VOV4.Bahnar - Khei h ơ druh t ơ d ăm s ơ n ăm ‘nâu, đoàn h ơ druh t ơ d ăm K ŏng ti Tháng jang găh ŭnh điên Dak Lak hlôi bơ̆ jang kiơ̆ lơ tơ drong jang yua kơ tơ drong arih sa tơ pôl nhen ming man rim tơ drong jang tơ̆k hơ dăh trong pơ lei, asong hŏk ƀŏng “ tơ gŭm trong hơ tăih” ăn kơ hŏk tro dơ nuh hin yak hloh mơ mat tat hŏk hơ gei.  Dôm tơ drong jang ‘lơ̆ng yua kơ tơ pôl âu tŏk bŏk roi ‘năr roi pơm tơ drong lang să, iŏk đei tơ drong vang tơ gŭm đơ̆ng hơ druh tơ dăm rim anih jang, rim tơ ring lơ̆m dêh char Dak Lak.

Ƀlep ƀơ̆t tơ băt năr pơ jing Đoàn hơ druh tơ dăm cộng sản Hồ Chí Minh ‘năr  26/3 âu ki, kơ hrĕng hŏk tro Hnam trưng hŏk jăl 1 Nguyễn Đức Cảnh, xăh Ea Ktur, apŭng Cư Kuin, hlôi chơt hơ iă vang jang tơ drong jang tơ roi tơ băt sơ đơ̆ng ŭnh điên păng tơ gŭm trong hơ tăih yua đơ̆ng đoàn hơ druh tơ dăm kŏng ti ŭnh điên Dak Lak pơ gơ̆r. Tơ̆ âu, đoàn hlôi pơ jao 20 tơ pu tơ mam, akŏp kơ jă 10 triệu hlak jên ăn kơ rim hŏk tro dơ nuh hin pơ nam kơ hŏk. Mă kăl ‘noh jĭ đoàn hlôi pơ jao hŏk ƀŏng đei kơ jă 25,2 triệu hlak jên ăn kơ oh H’Mrin Byã, bơ ngai Ê đê, hŏk tro lăm 2, đei tơ drong arih sa tôch kơ mơ mat tat yua đơ̆ng mơ ti mĕ ƀă. Kơ suơ̆t hŏk ƀŏng âu gô tơ gŭm oh lơ̆m hŏk pơ hrăm đơ̆ng dang ei ding truh hŏk đĭ lăm 9. Iŏk hŏk ƀŏng, oh H’Mrin Byã, tơ roi:

 Đe duch ma năm asong hŏk ƀŏng ‘noh kon chot dêh. Kon gô hơ drin hŏk mă hơ gei vă đơ̆ng rŏng âu kơnh jing ƀak si.

Hơ druh tơ dăm PC Dak Lak asong hŏk ƀŏng ăn kơ oh H’Mrin Byã ding truh đơ̆k đang lăm 9

Tơ roi găh tơ drong jang âu, kô pơ tho Nguyễn Thị Phương, Kơ dră vei lăng Hnam trưng hŏk jăl 1 Nguyễn Đức Cảnh, xăh Ea Ktur, apŭng Cư Kuin, akhan:

Nhôn ƀôh tơ drong asong hŏk ƀŏng ăn kơ hŏk tro dơ nuh hin yak hloh mơ mat tat ‘noh tơ drong jang tôch kơ ‘lơ̆ng, ư̆h khan lăp tơ gŭm đe oh dă ƀiơ̆ kơ mơ mat tat, mă oei tơ gop pơm đei tơ drong hŏk pơ hrăm hơ iă lơ̆m hnam trưng, tơ gŭm đe oh băt ‘mêm kơ eng bôl buăl, ‘mêm kơ eng kon bơ ngai; ‘ngoăih  kơ ‘noh oei lang să dôm bơ ngai ‘lơ̆ng băt hơ drin lơ̆m hŏk pơ hrăm păng tơ drong arih sa.

