Tơ̆ hop akŏm, ƀok Hồ Văn Niên- Bí thư Đảng dêh char Gia Lai hlôi pơjao ăn Hla bơar tơchơ̆t đơ̆ng Khul kơdră chĕp pơgơ̆r Đảng dêh char păng pôk ăn pơkao hmach bơnê chơt hơ iă ăn kơ ƀok Rah Lan Chung. Ƀok Ran Lan Chung - Kơ iĕng Bí thư Đảng dêh char, Kơdră chĕp pơgơ̆r Hơnih vei lăng kon pơlei dêh char đei tơchơ̆t ăn iŏk jang Bí thư Khul kơdră chĕp pơgơ̆r Đảng Hơnih vei lăng kon pơlei dêh char Gia Lai jăl jang 2021-2026. Hơdrol kơ ‘noh, lơ̆m năr 27/8, tơ̆ ‘Măng hop akŏm kơ Jơnŭm vei lăng kon pơlei dêh char Gia Lai, ƀok Rah Lan Chung hlôi đei pôk tơmơ̆t jang kơchư̆k Kơdră chĕp pơgơ̆r Hơnih vei lăng kon pơlei dêh char Gia Lai. Ƀok Rah Lan Chung, 53 sơnăm, hơdrung Jrai, pơlei oei tơ̆ thĭ trân Chư̆ Prông, dêh char Gia Lai. Lơ̆m khei năr bơ̆ jang, ƀok hlôi đei iŏk jang lơ kơchư̆k kăl lơ̆m apŭng Chư Păh păng Hơnih Đảng dêh char Gia Lai. Hơdrol đei pôk tơmơ̆t jang Kơdră chĕp pơgơ̆r Hơnih vei lăng kon pơlei dêh char Gia Lai, ƀok Chung iŏk jang Kơ iĕng Ƀĭ thư Đảng dêh char.