VOV4.Bahnar - Anih jang Đảng dêh char Kon Tum tơ lĕch tơ drong hơ găt lơ̆m 5 sơ năm truh hơ drin đei 4 apŭng păng pơ lei tơm Kon Tum jang đang ‘lơ̆ng tơ ring tơ rang ‘nao dăh mă jang đang tơ drong jang pơ jing tơ ring tơ rang ‘nao. Vă iŏk đei tơ drong hơ găt âu, dêh char Kon Tum băt hơ dăh athei tơ lĕch jang, bơ̆ jang kiơ̆ ‘lơ̆ng 8 grŭp tơ drong jang, trong jang, lơ̆m noh lăng kăl tơ drong jang tơ roi tơ băt vă kơ kon pơ lei hơ drin  vang jang pơ jing tơ ring tơ rang ‘nao.

Truh dang ei dêh char Kon Tum đei 28 xăh đei drơ̆ng xăh jang đang ‘lơ̆ng tơ ring tơ rang ‘nao. ‘Ngoăih kơ ‘noh đei 10 xăh hlôi jang đei đơ̆ng 15 truh 18 tơ drong hơ găt; 45 xăh jang đei đơ̆ng 10 truh 14 tơ drong hơ găt păng 2 xăh jang đei đơ̆ng 8 truh 9 tơ drong hơ găt. Anih jang Đảng dêh char Kon Tum tơ lĕch tơ drong hơ găt lơ̆m 5 sơ năm truh hơ drin đei 4 apŭng păng pơ lei tơm Kon Tum jang đei tơ ring tơ rang ‘nao dăh mă jang đang tơ drong jang pơ jing tơ ring tơ rang ‘nao. Đei đơ̆ng 60 xăh jang đang ‘lơ̆ng tơ ring tơ rang ‘nao tơ̆ kơ pal păng 100% kơ sô̆ xăh jang đang rim tơ drong hơ găt gĭt kăl lơ̆m pơ jing tơ ring tơ rang ‘nao, nhen; chĕng hơ met teh, trong nơ năm, dơ nâu đak, ŭnh điên, anih hŏk hôp pơ lei, hnam oei kon pơ lei, kơ sô̆ bơ ngai jang đei tơ drong jang hơ nơ̆ng... ‘Nao âu, tơ̆ Hop akŏm ‘măng mă 3 Anih chĕp kơ̆l pơ gơ̆r Đảng bộ dêh char jăl 16, Anih jang Đảng dêh char Kon Tum akŏm pơ ma dơ nuh tơ drong jang pơ jing tơ ring tơ rang ‘nao. Pơ ma tơ̆ Hop akŏm, ƀok Dương Văn Trang, Bơ ngai jang lơ̆m Trung ương Đảng, Bí thư Đảng dêh char Kon Tum tơ băt:

“Khŭl chĕp kơ̆l pơ gơ̆r Anih jang Đảng dêh char hlôi athei dărlăng, hơ len lăng pơ tôch iŏk đei, tam mă ‘lơ̆ng, mơ mat tat tơ hlăk tơ hlĭn lơ̆m kơ plăh pơ jing tơ ring tơ rang ‘nao lơ̆m dêh char. Băt hơ dăh tơ drong tơm pơm ăn  oei đei ư̆h kơ ‘lơ̆ng. Lăng kiơ̆ lơ̆m tơ drong tơ pă yan âu kơ dêh char, rim nơ̆r athei đơ̆ng Trung ương găh pơ jing tơ ring tơ rang ‘nao vă băt hơ dăh tơ drong tơm, tơ drong jang, trong jang kăl vă pơ jing tơ ring tơ rang ‘nao lơ̆m dêh char jăl jang 2021- 2025”.

