Đơ̆ng rŏng kơ truh tơ̆ Hà Nội, Kơdră tơm teh đak Bungari Rumen Radev đei hloi jơ tơƀâp hăm Khul jang tơbôl Việt Nam - Bulgari păng bôl boăl Việt Nam adrol sơ̆ đei năm hŏk, bơ̆ jang tơ̆ teh đak Bulgari. 

Tơ̆ jơ tơƀâp, Kơdră vei lăng Khul jang tơbôl Việt Nam - Bulgari Huỳnh Quyết Thắng pơđou dơ̆ng dôm khei ‘năr tôch ‘lơ̆ng hơiă lơ̆m tơdrong pơvei, jang tơbôl, mât 1 ƀơ̆r đon păng jang hơdoi đơ̆ng Việt Nam păng Bulgari lơ̆m 74 sơnăm âu ki, tơƀôh đon hơiă mưh ƀôh tơdrong pơvei đơ̆ng Việt Nam păng Bulgari oei tŏk pran ‘lơ̆ng lơ̆m lơ tơdrong nhen jang tơbôl, pơtho pơhrăm, tĕch mơdro, tơmât jên jang. Kơdră tơm Bulgari Rumen Radev tơchĕng ‘lơ̆ng dôm tơdrong jơnei mă Việt Nam hlôi iŏk đei khei ‘năr âu ki, atŭm hăm ‘nŏh pơma hơdăh, tơdrong pơvei 2 teh đak oei tŏk pran ‘lơ̆ng lơ̆m rim tơdrong.