Kiơ̆ tơroi tơbăt đơ̆ng Anih vei lăng tơdrong jĭ jăn (CDC) dêh char Dak Lak, lơ̆m dêh char ‘nao đei 1 ‘nu hơnih lôch yua đơ̆ng jĭ jơ̆ng ti ƀơ̆r tơ̆ Hnam pơgang tơring Tây Nguyên hăm hơlen lăng jĭ Blơ̆ pơchŭng, pơchŭng pham rơka lơ hơnih, Jĭ jơ̆ng ti ƀơ̆r độ IV, răp hơlen lăng Jĭ plei nuih. Hơioh jĭ ‘noh mon drŏ nglo rơneh sơnăm 2022, oei tơ̆ kueng kơ phô̆ 1, phường Thiện An, thị xã Buôn Hồ. ‘Nâu jĭ bơngai mă blŭng lôch yua đơ̆ng jĭ jơ̆ng ti ƀơ̆r tơ̆ Dak Lak lơ̆m sơnăm ‘nâu.

Đơ̆ng blŭng sơnăm truh dang ei, lơ̆m dêh char hlôi đei 76 ‘nu jĭ jơ̆ng ti ƀơ̆r, răh rai tơ̆ dôm apŭng, thị xã, pơlei tơm. Dang ei Dak Lak tŏk bŏk mơ̆t lơ̆m pơyan ‘mi, jing tơdrong hiôk ăn jĭ jơ̆ng ti ƀơ̆r păng lơ kơ loăi jĭ đei ƀôh, lanh să. Tơdăh ưh kơ đei chă ƀôh păng hơmet tơtom, jĭ jơ̆ng ti ƀơ̆r gô hơnhăk truh dôm tơdrong jĭ nai, hơmơt kơ lôch ăn hơ ioh.