Vă jang đang đei tơ drong hơ găt truh sơ năm 2025 đei 4 apŭng păng pơ lei tơm Kon Tum jang đang ‘lơ̆ng tơ ring tơ rang ‘nao dăh mă jang đang tơ drong jang pơ jing tơ ring tơ rang ‘nao, Anih jang Đảng dêh char Kon Tum băt hơ dăh athei tơ lĕch jang, bơ̆ jang kiơ̆ ‘lơ̆ng 8 grŭp tơ drong jang, trong jang, ‘noh: hơ tŏk loi dơ̆ng tơ drong jang tơ roi tơ băt găh pơ jing tơ ring tơ rang ‘nao; hơ tŏk ‘lơ̆ng chĕng hơ met teh, vei lăng păng bơ̆ jang kiơ̆ chĕng hơ met teh, mă loi ‘noh jĭ găh hơ tŏk tơ iung choh jang sa, tơ ring tơ rang; tơ mơ̆t jên jang ming man anih jang kăl mŭk drăm – tơ pôl tơ ring tơ rang tơ klep hăm hơ tŏk tơ iung anih kơ drơ̆m; hơ met ming dơ̆ng tơ drong jang choh jang sa hơ tŏk ‘lơ̆ng iŏk yua ăn kon pơ lei; hơ tŏk tơ iung pơ tho pơ hrăm, jang pơ gang, joh ayŏ, vei lăng cham char bri brăh; hơ tŏk ‘lơ̆ng khŭl Đảng păng khŭl jang chĭnh trĭ tơ̆ tơ ring; hơ vơn jên tơ mơ̆t jên jang pơ jing tơ ring tơ rang ‘nao; hơ tŏk loi dơ̆ng tơ drong chĕp kơ̆l đơ̆ng rim kơ dră Đảng, vei lăng pơ gơ̆r đơ̆ng Anih vei lăng kon pơ lei rim tơ ring păng hơ tŏk jơ hngơ̆m pran rim khŭl grŭp chĭnh trĭ – tơ pôl tơ̆ tơ ring tơ rang lơ̆m pơ jing tơ ring tơ rang ‘nao.

Lêh tơ lĕch jang pơ jing tơ ring tơ rang ‘nao tơ̆ Kon Tum

Lăp đơ̆ng rŏng kơ Tết nguyên đán Tân Sửu 2021, đĭ đăng 10 apŭng, pơ lei tơm kơ dêh char Kon Tum pơ gơ̆r lêh tơ lĕch jang blŭng sơ năm  lơ̆m đĭ đăng kon pơ lei 1 jơ hngơ̆m đon iung jang pơ jing tơ ring tơ rang ‘nao păng anih kơ drơ̆m hơ gei. Tơ̆ pơ lei tơm Kon Tum, khŭl kơ dră păng kon pơ lei 21 xăh, phường hlôi bơ̆ jang kiơ̆ tơ drong pơ tăm ‘long blŭng sơ năm hơ drin lơ̆m sơ năm pơ tăm tŏ sĕt hloh 2.000 tơm ‘long; pơm ƀê tŏng ‘lơ̆ng 1,2 trong nơ năm tơ ring tơ rang; tơ lĕch jang hơ met ‘lơ̆ng anih kơ drơ̆m.

 Ƀok Nguyễn Thanh Mân, Kơ dră Anih vei lăng kon pơ lei pơ lei tơm Kon Tum tơ băt, sơ năm ‘nâu pơ lei tơm hơ drin gô đei dơ̆ng 2 xăh Chư Hreng păng Kroong jang đang hơ drol tơ ring tơ rang ‘nao. Truh sơ năm 2023 pơ lei tơm gô jang đang ‘lơ̆ng tơ ring tơ rang ‘nao păng anih kơ drơ̆m kơ loăi II hơ drol sơ năm 2025. Khŭl kơ dră hlôi pơ jao tơ drong jang hơ dăh ăn kơ rim xăh, phường, anih jang vei sơ đơ̆ng tơ lĕch jang bơ̆ jang kiơ̆ đei yua, hơ dăh ‘lơ̆ng:

