VOV4.Bahnar - Mă đơ̆ng tơ dronga rrih sa oei đei mơ mat tat gleh hrat ră mă grŭp chă jang tơ gŭm kơ dôm bơ ngai pơ dơh hưu, bơ ngai kră tơ̆ thị trấn Ea Súp, apŭng Ea Súp dêh char Dak Lak hlôi đei dôm tơ drong jang hơ iă ‘lơ̆ng lơ̆m tang găn jĭ  covid -19. Kiơ̆ đơ̆ng tơ drong jang đơ̆ng đe sư, tơ drong 1 jơ hngơ̆m đon đei hơ tŏk, băt kơ chăng kơ dih, khŏm hơ drin tang găn jĭ lơ̆m tơ pôl roi hơ tŏk ‘lơ̆ng.

Yă Đào Thị Màu oei tơ̆ thị trấn Ea Súp, apŭng Ea Súp, dêh char Dak Lak vang tơ roi hăm nhôn akhan, kiơ̆ đơ̆ng ti vi, hla ar chih kơ tơ̆ng ang, băt kon pơ lei tơ̆ tơ ring đei jĭ tôch kơ mơ mat tat kơ ƀăh kơ ƀôch; Khŭl jang tang găn jĭ tôch kơ gleh hrat. Yă vang tơ gop răh tơ mam păng tơ gop răh năr năm krao hơ vơn rim ŭnh hnam đei ƀôh, rim ŭnh hnam tĕch mơ dro lơ̆m tơ ring chă tơ ra bơ̆n jên, phe, dôm kơ loăi tơ mam sa vă grŭp chă jang tơ gŭm hơ nhăk truh asong ăn kơ dôm ŭnh hnam tŏk bŏk mơ mat tat lơ̆m tơ ring ăn oei hơ drô̆, păng dôm bơ ngai âu măng năr jang tơ̆ dôm hơ nih răp găn. Yă Màu kŭm hơ nơ̆ng krao hơ vơn, athei kon sâu, rông ƀôt pơm kiơ̆ mă brĕ tơ drong pơ kăp 5K:

“Tơ chĕng găh tơ drong ƀơ̆t teh đak tŏk bŏk đei jĭ mă lơ̆m hơ nih tang găn jĭ: Ƀak si, điều dưỡng, đe ‘nhŏng kŏng an, khŭl linh ƀô̆ đô̆i. Ĭnh đei 1 jơ hngơ̆m,‘mĕh asong dơ̆ng ăn dôm bơ ngai ‘noh 1 lŏk đak, 1 kơ thŭng mi tôm dăh mă kơ thŭng đak ‘ngam vă pơ lung jơ hngơ̆m đe sư. Ĭnh ưh kơ tơ chĕng kiơ, ĭnh lăp ‘meh jang mă lơ, mă lơ vă tơ gŭm ăn kon oh - dôm bơ ngai năm jang tơ̆ hơ nih tang găn jĭ đe sư kŭm sơ đơ̆ng jơ hngơ̆m ƀiơ̆.”

Tang măt Khŭl bơ ngai kră thị trấn Ea Súp asong hnam ‘mêm mơ nat ăn 1 ŭnh hnam bơ ngai kon kông tơ̆ Ea Súp

Ƀok Phan Ba jĭ kang ƀô̆ pơ dơh hưu đĭ hloh 5 sơ năm kơ âu. Ƀok Ba tơ roi: “Đảng viên năm hơ drol pơ  lei pơ la kiơ̆ đơ̆ng rŏng”. Ưh kơ sĭ lơ̆m ‘măng đei ƀôh jĭ covid19 âu ôh, mă hơ drol ‘noh grŭp bơ ngai kră jang chă tơ gŭm ‘mêm mơ nat tơ̆ thị trấn Ea Súp hlôi krao hơ vơn tơ gop vă ming man 2 tŏ hnam ‘mêm kơ eng ăn kơ 1 ŭnh hnam mơ mat tat tơ̆ xăh sơ lam păng 1 ŭnh hnam bơ ngai kon kông lơ̆m thị trấn. Dôm năr âu ki, ƀok Ba ưh kơ ‘nhoen tŏ ‘mi hơ nhăk phe, tơ mam sa, đak ‘ngam năm asong ăn dôm hơ nih ăn oei hơ drô̆, dôm hơ nih răp găn:

“Tơ̆ hơ năp tơ drong jĭ hơ buh krê hơ mơt hơ lơ̆k dơ̆ng thoi noh, lăng băt đei tơ drong “ Mĭnh nơ̆r ƀơ̆t pơ ngot dang 1 tơ pu ƀơ̆t phĭ” yua thoi noh ‘nhŏng oh nhôn pơ gơ̆r đei 1 grŭp chă năm jang tơ gŭm. Chă krao hơ vơn kơ dih rim kon jên, tơ mam tơ̆ tơ ring kŭm nhen jên, tơ mam đơ̆ng ‘ngoăih tơ ring vă tơ gŭm ăn dôm ŭnh hnam tŏk bŏk tơ ƀơ̆p lơ mơ mat tat lơ̆m apŭng. Păng dôm hơ nih răp găn vei lăng jĭ đơ̆ng tơ ring sơ lam ding truh rim anih jang tơ̆ tơ ring kơ drơ̆m truh rim hơ nih ăn oei hơ drô̆ lơ̆m tơ ring. Đơ̆ng noh nhôn kŭm ƀôh hiôk lơ̆m jơ hngơ̆m yua kơ tơ gŭm ăn dôm bơ ngai dơ nuh hin, dôm bơ ngai mơ mat tat lơ̆m jĭ hơ buh thoi noh.”

Ƀok Phan Ba (ao pơ kao) pơ jao asong tơ mam yua ăn hơ nih răp găn tang găn jĭ Covid - 19 tơ̆ apŭng Ea Súp

Thị trấn Ea Súp hlôi đei trong jang hơ dăh lơ̆m tơ drong ăn oei hơ drô̆ dôm bơ ngai jang tơ̆ pơ lei tơm Hồ Chí Minh, păng rim dêh char găh pơ băh brŏk. ‘Noh jĭ 4 truh 5 ŭnh hnam pơm jing 1 grŭp, đe sư hơ met ăn lê̆ 1 pơm hnam vă kơ dôm kon oh brŏk vang hơ dai băl oei hơ drô̆. Gơ nang đơ̆ng trong jang âu mă dôm F0 đei chă ƀôh hrôih păng ư̆h kơ tơ poh lanh ăn tơ pôl. Dôm bơ ngai kră tơ̆ thị trấn Ea Súp hlôi đei tơ gop ‘lơ̆ng lơ̆m tơ drong tang găn jĭ lơ̆m tơ ring. Ƀok Nguyễn Thanh Bình, kơ dră Anih vei lăng kon pơ lei thị trấn Ea Súp, hơ len lăng:

“ ‘Nhŏng Phan Ba- tang măt ăn khŭl bơ ngai kră kơ apŭng, lơ̆m khei ‘năr âu ki hơ nơ̆ng pơ ma dơ nuh hăm kơ dră đảng, kơ dră tơ ring, kŭm đei jơ hngơ̆m đon ‘lơ̆ng, tơ drong ‘mêm. Âu ki tơ gop kŭm hăm kơ dră đảng, kơ dră tơ ring pơm 1 pôm hnam tơ goăt tơ goăl tơ̆ lơ̆m pơ lei. Mă loi ‘noh khei ‘năr tơ jê̆ âu ‘nhŏng Phan Ba đei jơ hngơ̆m ‘mêm mơ nat tơ pă, sư kŭm krao hơ vơn dơ̆ng 1,2 ŭnh hnam tĕch mơ dro lơ̆m tơ ring hăm tơ drong ‘mêm mơ nat, tơ mam truh tơ gŭm ăn tơ ring vă dă ƀiơ̆ kơ mơ mat tat đơ̆ng kon pơ lei tơ̆ lơ̆m tơ ring đei jĭ ‘măng âu”.

Tang măt bơ ngai kră thị trấn Ea Súp asong tơ mam ăn hơ nih ăn oei hơ drô̆ tơ̆ apŭng Ea Súp

            Lê Xuân Lãm: Chih

            Thuem: Tơ blơ̆