VOV4.Bahnar - Tơ drong jang tơ roi tơ băt hơ tŏk ‘lơ̆ng đon băt kơ chăng tang găn jĭ Covid-19 tơ̆ tơ ring tơ rang đei tơ drong ‘lơ̆ng tôch gĭt kăl, mă loi ‘noh lơ̆m khei ‘năr đei lơ bơ ngai ‘nao brŏk đơ̆ng tơ ring đei jĭ. Mŏ Nguyễn Thị Phương (bơ ngai Tày)oei tơ̆ xăh Cư M’gar, apŭng Cư M’gar, dêh char Dak Lak đei trong tơ roi tơ băt tôch kơ hơ gei, ‘noh jĭ pơ đơ̆k nơ̆r ‘nao ăn hơ ri Then kiơ̆ hơ năn tang găn jĭ Covid-19. Nơ̆r hơ ri hmă, ƀônh kơ hlôh, đei lơ tơ drong hơ iă hlôi đei mŏ hơ ri hăm ƀơ̆r hơ ri hơ bôn hiôk kiơ̆ kơ tar tính, pơm ăn bơ ngai mơ̆ng hiôk lơ̆m jơ hngơ̆m. Dôm video đơ̆ng mŏ Phương đei tăh lơ̆m trang mạng tơ pôl Facebook, Youtube hlôi đei lơ bơ ngai ‘mĕh mơ̆ng, lăng.

            ‘Nâu jĭ dôm nơ̆r hơ ri yua đơ̆ng mŏ Nguyễn Thị Phương, bơ ngai Tày, oei tơ̆ thôn 5, xăh Cư Mgar, apŭng Cư Mgar, dêh char Dak Lak chă jô̆ pơ đơ̆k nơ̆r kơ dih kiơ̆ hơ ri Then kơ bơ ngai Tày - Nùng păng hơ ri hloi. Lơ̆m nơ̆r ƀai hơ ri yua đơ̆ng mŏ Phương jô̆ pơ đơ̆k: “Tơ jră jĭ nhen tơ jră ayăt mơ̆t tơ gar, bơ̆n vang mĭnh jơ hngơ̆m tang găn jĭ Covid….  Rim ‘nu, bu bu kŭm jing khŭl linh, bơ̆n vang hơ dai băl khŏm yak hloh”...

Hăm nơ̆r hơ ri hmă mă lei hlôi tơ roi 1 trong tôm tơ drong athei “ tơ jră jĭ nhen tơ jră ayăt” đơ̆ng Thủ tướng teh đak, nơ̆r pơ kăp “5K” đơ̆ng Anih tơm vei lăng găh jang pơ gang lơ̆m tang găn jĭ. Hơ dai hăm ‘noh vang tơ gŭm, mơ nat hăm tơ drong gleh hrat, plang jơ hngơ̆m đơ̆ng khŭl y ƀak si, khŭl kŏng an, khŭl linh... lơ̆m tang găn jĭ. Kiơ̆ đơ̆ng ‘noh, pơ lung rim bơ ngai tơ păt pơm kiơ̆ dôm tơ drong hơ găt tang găn jĭ, đei jơ hngơ̆m đon hiôk, lui ngeh gô tang găn kĕ jĭ hơ buh păng vih hơ lơ̆k dơ̆ng hăm tơ drong arih sa sơ đơ̆ng hiôk.

Rup mŏ Nguyễn Thị Phương hơ ri lơ̆m mạng tơ pôl

Hăm lăp đơ̆ng rŏng 2,3 năr tăh lơ̆m trang mạng tơ pôl Facebook păng Youtube, ƀai hơ ri hlôi đei rơ bâu ‘nu lăng, kơ hrĕng ‘nu bơ ngai chih pơ ma păng gơ̆ih ăn băl chă lăng. ‘Nhŏng Nguyễn Trung Hải, bơ ngai Tày, oei tơ̆ thị trấn Quảng Phú, apŭng Cư Mgar lăng video đei tăh lơ̆m Facebook tơ băt:

             “Kiơ̆ đơ̆ng lăng video mŏ Phương hơ ri ĭnh ƀôh tôch kơ hiôk, đơ̆ng jô̆ nơ̆r, ƀơ̆r hơ ri, kơ tar re. Ƀai hơ ri hlôi pơ lung jơ hngơ̆m kon pơ lei kơ rim hơ drĕch hơ drŭng mĭnh jơ hngơ̆m đon tơ jră jĭ, hăm khei ‘năr dang ei tôch kơ lăp. Tơ drong yua hơ ri kră sơ̆ vă tơ roi tơ băt, kon pơ lei đei mơ̆ng hăm boa hơ ri kră sơ̆, kơ tar re kơ hơ drĕch hơ dŭng kơ dih tơ gŭm ăn kon pơ lei ƀônh kơ hlôh. Kơ dih kâu ĭnh păng dôm bơ ngai hlôi mơ̆ng ƀai hơ ri yua đơ̆ng mŏ Phương hơ ri tă kơ hơ iă păng đei băt kơ dih tang găn jĭ ƀiơ̆.”

