Lơ̆m kơsô̆ noh đei 4 ‘nu hơ-ioh lôch glơ̆k tơ̆ đak ah kơmăng năr 19/5, tơ̆ xah Phú Hội, apŭng Đức Trọng, dêh char Lâm Đồng.  4 hŏk tro đơ̆ng 6 truh 10 sơnăm, sô̆ băl năm hŭm tơ̆ dơnâu đak gah rŏng ƀưu điê̆n xah Phú Hội. Lơ̆m kơplah hŭm, 1 lơ̆m 4 ‘nu hơ-ioh tơblơih jơ̆ng tơ̆ đak păng lôch glơ̆k. 3 ‘nu noh chă trong tơgŭm dŏng mă lei adoi lôch glơ̆k hloi mơ̆n. Adoi ah kơmăng năr 19/5, tơ̆ xah Ea Tih, apŭng Ea H’leo, dêh char Đăk Lăk, 2 ‘nu mon lăp 4 truh 5 sơnăm, adoi đei unh hnam ƀôh băt lôch glơ̆k tơ̆ dơnâu đak thôn 4, xah Ea Tih.

‘Măng lôch glơ̆k mă  3 đei ƀôh tơ̆ xah Ea Kao, pơlei tơm Buôn Ma Thuột, dêh char Đăk Lăk, pơm 2 ‘nu hơ-ioh oei tơ̆ pơlei H'Đơk, xah Ea Kao lôch hơchăng. Tơdrong tơm đei sơkơ̆t hơdah noh, kơlih ‘năr tŏ dêh hnang, đe mon pơtơm băl năm hŭm tơ̆ dơnâu đak kơyuơ kon pơlei sir tơ̆ mir păng ưh kơchăng noh lôch glơ̆k. Dang ei, tŏk bŏk jê̆ truh khei pơdơh hŏk, anih jang kơpal tơroi hăm đe mĕ ƀă tơrĕk vei lăng kon hơ-ioh mă tơnăp hloh vă tang găn ƀiơ̆ tơdrong lôch hơchăng jĭ bơnôh, lơ̆m noh đei lôch glơ̆k tơ̆ đak.