Lăp đơ̆ng rŏng đei khăm hơlen păng pơtho tơbăt trong vei lăng năng tông jơhngơ̆m jăn tơ̆ kơƀang khăm, ƀok Y Juôn Niê (ama H’Bluin) oei tơ̆ ƀuôn Ea Nur, thĭ trân Pơ̆ng Drang, apŭng Krông Ƀuk hơnơ̆ng đei pơtho tơbăt năm tơ̆ hơnih sơng iŏk pơgang ƀơk ăn. Ƀok Y Juôn tơbăt: đơ̆ng ki hei oei hơnơ̆ng gleh lap mă lei hoei chă jĭ dêh kơna ưh kơ năm khăm. Ƀlep lơ̆m đei ƀok thây pơgang năm bơ̆ jang, khăm hơlen tơ̆ tơring kơna ĭnh năm khăm păng đei đe ƀok thây pơgang tơbăt găh jơhngơ̆m jăn ba. Ƀok Y Juôn ƀôh rim ƀok thây pơgang năm jang chă khăm tôch tơnăp, phăl hơlăng păng rim pơgang đei chih tơbăt tôm tong hăm rim tơdrong jĭ jăn."Tơdrong pơgơ̆r khăm jĭ jăn ăn kon pơlei lơ lau tôch hơ ‘lơ̆ng, mư̆h đei tơdrong jang lơ lau ‘noh kon pơlei đei jĭ jăn ‘noh năm khăm hloi tơ̆ tơring, kon pơlei đei vei lăng năng tông jơhngơ̆m jăn ‘lơ̆ng hơ iă, sơđơ̆ng pran jăng grăng akau kơna rim răih bơngai bu bu jei chơt hơ iă ngăl".

Tơdrong jang khăm ming hơmet jĭ jăn ăn kon pơlei tơ̆ thĭ trân Pơ̆ng Drang găh lơ̆m tơdrong jang năm iung jang kơ Khul Ƀok thây pơgang sơnăm mơlôh dêh char Dak Lăk iung jang hơdoi hăm Hơnih Đoàn dêh char pơgơ̆r, hăm vă jê̆ 20 ‘nu ƀok thây pơgang vang iung jang. Lơ̆m pơgê, hlôi đei vă jê̆ 500 ‘nu kon pơlei năm khăm păng ƀơk ăn pơgang. Mĭnh ƀar ‘nu bơngai jĭ đei vă jĭ dêh ‘noh rim ƀok thây pơgang chă pơtho athei năm khăm tơ̆ rim hnam pơgang kơpal. Vang năm iung jang au, ƀak si H’Luôk Niê, tŏk bŏk bơ̆ jang lơ̆m Hnam pơgang apŭng Krông Ƀuk tơbăt:"Tôch hơ iă mưh đei vang iung jang hơdoi hăm khul năm jang vei lăng năng tông jơhngơ̆m jăn kon pơlei. Pơgơ̆r iung jang lơ lau ‘noh ‘ngoăih tơdrong đei năm chă khăm, vei lăng năng tông jơhngơ̆m jăn ăn kon pơlei hloi ‘noh oei tơgŭm ăn rim ƀok thây pơgang kơ hnam pơgang apŭng chă pơma dơnuh, hŏk pơhrăm dih băl găh dôm tơdrong jang kơ rim bơngai".

Hăm 16 khul, vă jê̆ 1.000 ‘nu bơngai ‘noh rim ƀak si sơnăm mơlôh, khei năr au ki, Khul Ƀok thây pơgang sơnăm mơlôh dêh char Dak Lăk hlôi tơlĕch jang lơ tơdrong jang, năm khăm hloi jơhngơ̆m jăn ăn kon pơlei. Rim tơdrong jang nhen “Iung jang ‘mêm mơnat kơ yuơ jơhngơ̆m pran jăng grăng akau kơ kon pơlei pơla”; “Puih mak năm iung jang chơt hơ iă Têt Nguyên đdán atŭm hăm bơngai dơnuh”; tơdrong jang “Hơdruh tơdăm năm iung jang khei pơdơ̆h hŏk”, “Khei hơdruh tơdăm”... đei rim bơngai lơ̆m khul vang năm iung jang.

