‘Năr kơsơ̆ tơ̆ tơring sơlam Ia Nan (apŭng Đức Cơ, dêh char Gia Lai) tŏ pơđang truh 38 đô̆ C, hơyuh plenh tŏ hơhơ̆ng. Gre ƀôn chơ đak kơ Anih jang 72, Binh đoàn 15 hlôi năm truh thôn Đức Hưng vă asong đak ăn kon pơlei. Pơmai Siu H' Úc ăn tơbăt, đĭ đăng hơlŭng đak lơ̆m thôn noh hrơ̆ đĭ bơih, kon pơlei ưh đei đak sŏ nhă vă pơvih pai xa: “Ưh kơ mah đak noh tơnap tap, lơ ‘măng đei jên adoi ưh đei gơh răt đak. Pŭn ai đei ƀô đô̆i Anih jang 72, Binh đoàn 15 asong đak ăn kon pơlei. Kon pơlei tôch chơt hơ-iă”

Hăt hot chă dui đing đak đơ̆ng gre ƀôn mơ̆t truh dơnâu mong đak kơ unh hnam, pơmai Lê Thị Thu Hà tơroi, kon pơlei lơ̆m thôn chă pơtho dih băl yua đak mong ƀiơ̆, atŭm băl asong đak sŏ nhă đei asong ăn: “Nhôn ‘măn mong vă mah sŏ nhă lơ̆m dôm năr. Đak âu nhôn ‘măn pai xa đĕch. Đak ôp ‘nhot đang noh nhôn ‘măn ruih ăn dôm tơm ‘long pơtăm, ăn ier nhŭng. Nhôn ‘mơ ‘miĕt rim kơtoh đak hloh"

Trung tá Nguyễn Phi Vân – Kơdră jang Chĭnh trĭ Kŏng ti 72, Binh đoàn 15 ăn tơbăt: Jing anih jang mŭk drăm kơ khul linh pơm jang tơ̆ tơring, kŏng ti đei kơ rơbâu kŏng nhơ̆n jang noh kon pơlei xah Ia Nan, apŭng Đức Cơ. Hăm tŏ pơđang kơtang, đe kơdră kơpal kơ kŏng ti hơvơn kan ƀô̆ khul linh rim năr ƀôm păng chơ hơnơ̆ng 3 tong gre ƀôn mong đei 24m3, tơgŭm kon pơlei găn ga khei năr tơnap tap: “Tŏ pơđang pơrăm truh tôm hloi, jô̆ hloi anih jang linh. Anih linh nhôn adoi ưh kơ mah đak sŏ nhă. Mă lei, kan ƀô̆ khul linh, bơngai jang kơ Kong ti kơchăng asong đak sŏ nhă oei tŏ sĕt kơ po ăn kon pơlei lơ̆m tơring”

Ƀok Trần Xuân Nghiên – Kơdră Anih jang vei lăng kon pơlei xah Ia Nan, apŭng Đức Cơ, dêh char Gia Lai ăn tơbăt: Thôn Đức Hưng oei ah hơnih kơjung hloh kơ xah, noh nhen lĕ sơnăm mă yơ adoi ưh kơ mah đak ah pơyan phang. Lơ sơnăm kơ âu, Kŏng ti 72, Binh đoàn 15 adoi tơgŭm đak sŏ nhă ăn kon pơlei lơ̆m đunh khei năr. Tơdrong mă âu roi kơhret hloh đon bơnôh khul linh – kon pơlei, tơgop vei lăng sơđơ̆ng tơring sơlam Đức Cơ: “Jơnŭm pơgơ̆r tơring hmach bơnê kơ tơdrong mă Kŏng ti 72 asong đak sŏ nhă ăn kon pơlei. Lơ̆m 15 năr kơ âu, mă tơm noh đak sŏ nhă ăn kon pơlei thôn Đức Hưng hlôi đei asong ăn bơih, kon pơlei sơđơ̆ng jơhngơ̆m. Đei kŏng ti tơgŭm, kon pơlei sô̆ hơ̆k, bơnê kơ tơdrong tơgop đơ̆ng Kŏng ti 72 kơlih vei tơnăp tôm tơdrong hơrih xa kơ kon pơlei".

Adoi nhen noh, tơ̆ apŭng sơlam teh Ea Súp, dêh char Đăk Lăk, tŏ pơđang đunh năr hlôi pơm ăn kon pơlei ưh kơ mah đak sŏ nhă. Khul ƀô đô̆i, kŏng an tơ̆ tơring tŏk bŏk chơ đak hăm gre vă asong ăn kon pơlei sơđơ̆ng tơdrong hơrih. Ah ‘năr dơ̆ng tŏ hlơ hlĕng hloh  40 đô̆ C, yă Vy Thị Mun tơ̆ thôn 12, xah Ea R’Vê, apŭng Ea Súp chơt hơ-iă kơlih 2 dơnâu mong đak 500 lit păng 1.000 lit kơ unh hnam đei đe linh kŏng an asong hlôi ƀenh: “Rim sơnăm adoi oei mah đak sŏ nhă đak ruih ‘long pơtăm mă lei sơnăm âu đak hrơ̆ đơ̆ng sơnăm sơ̆ hloi. Bơnê lơ kơ đe ‘nhŏng oh, asong đak sŏ nhă ăn kon pơlei thoi âu sô̆ hơ-iă tơpă”

Adoi đei đe linh kŏng an tơgŭm ăn đak tơtom, ƀok Lò Văn Kiều, tơ̆ thôn 12, xah Ea R’Vê, apŭng Ea Súp, dêh char Đăk Lăk chơt hơ-iă tơroi: “Ƀar khei hơdrol kơ noh gơnơm đei đak hơlŭng tơjê̆ âu, mă lei dang ei vă jê̆ hrơ̆ bơih. Minh ‘măng asong đak thoi âu noh sŏ nhăn đei 4-5 năr pơtơm đĭ, yua mong ƀiơ̆. Jơnŭm pơgơ̆r tơring hăm ƀô đô̆i, kŏng an asong đak sŏ nhă noh ưh đei khăi kơ đak bơih”

Thiếu tá Đoàn Huy Tưởng, Kơdră Kŏng an xah Ea R’Vê, apŭng Ea Súp ăn tơbăt, rim năr dôm thôn, pơlei chă chih akŏm hơnăn rim unh hmam kơƀah đak sŏ nhă. Đơ̆ng rŏng kơ noh, Kŏng an xah tơlĕch jang hadoi hăm Khul jang mŭk drăm linh 737 (Quân khu 5), pơlơh băl chơ đak sŏ nhă truh tơ̆ tơring ăn kon pơlei. Lơ̆m noh, Kŏng an xah Ea R’vê đei Kŏng an apŭng Ea Súp asong ăn 2 gre chơ đak, oei Khul jang mŭk drăm linh 737 đei gre chơ đak truh tơgŭm ăn kon pơlei:  “Minh ‘măng asong đak ăn minh unh hnam đơ̆ng 1-3m3. Roi năr roi ưh kơ mah đak sŏ nhă roi lang lap. Tơdrong asong đak âu adoi oei lơ̆m tơdrong pơkăp jang chă tơgŭm dŏng đơ̆ng Kong an apŭng, lơ̆m noh đei tơdrong asong đak sŏ nhă ăn kon pơlei ưh kơ mah đak”