VOV4.Bahnar - Đơ̆ng rŏng 3 sơ năm jang kiơ̆ tơ drong tơ chơ̆t kơ sô̆12  đơ̆ng Khŭl chĕp kơ̆l pơ gơ̆r Anih jang Đảng dêh char Gia Lai  găh pơ jing pơ lei tơ ring tơ rang ‘nao lơ̆m kon pơ lei kon kông, um ai tơ̆ lơ pơ lei pơ la hlôi đei ‘lơ̆ng hơ iă lơ. Lơ̆m 3 sơ năm âu ki, lơ̆m dêh char hlôi tơ mơ̆t jên jang vă jê̆ 1.000 ti hlak jên vă pơ jing tơ ring tơ rang ‘nao lơ̆m tơ ring kon pơ lei kon kông, gơ nang đơ̆ng noh, lơ pơ lei pơ la kon kông hlôi đei dôm tơ drong ‘lơ̆ng hơ iă.

Đĭ hloh 2 sơ năm bơ̆ih mă lei kon pơ lei plei Sơn, xăh Ia Nan, apŭng Đức Cơ, dêh char Gia Lai ư̆h kơ hiơt năr sơng iŏk hơ năn pơ lei tơ ring tơ rang ‘nao. ‘Noh jĭ tơ ƀôh kơ năl ăn dôm tơ drong hơ drin đơ̆ng kơ dră đảng, kơ dră chĕp kơ̆l păng kon pơ lei tơ̆ tơ ring sơ lam ƀĕnh mơ mat tat hăm jang blŭng điêm 5/19 tơ drong hơ găt tơ ring tơ rang ‘nao.

            Kră pơ lei Siu Bình tơ roi: “Pơ jing tơ ring tơ rang ‘nao vă kon sâu đei hnam trưng ‘lơ̆ng, đei cham đă ƀŏng lŏng, dôm trong man rơ goh... Pơm ăn pơ lei nhôn ‘lơ̆ng kŭm kơ lih đơ̆ng noh tơ gop pơ jing tơ ring sơ lam pơ drŏng ‘lơ̆ng hơ iă”.

            Dôm đon tơ chĕng ngeh ngăi kơ ƀônh ‘noh mă lei ƀĕnh tơ drong hơ drin đơ̆ng kon pơ lei tơ ring sơ lam. Kŭm kơ lih thoi noh mă kon pơ lei plei Sơn plang kơ dih kơ hrĕng met vuông teh, vang tơ gop 200 triệu hlak jên kŭm hăm kơ hrĕng năr jang vă vang tơ gŭm pơ jing tơ ring tơ rang ‘nao. Truh hơ tuch sơ năm 2018, plei Sơn jing plei tơ ring tơ rang tơ rang ‘nao mă blŭng lơ̆m tơ ring sơ lam kơ dêh char.

            Đơ̆ng plei Sơn, truh dang ei, xăh Ia Nan đei dơ̆ng 3 pơ lei jang đang ‘lơ̆ng tơ ring tơ rang ‘nao. Păng nhen 1 um rup lang să, truh dang ei, lơ̆m tơ ring rim xăh sơ lam ‘noh đei: Ia O, Ia Chía (apŭng Ia Grai), Ia Dom, Ia Nan (apŭng  Đức Cơ) hlôi đei truh 17 tŏ pơ lei kon kông jang đang ‘lơ̆ng tơ ring tơ rang ‘nao.

            Xăh Ia Chía đei 10 pơ lei ‘noh đei 5 pơ lei jang đang ‘lơ̆ng tơ ring tơ rang ‘nao. Ƀok Rơ Châm Hí-kră pơ lei plei Kom Ngo-tơ băt: “Pơ lei đei 221 ŭnh hnam hăm hloh 1.000 ‘nu bơ ngai, kơ sô̆ ŭnh hnam dơ nuh hin đei 4,1%. Tơ dăh nhen sơ năm 2016, iŏk yua jô̆ păh lăp lăp hloh  16 triệu hlak jên 1 ‘nu ‘noh dang ei tŏk hloh 41 triệu hlak jên. ‘Moi kiơ̆ tơ drong jang pơ jing tơ ring tơ rang ‘nao, anih, tơ mam đei tơ mơ̆t jên jang hrơ̆ch 1 ‘măng, kon pơ lei ư̆h kơ pơ mơ̆ng răp gô lơ̆m tơ drong tơ gŭm đơ̆ng teh đak”.

Tơ ring tơ rang ‘nao tơ̆ xăh Ia Dom –apŭng Đức Cơ – Gia Lai

Lei lăi thoi noh, plei Mook Trêl (xăh Ia Dom, apŭng Đức Cơ) hlôi đei tơ plih lơ. Ksor Bia bơ ngai pơ gơ̆r pơ lei tơ roi: “ Kon pơ lei ling lang hơ drin yak hloh mơ mat vă pơ jing tơ ring tơ rang ‘nao. Hơ dai hăm tơ drong tơ gŭm đơ̆ng teh đak, kon pơ lei băt kơ dih tơ gop jên păng năr jang vă pơm trong năm lơ̆m pơ lei, trong năm tơ̆ hơ nih choh jang sa. Kŭm hăm ‘noh, hnam trưng mầm non đei tơ mơ̆t jên jang ming man. Iŏk yua jô̆ păh lăp kơ̆l bơ ngai đei 41,1 triệu hlak jên 1 sơ năm”.

