Dôm năr blŭng khei 3 au ki, Đảng Ƀô̆, kơdră chĕp pơgơ̆r păng kon pơlei tơring Ia Ly, apŭng Sa Thây sơng iŏk Tơdrong tơchơ̆t đơ̆ng Hơnih vei lăng kon pơlei dêh char Kon Tum drơ̆ng nơ̆r tơring Ia Ly, apŭng Sa Thây iŏk đei jing tơring tơrang ‘nao. Ƀok A Thoải,  Ƀĭ thư Chi ƀô̆, jang hloi Kơdră chĕp pơgơ̆r pơlei Chư̆, tơring Ia Ly tôch lăp đon hăm tơdrong ou. Kơ yuơ lơ sơnăm au ki ƀok hlôi pơm jŭk yŭk trong hơlau atŭm hăm khul chi ƀô̆ hơdrin chă pơtho khan, pơrô̆ hơvơn 262 unh hnam kon pơlei lơ̆m pơlei Chư̆ tơplih jơhngơ̆m đon tơchĕng, trong jang sa mĭnh păh atŏk tơ iung mŭk drăm, adoi vang iung jang kiơ̆ tơnăp dôm tơdrong jang atŭm kơ pơlei vang tơgop jơhngơ̆m tơ iung pơjing tơring tơrang ‘nao. Ƀok A Thoải tơbăt, lơ̆m tơdrong pơrô̆, pơtho khan kon pơlei, tơdrong kăl hloh ‘noh hơdrin, băt hlôh ƀôh hơdăh jơhngơ̆m đon kon pơlei: “‘Măng mă blŭng lơ bơngai jei tim gan hlôh vao đơ̆ng noh jei hli ưh kơ đei iŏk yua ăn kơ dih mă lei truh đơ̆ng rŏng jei băt tơchĕng truh tơdrong đei iŏk yua ăn tơpôl. Rim đang viên lơ̆m chi ƀô̆ jei vang kơrŭn jơhngơ̆m pơtho khan, pơrô̆ pơrôp kon pơlei hơdrin jang kiơ̆ trong hle lơ̆m choh jang sa păng lăng kơjăp truh tơdrong hŏk pơhrăm kơ kon hơ ‘lơ̆p”.      

Đơ̆ng rŏng 12 sơnăm hơdrin hăm trong tơlĕch jang tơ iung pơjing tơring tơrang ‘nao, tơring Ia Ly, apŭng Sa Thây chă hơvơn đei hloh 30 ti hlak jên pơm trong nơnăm pơlei pơla, ming hơmet hơboong thoong đak, tơ iung pơjing hnam trương, lăm hŏk păng tơgŭm djru ăn kon pơlei choh jang sa. Atŭm hăm ‘noh tơ̆ 3 pơlei kon kông nhen: Pơlei Chư̆, pơlei Tum păng pơlei Chơ dang ei pă đei hnam hyăh hyok, hnăt hnot bơih. Ŭnh hnam dơnuh kơ tơring lăp pă tim mă truh 8%, jang sa iŏk đei jô̆ hơtŏ măt bơngai đei 42 triu hlak jên. Ƀĭ thư Đảng tơring Ia Ly Phan Chí Thiện sơkơ̆t hơdăh, vă pơjing hơyak pran păng jang keh đang tơ iung pơjing tơring tơrang ‘nao đei hơnăp jang kơtang đơ̆ng Ƀĭ thư Chi ƀô̆ 3 pơlei kon kông, mă hơdăh ‘noh nhen Ƀĭ thư Chi ƀô̆ pơlei Chư̆ A Thoải:“Lơ̆m tơdrong tơ iung pơjing tơring tơrang ‘nao adoi nhen rim tơdrong jang tơpôl kơ tơring ‘noh ƀok A Thoải tơlĕch jang tôch kơtang. Ƀok A Thoải pơrô̆ athei rim ŭnh hnam đei hơdroong rơmo ưh kơ rơgoh ‘lơ̆ng chă pơjing hơtăih ƀiơ̆ kơ hnam oei. Chă pơrô̆ hơvơn kon pơlei plang teh pơm trong nơnăm. Đơ̆ng noh atŭm hăm Chi ƀô̆ pơtăm pơkao pơjing măt lăng ‘lơ̆ng ăn pơlei pơla rơgoh ‘lơ̆ng”.