Lơ̆m 5 sơnăm au ki, Khul Ƀok thây pơgang dêh char Dak Lăk hlôi pơgơ̆r 120 ‘măng khăm jĭ, pơtho tơbăt jơhngơ̆m jăn, ƀơk pơgang ăn 86.000 ‘nu kon pơlei oei tơ̆ tơring atăih yăih, tơring kon kông hăm kon jên hloh 4 ti 200 triu hlak jên. Lơ̆m rim ‘măng năm iung jang, Khul oei jang hơdoi hăm rim bơngai tơgŭm djru pôk ăn 2.400 tơnô̆ tơmam drăm kăl, hơbĕn ao ăn kon pơlei tơnap tap; pôk ăn kơ hrĕng tơnô̆ kon jên hŏk pơhrăm, tơmam pơyua hŏk pơhrăm, gre tang vang ăn hŏk tro dơnuh, hŏk tro pơti, hŏk tro kon kông hŏk hơgei. Pơgơ̆r pơtho tơbăt tơbăt chă ming hơmet pơgia ăn kơ rơbau ƀok thây kô rim hnam trương mầm non, jăl kơđeh, pơtho tơbăt vei lăng năng tông hơkau jăn ăn hơdruh tơdăm păh kơchoong, tang găn tơdrong jĭ jăn ăn hŏk tro, sinh viên…

‘Nhŏng Y Lê Pas Tơr, Kơ iĕng Kơdră chĕp pơgơ̆r Hơnih Đoàn dêh char, Kơdră Khul Hơdruh tơdăm Việt Nam dêh char Dak Lăk tơbăt, tơdrong jang kơ Khul Ƀok thây pơgang sơnăm mơlôh hlôi tơgop pơjing đei lơ tơdrong jang kơ rim khul năm iung jang kơ yuơ tơdrong oei sa hơrih sa kon pơlei, pơm hơtŏk jơhngơ̆m đon hưch hanh hơrih sa ‘lơ̆ng kơ yuơ kon pơlei pơla lơ̆m đoàn viên hơdruh tơdăm Dak Lăk."Rim đe ‘nhŏng pơmai oh ƀok thây pơgang sơnăm mơlôh hlôi iung jang ‘lơ̆ng jơhngơ̆m đon năm iung jang kơ yuơ tơdrong hơrih sa, kơ yuơ kon pơlei pơla păng iung jang tơnăp dôm tơdrong bơ̆ jang đơ̆ng kơ dih vă vang iung jang lơ̆m tơdrong jang atŭm kơ khul hơdruh tơdăm dêh char, tơgop pơm hơtŏk đei jơhngơ̆m pran jăng grăng akau ăn kon pơlei tơ̆ rim tơring atăih yăih, tơring tơnap tap, tơring sơlam teh đak".

Kiơ̆ đơ̆ng ƀak si Phan Thành Trinh, Kơdră chĕp pơgơ̆r Khul Ƀok thây pơgang sơnăm mơlôh Dak Lăk, hăm trong iung jang “Ƀok thây pơgang sơnăm mơlôh Dak Lăk pơm kiơ̆ nơ̆r Ƀok Hô, năm iung jang kơ yuơ jơhngơ̆m pran jăng grăng akau kơ kon pơlei”, rim bơngai lơ̆m khul ling lang kơrŭn đĭ jơhngơ̆m vang iung jang rim tơdrong jang vă koăt dơ̆ng dôm tơdrong jang gơ̆h hơgei, atŏk bơ̆ jang ‘lơ̆ng tơdrong jang, đơ̆ng noh bơ̆ jang tơgŭm ăn kon pơlei roi năr roi ‘lơ̆ng hơ iă hloh dơ̆ng."Khul ƀok thây pơgang sơnăm mơlôh hơnơ̆ng iung jang kiơ̆ tơdrong jang Ƀok thây pơgang sơnăm mơlôh pơm kiơ̆ nơ̆r Ƀok Hô, năm iung jang kơ yuơ jơhngơ̆m pran jăng grăng akau kơ kon pơlei. Mă kăl, rim bơngai lơ̆m khul gô kiơ̆ yok rok jơ̆ng jơhngơ̆m đon pơm jŭk yuk trong hơlau đơ̆ng kơdih tơ̆ rim tơring păng iung jang kơ yuơ tơdrong hơrih sa sơđơ̆ng ‘lơ̆ng hơ iă ăn tơpôl".

 Ư̆h kơ ‘nhoen tơdrong tơnap tap, hrat hrĭn, khul Ƀok thây pơgang sơnăm mơlôh Dak Lăk hlôi pơm jŭk yŭk trong hơlau truh hăm rim pơlei pơla atăih yăih vă khăm, hơmet jĭ jăn ăn kon pơlei. Rim ‘măng năm iung jang ưh khan lăp tơgŭm ăn đe sư pơhrăm jơhngơ̆m đon tơdrong jang ‘lơ̆ng kơ ƀok thây pơgang mă lei oei tơƀôh tơbăt hơnăp jang, sơnong jang kơ jơhngơ̆m mơlôh, plang jơhngơ̆m đon kơ yuơ jơhngơ̆m pran jăng grăng akau ăn kon pơlei pơla.