            Kiơ̆ chih jô̆, vă pơ jing 17 tŏ plei tơ ring tơ rang ‘nao lơ̆m kon pơ lei  kon kông lơ̆m rim xăh sơ lam, kon pơ lei hlôi tơ gop hloh 3 ti hlak jên păng rơ bâu năr jang.

Ƀok Nguyễn Ngọc Phận-Phŏ Kơ dră Anih vei lăng kon pơ lei apŭng Đức Cơ-tơ băt: Tơ drong jang pơ jing tơ ring tơ rang ‘nao lăp đei hơ nih pơ gơ̆r blŭng mă ư̆h kơ đei hơ nih tôch. Yua kơ tơ drong hơ găt gĭt kăl đơ̆ng tơ drong jang ‘noh jĭ hơ tŏk ‘lơ̆ng tơ drong arih sa kơ kon pơ lei, tơ chă ăn tơ drong jang păng ming man anih jang kăl ‘lơ̆ng tơ̆ tơ ring sơ lam. Vă pơ vei păng hơ tŏk ‘lơ̆ng plei tơ ring tơ rang ‘nao athei đei tơ drong hơ drin ư̆h kơ pơ dơh đơ̆ng kơ dră đảng, khŭl kơ dră tơ ring păng đĭ đăng kon pơ lei.

Kiơ̆ tơ drong tơ chơ̆t kơ sô̆ 12-CT/TU đơ̆ng Anih jang Đảng dêh char Gia Lai “Găh hơ tŏk loi dơ̆ng tơ drong chĕp kơ̆l đơ̆ng kơ dră đảng rim tơ ring găh pơ jing tơ ring tơ rang ‘nao lơ̆m kon pơ lei kon kông”. Kiơ̆ đơ̆ng noh, Anih vei lăng găh choh jang sa păng hơ tŏk tơ iung tơ ring tơ rang dêh char Gia Lai hlôi pơ jing “Tơ drong hơ găt pơ jing tơ ring tơ rang ‘nao”, hơ dai hăm pơ tho rim tơ ring lơ̆m dêh char tơ lĕch jang. Tơ drong hơ găt ‘noh đei 5 grŭp ‘noh: chĕng hơ met teh, hơ nih jang mŭk drăm – tơ pôl,; mŭk drăm păng pơ gơ̆r pơm tơ lĕch; joh ayŏ – tơ pôl – cham char; chĭnh trĭ – khŭl linh – vei sơ đơ̆ng. Kiơ̆ lơ̆m hla ar pơ tho, anih vei lăng kon pơ lei rim apŭng, thị xăh, pơ lei tơm jang ‘lơ̆ng tơ drong hơ găt pơ lei tơ ring tơ rang ‘nao lăp hăm  tơ drong đơ̆ng rim tơ ring vă pơ gơ̆r jang kiơ̆. Ding truh dang ei, rim apŭng, thị xăh, pơ lei tơm lơ̆m dêh char Gia Lai hlôi tơ lĕch đei tơ drong hơ găt hơ len lăng tơ drong jang tơ̆ tơ ring kiơ̆ lơ̆m 5 grŭp hơ găt, tơ drong hơ găt hơ dăh, gô đei đơ̆ng 15 truh 19 tơ drong hơ găt lăp hăm tơ drong kơ tơ ring.

Pơ jao ƀăng drơ̆ng “ Plei jang đang ‘lơ̆ng tơ ring tơ rang ‘nao’ tơ̆ Gia Lai

Đơ̆ng rŏng 3 sơ năm tơ lĕch jang kiơ̆ tơ drong tơ chơ̆t kơ sô̆ 12-CT/TU ‘năr 13-2-2018 đơ̆ng Khŭl chĕp kơ̆l pơ gơ̆r Anih jang Đảng dêh char Gia Lai găh hơ tŏk loi dơ̆ng tơ drong chĕp kơ̆l đơ̆ng kơ dră đảng rim tơ ring găh pơ jing plei tơ ring tơ rang ‘nao lơ̆m kon pơ lei kon kông, truh dang ei, lơ̆m dêh char đei 83 pơ lei jang đang ‘lơ̆ng tơ ring tơ rang ‘nao. Lơ̆m 3 sơ năm âu ki, lơ̆m dêh char hlôi tơ mơ̆t jên jang hloh 975 ti hlak jên vă pơ jing tơ ring tơ rang ‘nao lơ̆m tơ ring kon pơ lei kon kông. Lơ̆m noh, jên jang trung ương păng jên jang dêh char ‘noh hloh 766,3 ti hlak jên; jên jang apŭng hloh 44,9 ti hlak jên; jên jang tơ̆ xăh hloh 12,6 ti hlak jên; jên anih jang mơ dro dang 21,2 ti hlak jên; kon pơ lei vang tơ gop hloh 93,6 ti hlak jên; jên nai hloh 37 ti hlak jên. ‘Ngoăih kơ ‘noh, rim tơ ring hlôi hơ vơn đei 36.551 năr jang păng 86.813 m2 teh vă pơm trong nơ năm tơ ring tơ rang, pơm rông, hnam oei kŭm hăm rim tơ drong jang nai hai.

Thuem: Tơ blơ̆