Ƀôh hơdăh yan au khul Ƀĭ thư chi ƀô̆ tơ̆ rim pơlei pơla, pơlei kon kông dêh char Kon Tum đei hơnăp jang tôch gĭt kăl lơ̆m tơ iung pơjing Đảng păng tơdrong jang atŏk tơ iung mŭk drăm, tơpôl tơ̆ tơring. Tơdrong mă au đei sơkơ̆t hơdăh mư̆h jang kiơ̆ tơdrong tơchơ̆t jang Ƀĭ thư jang hloi Kơdră chĕp pơgơ̆r pơlei, pơla. Ƀĭ thư Chi ƀô̆ A Sao, jang hloi Kơdră chĕp pơgơ̆r pơlei Kon Teo Đak Lơ̆p, tơring Đak Long, apŭng Đak Ha tơbăt, tơdrong jang lơ hloh mă lei tôch rơvơn lơ̆m chĕp pơgơ̆r, pơrô̆ jang kiơ̆ dôm tơdrong jang kơ pơlei. Đơ̆ng tơdrong pơm jŭk yŭk trong hơlau păng tơdrong chĕp pơgơ̆r đơ̆ng A Sao, 230 ŭnh hnam hăm 1.200 ‘nu măt bơngai kơ bơngai Xơdang pơlei Kon Teo Đak Lơ̆p, dôm sơnăm tơjê̆ au hlôi pơm tŏ sĕt hơgăt teh pơtăm ƀum ƀlang, mir ƀa, hơƀo vă lang să chă pơtăm chehphe, ksu păng ‘long sa plei:“Hăm hơnăp jang bơngai chĕp kơ̆l tơ̆ pơlei, ba hơdrin đĭ ai chă pơrô̆ hơvơn kon pơlei đei mir pơgar tơgĕch chă rong hloi kon tơrong, pơtăm ‘long sa plei. Ba jang hơdrol ‘mơ̆i kơna mă pơ̆n chă hơvơn kon pơlei jang kiơ̆. Pơm ăn kon pơlei ƀôh kơmăt kơna mă kiơ̆ yok rok jơ̆ng tơgop pơjing ăn pơlei bơ̆n roi năr roi yak hloh dơnuh hin kơjăp ‘lơ̆ng”.

Vă jang kiơ̆ kĕ hơnăp jang kơ khul Ƀĭ thư chi ƀô̆ tơ̆ rim pơlei pơla kon kông lơ̆m tơ iung pơjing tơring tơrang ‘nao, rim Đảng ƀô̆ tơring tơ̆ dêh char Kon Tum ling lang lăng ba kơjăp truh bơ̆ jang pơtho pơhrăm ming păng pơtho tơbăt tơdrong bơ̆ jang vă khul Ƀĭ thư chi ƀô̆ băt hơdăh trong bơ̆ jang đơ̆ng Đảng, teh đak, adoi gơ̆h vă chă pơtho tơbăt, pơrô̆ hơvơn kon pơlei lơ̆m choh jang sa. Ƀok Trần Ngọc Trực, Ƀĭ thư Đảng tơring Đak Long, apŭng Đak Ha tơbăt, trong jang mă khul kơdră Đảng tơring hlôi tơlĕch jang vă atŏk kơtang hơnăp jang kơ 5 Ƀĭ thư Chi ƀô̆ pơlei kon kông lơ̆m tơ iung pơjing păng lang să trong jang atŏk tơ iung mŭk drăm ŭnh hnam:“Hloh đơ̆ng bơ̆ jang chĕp pơgơ̆r, pơrô̆ jang, Khul kơdră Đảng tơring pơgơ̆r rim ‘măng ăn Ƀĭ thư chi ƀô̆ năm tơmang lăng, hŏk pơhrăm tơ̆ rim tơring đe jang sa đei iŏk yua kơjăp. Truh dang ei hlôi tơlĕch pơjing đei 5 trong jang sa atŏk tơ iung mŭk drăm pơm hơtŏk jang sa iŏk yua kơjăp ăn kon pơlei kon kông. Ŭnh hnam dơnuh hlôi tơjur kơtang pơtêng hăm sơnăm hơdrol. Ŭnh hnam đei ƀôh roi năr roi lơ”.  

Truh dang ei, dêh char Kon Tum hlôi đei 44 tơring đei drơ̆ng nơ̆r iŏk đei jing tơring tơrang ‘nao, lơ̆m au đei 4 tơring iŏk đei jing tơring tơrang ‘nao ‘lơ̆ng liĕm păng 1 tơring iŏk đei jing tơring ‘nao yŭk trong hơlou. Mă đơ̆ng rim pơlei pơla kon kông tơ̆ dêh char Kon Tum găh lơ akŏm tơ̆ tơring atăih yăih mă lei truh dang ei hlôi đei 45 pơlei iŏk đei jing pơlei pơla ‘nao. Vă tơdrong tơ iung pơjing tơring tơrang ‘nao tơ̆ tơring kon kông lơ̆m dêh char đei tơplih ‘lơ̆ng liĕm kơtang, tơdrong hơrih sa păng jang sa kơ kon pơlei đei tơplih hơdăh ling lang đei hla kơ yŭk trong hơlau ‘noh khul Ƀĭ thư chi ƀô̆ rim pơlei pơla.