‘Năr 22/11/1904, Kơdră chĕp kơ̆l Đông Dương tơlĕch ăn Tơdrong tơchơ̆t tơklăh Đắk Lắk jing 1 lơ̆m 20 dêh char, pơlei tơm găh tơring Tŏk bŏk chăl Phalăng chĕp kơ̆l pơgơ̆r sơ̆.

Đắk Lắk dang ei đei hơgăt teh bri brăh, kơsô̆ kon pơlei găh grŭp dôm dêh char, pơlei tơm dơ̆ng hơdrol lơ̆m teh đak, hơdai jing hơnih tơm trong nơnăm gĭt kăl kơ Tây Nguyên; đei tơdrong hiôk tôch kơ ‘lơ̆ng vă jang hơdai, tơgoăt hơnih hơtŏk tơiung, pơm tơdrong ‘lơ̆ng pơtrŭt jang hơdai hơtŏk tơiung mŭk drăm, joh ayŏ, tơpôl hăm dôm tơring lơ̆m tơring Tây Nguyên, tơ ter đak dơsĭ tơring Tŏk bŏk păng dôm hơnih jang mŭk drăm tih kơ lơ̆m teh đak.

Vang truh akŏm păng iung pơma tơ̆ jơ pơm lêh, Phŏ Thủ tướng Nguyễn Hòa Bình pơma hơdăh anih dơ̆ng gĭt kăl kơ dêh char Đắk Lắk hăm tơring păng teh đak đei băt hơdăh lơ̆m lơ trong jang, tơdrong tơgŭm đơ̆ng Trung ương.

Dêh char Đắk Lắk kăl akŏm tơplih ‘nao tơdrong jang mŭk drăm tơm, kăl ‘moi kiơ̆ 1,2 tơdrong jang tơm nhen: Hơtŏk tơiung dôm tơmam choh jang sa, bri ‘long đei yua ‘lơ̆ng, tih, tĕch tơ̆ teh đak đe lơ; pơtrŭt bơ̆jang choh jang sa pơm tơlĕch tơmam đơ̆ng choh jang sa, bri ‘long, ka hơdang păng pơm tơlĕch ŭnh hơyuh rơgoh.

Lăng kăl chĕp răk, tơƀăk mong tơdrong joăt so ‘lơ̆ng hơiă đơ̆ng kon pơlei dôm hơdrĕch kon kông tơklep hăm hơtŏk tơiung tơmang lăng joh ayŏ; tŭn pran jang hơdai tơring, tơƀơ̆p, jang hơdai đơ̆ng rim tơring; vei sơđơ̆ng teh đak păng jang tơbôl.