ng păng hơ bĕch hơ bal lơ̆m tơ drong jang Đoàn, Trương Thị Ngọc Lan tŏk bŏk tơ ƀôh tơ drong jang ‘lơ̆ng, tŭn pran rim tơ drong jang đoàn tơ̆ Ia Blứ, tơ gŭm hơ druh tơ dăm pơ jing tơ drong jang sa. Păng kŭm kiơ̆ đơ̆ng noh, Đoàn xăh Ia Blứ hơ nơ̆ng jang đang hơ gei hloh rim hơ năp jang, roi ‘năr roi đei lơ tơ gop ‘lơ̆ng ăn tơ pôl, tơ gop gĭt kăl lơ̆m tơ drong pơ jing tơ ring tơ rang ‘nao tơ̆ tơ ring.

Hoàng Qui: Chih

Thuem: Tơ blơ̆