Iung pơma tơ̆ pơm lêt et hơtŏk, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, Việt Nam păng Campuchia jĭ teh đak tơjê̆ tơgoăt dih băl kơjăp đơ̆ng sơ̆, rim chăl kơdră chĕp pơgơ̆r, kon pơlei ƀar teh đak atŏk tơ iung păng hlôi jing mŭk drăm hơdoi gĭt kăl kơ ƀar hơdrĕch hơdrung. Đảng, teh đak, Kuô̆k hô̆i, kon pơlei Việt Nam ‘meh vă Hnam bơ̆ jang kơ Kuô̆k hô̆i Campuchia gô jing hơnih tơbăt ăn tơdrong tơgoăt tơgoăl pôm nơ̆r ƀơ̆r đon kơ jăp Việt Nam-Campuchia. Iung pơma tơ̆ pơm lêh et hơtŏk, Kơdră chĕp pơgơr Kuô̆k hô̆i Campuchia Khuon Sudary pơma tơbăt jơhngơ̆m đon hôn bơnê kơ tang kơ Đảng, Teh đak păng kon pơlei Việt Nam ‘nhŏng oh hlôi tơgŭm djru ăn tơdrong tơ iung pơjing ming man Hnam bơ̆ jang Kuô̆k hô̆i Campuchia; akhan ‘nou jĭ tơdrong tơbăt ăn jơhngơ̆m đon tơgoăt tơgoăl kơjăp iăp kơtang păng đunh đai tai sơnăm kơ ƀar teh đak Campuchia-Việt Nam.