Hoàng Xuân Tứ, Phŏ Bí thư đoàn Kŏng ti ŭnh điên Dak Lak tơ băt, ‘nâu jĭ ‘măng mă blŭng anih jang asong hŏk ƀŏng “tơ gŭm trong hơ tăih” hăm ‘mĕh vă tơ gŭm đe hŏk tro dơ nuh hin đei tơ drong hơ drin:

Đoàn hơ druh tơ dăm kŏng ti lơ̆m dôm sơ năm âu ki đei tôch kơ lơ tơ drong jang tơ gop vei lăng ăn kơ đe hŏk tro dơ nuh hin yak hloh mơ mat tat, nhen asong tơ mam, asong jên, asong gre tang vang... Truh sơ năm ‘nâu ‘noh hăm trong vă jang tơ drong jang đoàn lơ̆m khei ‘năr ‘nao ‘noh nhôn hlôi vă jang ‘nao lơ̆m tơ drong jang ‘mêm mơ nat tơ pôl, ‘noh jĭ tơ plih đơ̆ng tơ drong asong rim hŏk ƀŏng dei dei tơ plih jing asong hŏk ƀŏng tơ gŭm trong hơ tăih. Nhôn hơ mĕng gô đei tơ drong lang să lơ hloh dơ̆ng hăm đĭ đăng kang ƀô̆ bơ ngai jang lơ̆m kŏng ti păng rim bơ ngai lơ̆m tơ pôl kŭm vang tơ gŭm  tơ gop jơ hngơ̆m lơ̆m dôm tơ drong jang hơ dăh ‘lơ̆ng thoi noh.

Hơ druh tơ dăm tơ ring vang jang tơ̆k hơ dăh trong plei Pa (xăh Cư Prao, apŭng M’Drăk)

Kŭm hăm tơ drong pơ jao hŏk ƀŏng ăn kơ hŏk tro dơ nuh hin, kŭm lơ̆m khei hơ druh tơ dăm âu ki, đoàn hơ druh tơ dăm anih jang ŭnh điên Dak Lak hlôi bơ̆ jang kiơ̆ 2 tơ drong jang “ tơ̆k hơ dăh trong pơ lei” tơ̆ tơ ring kăn kư̆ kach mang plei Pa (xăh Cư Prao, apŭng M’Drăk) păng thôn 1 (xăh Yang Reh, apŭng Krông Bông). 2 tơ drong jang đei pơm 3,2 km, akŏp kơ jă hloh 60 triệu hlak jên, vang bơ̆ jang hăm hơ druh tơ dăm anih jang găh ŭnh điên oei đei tơ drong atŭm jơ hngơ̆m pơ đĭ găh kon jên păng bơ ngai jang đơ̆ng lơ khŭl hơ druh tơ dăm tơ ring.

Rim tơ drong jang ‘lơ̆ng yua kơ tơ pôl đơ̆ng hơ druh tơ dăm anih jang ŭnh điên hlôi pơm tơ drong lang să ăn kơ hơ druh tơ dăm rim anih jang rim tơ ring lơ̆m dêh char Dak Lak

Kiơ̆ kơ ƀok Trần Doãn Tới, Phŏ Bí thư anih jang Đoàn dêh char Dak Lak, rim tơ drong jang iung jang đơ̆ng hơ druh tơ dăm anih jang ŭnh điên lơ̆m dôm sơ năm âu ki hlôi pơm lang să ăn hơ druh tơ dăm rim anih jang tơ̆ jơ̆p rim tơ ring lơ̆m dêh char. Roi ‘năr roi đei  dơ̆ng lơ tơ drong jang “ Tơ̆k hơ dăh trong pơ lei”, “ Tơ̆k hơ dăh đon lui” hơ nhăk ăn tơ drong hơ iă ăn kơ dôm pơ lei pơ la tơ̆ tơ ring hơ tăih hơ tŏ:

Hăm tơ drong vang atŭm đơ̆ng kŏng ti ŭnh điên Dak Lak găh tơ mam drăm kŭm nhen kŏng nhân, kŭm hăm ‘noh jĭ đơ̆ng khŭl jang đoàn viên hơ druh tơ dăm lơ̆m dêh char, hlôi tơ gop pơm đon lui lơ̆m kon pơ lei hăm jơ hnơr mơ lôh. Lơ̆m khei ‘năr âu ki ‘noh pơm đei 1 tơ drong hơ iă, 1 tơ drong jang tôch kơ pran lơ̆m đoàn viên hơ druh tơ dăm, vang tơ gŭm pơ jing tơ ring tơ rang ‘nao.