Tơ̆ tơnô̆ kơsô̆ III lơ̆m tơring Cư Elang apŭng Ea Kar, dêh char Đak Lak, hơnơ̆ng đei kơ hrĕng kang ƀô̆, bơngai jang păng hloh 60 tong gre kmăi kmŏk klăh asong dih băl 3 khul, bơ̆ jang prăt măng prăt năr.

Dôm hơnih jang tơm jăl trong au ‘noh jrăng jơ̆ng gơng, man trong, jih trong... Ƀok Trần Hữu Quốc - Kơdră chĕp pơgơ̆r tơdrong vă jang tơbăt, truh dang ei tơnô̆ jang au oei đei mĭnh ƀar tơdrong tơhlăk tơhlĭn tim mă xek tơlang keh đang, pơđĭ tơplih teh bri, iŏk tơvih teh, mă lei hơnih au gô hơdrin đĭ ai, iŏk tơvih teh đei dôm yơ ‘noh ming man truh dang noh hloi. Tơ̆ tơnô̆ mă II kơ yuơ Hơnih tơm vei lăng Trong gre nơnăm pơm tơ-‘ngla tơmơ̆t jên jang găh lơ̆m tơring Cư Drăm, apŭng Krông Bông rim hơnih ming man hlôi hơmet ăn gre kmăi kmŏk, kŏng nhân tĕnh koăng iung jang ming man rim hơnih jang.