Hăm vă jê̆ 30 tơdrong jang, 'măng pơm jang đơ̆ng Kơdră Kuôk hô̆i hlôi đei jơnei 'lơ̆ng rŏ. Lơ̆m 'măng năm tơmang teh đak Campuchia, Kơdră Kuôk hô̆i Trần Thanh Mẫn pơma đam hăm Ƀok pơtao Norodom Sihamoni; pơma đam hăm Kơdră Đảng, Kơdră Thươ̆ng viê̆n Hun Sen; pơma đam hăm Thủ tướng Hun Manet; pơma đam hăm Kơdră Kuôk hô̆i Campuchia Samdech Khuon Sudary…

Tơ̆ 'măng pơma đam hăm Kơdră Kuôk hô̆i Campuchia, ƀar ƀok kơdră atŭm akhan, ƀar Kuôk hô̆i kăl pơtoi iŏk jang sơnong jang kơ Anih jang chih akŏm khôi luơ̆t kơ 2 teh đak lơ̆m hơtŏk jang tơbôl 2 pah; hơlen hơtŏk dôm anih jang tơm, rim tơring, rim anih jang mŭk drăm hăt hot tơmơ̆t jang tơnăp dôm Tơchơ̆t Pơdrơ̆ng hlôi đei kĭ pơkăp; hơtŏk tơroi tơbăt gah tơdrong hlôh vao lơ̆m pơgơ̆r jang kơ Kuôk hô̆i gơh đei jơnei hloh, mă kăl lơ̆m tơdrong chih akŏm khôi luơ̆t păng hơlen iŏk yua khôi luơ̆t, tơgop lơ̆m tơdrong jang kăp gĭt kơ rim teh đak.