Dôm sơnăm âu ki, tơdrong hŏk pơhrăm păng pơm kiơ̆ jơhngơ̆m đon ‘lơ̆ng Ƀok Hồ hlôi jing tơdrong jang hơnơ̆ng, kơchăng kơdih lơ̆m tơdrong jang đơ̆ng rim kơdră, rim anih jang. Kiơ̆ đơ̆ng noh, pơtrŭt mŭk drăm - tơpôl lơ̆m tơring tơtĕnh tơiung ming đơ̆ng rŏng jĭ covid-19. Tơdrong jang pơjing, hơmet ming Đảng păng tơdrong jang chĭnh trĭ đei hơtŏk loi dơ̆ng.

Hơdai hăm ‘noh, dêh char lăng kăl hơmet ming bơ̆jang, hơtŏk ‘lơ̆ng hơnăp jang lơ̆m jang kiơ̆ tơdrong jang teh đak; hơdrin tơplih ‘nao tơdrong jang vei lăng, hơtŏk ‘lơ̆ng đei yua tơdrong jang đơ̆ng khŭl jang hành chính rim tơring. Hlôi đei rơbâu tơdrong jang hơiă, đei yua, hơgei lơ̆m rim tơdrong jang. Tơ̆ hop akŏm, Anih jang Đảng dêh char, Anih vei lăng kon pơlei dêh char Gia Lai hlôi hơpăh bằng khen 21 khŭl tơpôl păng 29 ‘nu bơngai jang ‘lơ̆ng lơ̆m tơdrong hŏk pơhrăm păng pơm kiơ̆ jơhngơ̆m đon ‘lơ̆ng Ƀok Hồ.