Ƀok Hun Sen sơkơ̆t hơdăh, Campuchia ling lang ƀlŏk hơdơ̆r tơdrong tơgŭm djru phăl hơlăng đơ̆ng Việt Nam lơ̆m chăl sơ̆ adoi nhen hrei ou. Tơ̆ hơnăp dôm tơdrong long atŭm lơ̆m tơring păng lơ̆m plei teh hrei ou, ƀar teh đak kăl tơgoăt dih băl kơjăp hloh dơ̆ng, jang hơdoi kơtang hloh dơ̆ng lơ̆m rim tơdrong jang chinh trĭ, mŭk drăm, mơdro sa, vei lăng teh đak, sơđơ̆ng. Kơdră chĕp pơgơ̆r Kuô̆k hô̆i Trần Thanh Mẫn sơkơ̆t hơdăh, Đảng, Teh đak Việt Nam ling lang lăng kơjăp păng iung jang kơtang hloh ăn tơdrong hơmet pơ ‘lơ̆ng păng atŏk kơtang tơgoăt tơgoăl teh đak tơjê̆ ‘lơ̆ng liĕm, joăt joe đơ̆ng sơ̆, jang hơdoi tôm tong, kơjăp ‘lơ̆ng đunh đai tai sơnăm Việt Nam - Campuchia, kơ yuơ đei iŏk yua ăn kon pơlei ƀar teh đak, kơ yuơ rơngei hiôk hian, sơđơ̆ng, jang hơdoi păng atŏk tơ iung lơ̆m tơring păng lơ̆m apŭng plĕnh teh. Kơdră chĕp pơgơ̆r Kuô̆k hô̆i athei ƀar păh hơnơ̆ng tơplih ‘nao păng iung jang kơtang dôm trong jang pơrô̆ pơrôp vă kon pơlei, mă kăl hăm jơhnơr mơlôh ƀar teh đak hlôh vao trŏ ƀlep găh tơdrong tơgoăt tơgoăl joăt joe ‘lơ̆ng hơ iă, jang hơdoi tôm tong Việt Nam - Campuchia.