Mŏ Nguyễn Thị Phương hrŭk hơ băn ao joăt joe hơ ri hát then

            Mŏ Nguyễn Thị Phương tơ roi, dôm năr âu ki, mŏ hăm dôm bơ ngai jang lơ̆m grŭp tang găn jĭ kơ pơ lei, xăh tŏk bŏk hơ drin năm tơ roi tơ băt găh tơ drong jang tang găn jĭ ăn kon pơ lei, kŭm nhen tơ drong jang tơ gŭm tơ̆ hơ nih ăn oei hơ drô̆ ‘măn ăn bơ ngai jang brŏk đơ̆ng rim dêh char tơ ring jĭ. Tơ gĕch jơ năr pơ dơh, mŏ Phương hlôi pơ̆ih mạng tơ chă dôm ƀai hơ ri hơ iă đei tơ roi găh tang găn jĭ Covid-19 vă tơ plih jing hơ ri then đơ̆ng rŏng ‘noh chă hơ ri păng kuei video tăh lơ̆m trang mạng tơ pôl. Kiơ̆ kơ mŏ Phương, hơ ri then kơ tar tính ‘noh jĭ tơ drong hơ ri ư̆h kơ gơ̆h kơ ƀăh kơ bơ ngai  Tày – Nùng. Plei mŏ oei păng dôm plei tơ jê̆ đei lơ bơ ngai Tày – Nùng arih sa kơ na trong tơ roi tơ băt âu gô tơ gŭm kon pơ lei ƀônh kơ băt păng ƀônh kơ ƀlŏk ƀiơ̆.

             “Ƀôh tơ drong sơng iŏk đơ̆ng rim bơ ngai hăm trong jang đơ̆ng ĭnh ‘noh ĭnh ƀôh chhôk dêh. Mă đơ̆ng dang ei ĭnh tôch kơ hrăt hăm tơ drong jang tơ gŭm tang găn jĭ tơ̆ xăh, mă lei vă jê̆ truh kơnh oei gô hơ drin ‘măn jơ tơ chă dơ̆ng dôm boa hơ ri then ‘nao păng nơ̆r hơ ri lăp vă hơ nơ̆ng tơ ƀôh dôm ƀai hơ ri jing boa then vă tơ roi tơ băt ăn kon pơ lei.”

            Yă Hồ Thị Thanh Hải, Kơ dră Anih jang Mặt trận Tổ quốc Việt Nam xăh Cư M’gar tơ băt, bơ ngai Tày – Nùng đei hloh 16% kơ sô̆ kon pơ lei lơ̆m xăh. Vă đĭ đăng kon pơ lei lơ̆m sơ năm bơ̆ jang tơ̆ xăh dang ei tŏk bŏk năm jang kŏng nhân tơ̆ dôm dêh char Bình Dương, Đồng Nai păng pơ lei tơm Hồ Chí Minh. Dôm năr âu ki, ƀơ̆t rim dêh char âu pơm kiơ̆ ư̆h kơ ăn yak vih vơ̆t lơ̆m tơ pôl kiơ̆ tơ chơ̆t 16, lơ bơ ngai jang hlôi brŏk tơ̆ tơ ring vă vĕh ver kơ jĭ. Yua thoi noh, kŭm hăm tơ drong jang krao hơ vơn tơ gŭm păng sơng iŏk dôm tơ drong hiôk tơ mam tơ gŭm ăn tơ drong jang tang găn jĭ, ‘noh tơ drong tơ roi tơ băt hơ tŏk ‘lơ̆ng đon hlôh vao păng tơ drong jang hơ dai đơ̆ng kon pơ lei ‘noh tôch kơ gĭt kăl. Jĭ Kơ dră Khŭl bơ̆ jang Mặt trận pơ lei, pơm hloi kơ dră Chi hội vei lăng drŏ kăn, mŏ Nguyễn Thị Phương hlôi đei lơ tơ drong jang kŭm hăm rim khŭl jang tang găn jĭ. Lơ̆m noh, yua hơ ri then vă tơ roi tơ băt ‘noh jĭ trong jang ‘nao, lăp hăm ‘mĕh vă mơ̆ng hơ ri đơ̆ng lơ kon pơ lei tơ̆ tơ ring.

“Mŏ Phương ‘noh jĭ 1 lơ̆m dôm kang ƀô̆ pơ nam, tơ năp vang jang rim tơ drong jang kơ tơ ring, sư ling lang đei kơ dră kơ pal lui ngeh păng kon pơ lei băt ‘mêm. Khei ‘năr âu ki sư hlôi yua boa hơ ri then kơ hơ drĕch sư vă tơ roi tơ băt ăn kon pơ lei lơ̆m tang găn jĭ. ‘Nâu jĭ trong jang ‘nao, đei yua hăm xăh Cư Mgar pơ ma hơ drô̆ păng lơ̆m apŭng Cư Mgar pơ ma atŭm”.

Mŏ Nguyen Thi Phuong krao hơ vơn tơ gŭm jên mong tang găn jĭ Covid-19

            Hơ ri then, reh kơ tar tính ‘noh jĭ tơ drong hơ iă ư̆h kơ gơ̆h kơ ƀăh lơ bơ ngai Tày – Nùng tơ̆ rim tơ ring. Hơ tŏk tơ drong hơ iă, tơ drong ‘lơ̆ng đơ̆ng boa hơ ri kră sơ̆ păng tơ mam reh joăt joe kơ hơ drĕch hơ drŭng, mŏ Nguyễn Thị Phương hlôi jô̆ pơ đơ̆k nơ̆r hơ ri lăp vă tơ roi tơ băt găh tơ drong jang tơ jră jĭ nhen tơ jră ayăt, kŭm nhen tơ drong gleh hrat đơ̆ng khŭl jang tơ jră jĭ, đơ̆ng noh krao hơ vơn hơ tŏk ‘lơ̆ng đon hlôh vao kon pơ lei vă vang tơ gŭm tang găn jĭ Covid-19.

H’Xíu: Chih

Thuem: Tơ blơ̆