    “Hăm dôm xăh tơ lĕch jang pơm trong nơ năm tơ ring tơ rang, pơm rim tơ drong jang lơ̆m tơ ring yak truh pơ jing dôm tơ drong hơ găt vă jang đang ‘lơ̆ng tơ ring tơ rang ‘nao. Hăm dôm phường pơ jing dơ̆ng vei sơ đơ̆ng anih kơ drơ̆m, pơ gơ̆r kĭ pơ kăp hăm rim ŭnh hnam kon pơ lei vei lăng anih jang kăl, ki thuơ̆t anih kơ drơ̆m, vei lăng tơm ‘long. Kŭm hăm ‘noh Anih vei lăng kon pơ lei pơ lei tơm gô hơ met ming anih kơ drơ̆m, pơ gơ̆r kĭ pơ kăp hăm rim ŭnh hnam kon pơ lei vei lăng anih jang ki thuơ̆t anih kơ drơ̆m, vei lăng ‘long. Kŭm hăm ‘noh Anih vei lăng kon pơ lei pơ lei tơm gô hơ met ming dơ̆ng anih kơ drơ̆m mă loi ‘noh jĭ tơ mơ̆t jên jang pơm dơ̆ng jih trong, đing pơ ro đak, ‘long, ŭnh điên pơ rŏ tơ̆ rim trong tơm kơ pơ lei tơm. Yak truh pơ jing pơ lei tơm  Kon Tum iŏk đei anih kơ drơ̆m kơ loăi II, pơ lei tơm gô tơ lĕch jang 1,2 tơ drong jang tơm vă pơ̆ih să anih kơ drơ̆m”.

Kơ dră chĕp kơ̆l pơ lei tơm Kon Tum pơ tăm ‘long trong kơ phô̆

Kŭm hăm dôm trong jang atŭm, khŭl kơ dră rim xăh, apŭng kơ dêh char Kon Tum lăng kiơ̆ lơ̆m yan âu tơ drong tơ ring vă đei trong jang hơ drô̆, vă vei kơ jăp păng hơ tŏk ‘lơ̆ng hăm rim tơ drong hơ găt tơ ring tơ rang ‘nao mă hơ dăh. Ƀok Nguyễn Văn Thủy, Phŏ Kơ dră Anih vei lăng kon pơ lei apŭng Kon Rẫy tơ băt:

    “Lơ̆m lơ trong jang ‘noh tơm ‘noh jĭ krao hơ vơn kon pơ lei gơ̆h tơ mơ̆t yua tơ drong hơ gei lơ̆m chŏh jang sa vă pơm đei kơ jă tŏk, iŏk yua ‘lơ̆ng hloh lơ̆m 1 hơ găt teh vă hơ met pơ ‘lơ̆ng iŏk yua păng klăih đơ̆ng dơ nuh hin kơ jăp. Mă hơ dăh ‘noh jĭ hơ nhăk dôm ‘long, hơ drĕch ‘nao ‘lơ̆ng, iŏk yua lơ lơ̆m tơ mơ̆t yua choh pơ tăm hăm rim kơ loăi ‘long vă pơm đei iŏk yua lơ hloh, hơ met pơ ‘lơ̆ng đei ƀai toan găh iŏk yua đơ̆ng kon pơ lei.”

Vă hơ nơ̆ng vei kơ jăp, hơ tŏk ‘lơ̆ng đei dôm tơ drong hơ găt, khŭl kơ dră 28 xăh jang đang ‘lơ̆ng tơ ring tơ rang ‘nao kơ dêh char Kon Tum hơ nơ̆ng tŭn pran tơ drong jang tơ roi tơ băt găh pơ jing tơ ring tơ rang ‘nao; pơ vei đei yua tơ drong jang pơ jei băl “Kon Tum 1 jơ hngơ̆m pơ jing tơ ring tơ rang ‘nao”; hơ vơn, iŏk yua tôch ai rim jên vă hơ met ming, vei kơ jăp păng hơ tŏk ‘lơ̆ng rim tơ drong hơ găt.

Thuem: Tơ blơ̆