Hơtŏk kơsô̆ bơngai jĭ pơlŏ lĕch đe lơ̆m dêh char tŏk 1.200 ‘nu, tŏk hloh 2 ‘măng kơsô̆ bơngai jĭ pơting hăm khei ‘nâu sơnăm sơ̆. Lơ̆m kơsô̆ âu, đei 4 ‘nu jing jĭ dêh păng 1 ‘nu lôch. Ƀok Vũ Đức Nhuần, Phŏ kơdră Anih vei lăng kon pơlei apŭng Di Linh tơbăt, jĭ pơlŏ lĕch đe lơ̆m apŭng tŏk bŏk tŏk hrĕnh, hăm hloh 300 ‘nu jĭ đei chih iŏk tơ̆ 47 hơnih đei jĭ.

Yua thoi noh, tơdrong jang kơchăng tang găn jĭ pơlŏ lĕch đe tŏk bŏk đei tơring hơdrin tơlĕch jang. Dêh char Lâm Đồng hlôi tơroi tơbăt găh hơmơt đei ƀôh jĭ pơlŏ lĕch đe roi lơ lơ̆m tơring, hơdai hăm krao hơvơn kon pơlei hơtŏk ‘lơ̆ng đon hlôh vao pơm kiơ̆ dôm trong jang tang găn jĭ pơlŏ lĕch đe.